ନୂଆଦିଲ୍ଲୀ: ବିହାରରେ ସ୍ପେଶାଲ୍ ଇଣ୍ଟେନ୍ସିଭ୍ ରିଭିଜନ (SIR) ଉପରେ ବିବାଦ ବିହାରରୁ ଦିଲ୍ଲୀ ପର୍ଯ୍ୟନ୍ତ ପହଞ୍ଚିଛି । ବିରୋଧୀ ଇଣ୍ଡି ମେଣ୍ଟ ଏହି ପ୍ରସଙ୍ଗରେ କେନ୍ଦ୍ର ସରକାରଙ୍କୁ ଟାର୍ଗେଟ କରିବାକୁ ଯାଉଛି । ସରକାରଙ୍କୁ ଘେରିବା ପାଇଁ ଏକ ରଣନୀତି ପ୍ରସ୍ତୁତ କରିବ ଇଣ୍ଡି ମେଣ୍ଟ । ଏନେଇ ଇଣ୍ଡି ମେଣ୍ଟର ନେତାମାନେ ଅଗଷ୍ଟ ୭ରେ ଏକ ରାତ୍ରୀଭୋଜନ ବୈଠକ ଆୟୋଜନ କରିବେ । ଯେଉଁଥିରେ SIRକୁ ନେଇ ଏବେର ସ୍ଥିତି  ଏବଂ ଆଗାମୀ ରଣନୀତି ଉପରେ ଆଲୋଚନା ହେବାର ସମ୍ଭାବନା ରହିଛି । 

ଏହା ସହ ଅଗଷ୍ଟ ୮ରେ ବିରୋଧୀ ଦଳଗୁଡ଼ିକ ମିଳିତ ଭାବରେ ନିର୍ବାଚନ କମିଶନ ମୁଖ୍ୟାଳୟକୁ ଏକ ପ୍ରତିବାଦ ଶୋଭାଯାତ୍ରା ବାହାର କରିବାକୁ ଯୋଜନା କରୁଛନ୍ତି । ସଂସଦର ମୌସୁମୀ ଅଧିବେଶନ ଚାଲିଛି ଏବଂ ବିରୋଧୀ ଦଳଗୁଡ଼ିକ ସଂସଦରେ ଏସଆଇଆର ପ୍ରସଙ୍ଗରେ ଆଲୋଚନା ପାଇଁ ନିରନ୍ତର ଦାବି କରୁଛନ୍ତି । ବିରୋଧୀ ଦଳଗୁଡ଼ିକ ଅଭିଯୋଗ କରିଛନ୍ତି ଯେ, SIR ପ୍ରକ୍ରିୟା ମାଧ୍ୟମରେ ଲକ୍ଷ ଲକ୍ଷ ଲୋକଙ୍କ ମତଦାନ ଅଧିକାର ଛଡ଼ାଇ ନେବାକୁ ଚେଷ୍ଟା କରାଯାଉଛି । 

ବିରୋଧୀ ଦଳଗୁଡ଼ିକ କହିଛନ୍ତି ଯେ, ଏହି ପ୍ରକ୍ରିୟା ମାଧ୍ୟମରେ ସମାଜର ଦୁର୍ବଳ ବର୍ଗ, ସଂଖ୍ୟାଲଘୁ, ପଛୁଆ ଏବଂ ବଞ୍ଚିତ ବର୍ଗଙ୍କ ନାମ ଭୋଟର ତାଲିକାରୁ ବାଦ ଦେବା ପାଇଁ ଏକ ଷଡ଼ଯନ୍ତ୍ର କରାଯାଇଛି । ସେପଟେ ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ବିରୋଧୀଙ୍କ ଅଭିଯୋଗକୁ ଖଣ୍ଡନ କରିଛନ୍ତି । ସେ ଶୁକ୍ରବାର କହିଛନ୍ତି ଯେ, ନିର୍ବାଚନ କମିଶନ ଭଳି ସାମ୍ବିଧାନିକ ସଂସ୍ଥାଗୁଡ଼ିକର କାର୍ଯ୍ୟ ସଂସଦରେ ଆଲୋଚନା କରାଯାଇପାରିବ ନାହିଁ । ସେ ବିରୋଧୀଙ୍କ ଦାବିକୁ ଅସାମ୍ବିଧାନିକ ବୋଲି କହିଛନ୍ତି । 

ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଏହି ବିଷୟରେ ଚୂଡ଼ାନ୍ତ ନିଷ୍ପତ୍ତି ଲୋକସଭା ଏବଂ ରାଜ୍ୟସଭା ବାଚସ୍ପତିମାନଙ୍କୁ ନେବାକୁ ପଡିବ । ବରିଷ୍ଠ ତୃଣମୂଳ କଂଗ୍ରେସ ନେତା ଏବଂ ରାଜ୍ୟସଭା ସାଂସଦ ଡେରେକ ଓ'ବ୍ରାଏନ୍ କେନ୍ଦ୍ର ସରକାରଙ୍କୁ ଆକ୍ରମଣ କରି କହିଛନ୍ତି ଯେ, ବିଜେପି ସଂସଦରେ SIR ଉପରେ ବିତର୍କ କରିବାକୁ ଭୟ କରୁଛି ।