ଉଦଳା, ୨୯।୧୨: ଗାଁ ଜଙ୍ଗଲରୁ ବାହାରି ଗାଁରେ ପଶିଲା ଦନ୍ତା । ଗୋଠ ଛାଡ଼ି ଗାଁରେ ବୁଲିଲା । ଭୟଭୀତ ଅବସ୍ଥାରେ ଗ୍ରାମବାସୀ । ୨ ଦିନ ପୂର୍ବରୁ ଉଦଳା ବନାଞ୍ଚଳ କୁସୁମିଆ ଜଙ୍ଗଲରେ ପହଞ୍ଚିଥିଲେ ୪୪ ଟିକିଆ ହାତୀପଲ । ହାତୀପଲ ଗ୍ରାମଠାରୁ ମାତ୍ର ୨ଶହ ମିଟର ଦୂରରେ ରହିଥିବା ବେଳେ ହାତୀପଲରେ ୩ ଗୋଟି ଦନ୍ତା ହାତୀ ରହିଛନ୍ତି ।
ଗାଁରେ ପଶିଥିବା ଏହି ହାତୀପଲକୁ ଘଉଡ଼ାଇବା ଲାଗି ୨ ଦିନ ହେବ ବନ ବିଭାଗ ନାକେଦମ୍ ହୋଇଥିଲେ ସୁଦ୍ଧା ହାତୀଙ୍କୁ ଘଉଡ଼ାଇବାରେ ସଫଳ ହୋଇନାହାନ୍ତି । ଦଳ ଛାଡ଼ି ଏକ ଦନ୍ତା ହାତୀ ଜଙ୍ଗଲରୁ ବାହାରି ଆସି ଗ୍ରାମରେ ପଶିବା ସହିତ ଗାଁ ରାସ୍ତାରେ ବୁଲୁଛି । ଯାହା ଫଳରେ କୁସୁମିଆ ଏବଂ ପଟିସାରି ଗ୍ରାମବାସୀ ଆତଙ୍କିତ ଅବସ୍ଥାରେ ରହିଛନ୍ତି । ଗୋଠରେ ହାତୀଛୁଆ ରହିଥିବାରୁ ହାତୀମାନେ ଜଙ୍ଗଲ ଛାଡ଼ି ଯାଉନଥିବା କୁହାଯାଉଛି ।
