ନୂଆଦିଲ୍ଲୀ,୨୭।୩: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସ୍ୱାମୀ ତଥା ପ୍ରସିଦ୍ଧ ଅର୍ଥନୀତିଜ୍ଞ ପରାକାଲା ପ୍ରଭାକର ନିର୍ବାଚନୀ ବଣ୍ଡ ମାମଲାରେ ଦେଇଛନ୍ତି ଏକ ବଡ଼ ମନ୍ତବ୍ୟ । ସେ କହିଛନ୍ତି, ଏହା କେବଳ ଦେଶର ସବୁଠାରୁ ବଡ ସ୍କାମ ନୁହେଁ ବରଂ ଦୁନିଆର ସବୁଠୁ ବଡ ସ୍କାମ। ନ୍ୟୁଜ୍ ଚ୍ୟାନେଲ 'ରିପୋର୍ଟର ଟିଭି' ସହିତ ଆଲୋଚନା ସମୟରେ ସେ କହିଛନ୍ତି - ମୁଁ ଭାବୁଛି ନିର୍ବାଚନ ବଣ୍ଡ ପ୍ରସଙ୍ଗ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହୋଇଯିବ। ବିଜେପିର ଲଢେଇ ବିରୋଧୀ ଦଳ କିମ୍ବା ଅନ୍ୟ କୌଣସି ଦଳ ସହ ହେବ ନାହିଁ, କିନ୍ତୁ ଏହି ସମସ୍ୟା ହେତୁ ବିଜେପି ଏବଂ ଭାରତବାସୀଙ୍କ ମଧ୍ୟରେ ପ୍ରକୃତ ଲଢେଇ ଦେଖିବାକୁ ମିଳିବ।

ପରାକାଲା ପ୍ରଭାକର ଆହୁରି ମଧ୍ୟ କହିଛନ୍ତି ଯେ, ମୁଁ ଭାବୁଛି ନିର୍ବାଚନ ବଣ୍ଡ ସହ ଜଡିତ ପ୍ରସଙ୍ଗ  ଅଧିକ ଗୁରୁତ୍ୱ ହାସଲ କରିବ। ଏହା ଶୀଘ୍ର ସାଧାରଣ ଲୋକଙ୍କ ନିକଟରେ ପହଞ୍ଚୁଛି। ଏବେ ସମସ୍ତେ ଧୀରେ ଧୀରେ ବୁଝୁଛନ୍ତି ଯେ ଏହା କେବଳ ଭାରତ ନୁହେଁ ବରଂ ବିଶ୍ୱର ସବୁଠାରୁ ବଡ ସ୍କାମ। ଏଭଳି ପରିସ୍ଥିତିରେ ମୁଁ ଅନୁଭବ କରୁଛି ଯେ ଏହି ସମସ୍ୟା ଯୋଗୁଁ ଏହି ସରକାରଙ୍କୁ ଭୋଟରଙ୍କ ପକ୍ଷରୁ କଠୋର ଦଣ୍ଡ ଦିଆଯିବ। "

ଉଲ୍ଲେଖନୀୟ ଯେ, ନିର୍ବାଚନ କମିଶନ୍‌ଙ୍କ ଅଫସିଆଲ ଓ୍ବେବସାଇଟ୍‌ର ତଥ୍ୟ ଅନୁସାରେ, ନିର୍ବାଚନ ବଣ୍ଡର ସବୁଠାରୁ ଅଧିକ ଲାଭ ବିଜେପି ପାଇଛି। ୧୨ ଅପ୍ରେଲ ୨୦୧୯ ରୁ ୧୫ ଫେବୃଆରୀ ୨୦୨୪ ଭିତରେ ବିଜେପି ୬,୯୮୬.୫ କୋଟି ଟଙ୍କା ପାଇଛି। ଏହାପରେ ଦ୍ବିତୀୟ ସ୍ଥାନରେ ରହିଛି ପଶ୍ଚିମବଙ୍ଗର ଶାସକ ଦଳ ତୃଣମୂଳ କଂଗ୍ରେସ(୧,୩୯୭ କୋଟି), ସେଭଳି ଦେଶର ସବୁଠାରୁ ପୁରୁଣା ପାର୍ଟି କଂଗ୍ରେସ(୧,୩୩୪ କୋଟି) ପାଇ ତୃତୀୟ ସ୍ଥାନରେ ରହିଛି। ତା ପରେ ଚତୁର୍ଥ ସ୍ଥାନରେ ରହିଛି  ଭାରତ ରାଷ୍ଟ୍ର ସମିତି(୧,୩୨୨ କୋଟି)। ନିର୍ବାଚନୀ ବଣ୍ଡ ମାମଲାରେ ତଥ୍ୟ ଦେବାକୁ ନିକଟରେ ସୁପ୍ରିମକୋର୍ଟ ଭାରତୀୟ ଷ୍ଟେଟ୍‌ ବ୍ୟାଙ୍କକୁ ନିର୍ଦେଶ ଦେଇଥିଲେ। ଏସବିଆଇ ସଠିକ୍ ତଥ୍ୟ ଦେବାରେ ବିଳମ୍ବ କରୁଥିବାରରୁ ସର୍ବୋଚ୍ଚ ଅଦାଲତ ଏଥିପାଇଁ କଡା ଭର୍ତ୍ସନା ମଧ୍ୟ କରିଥିଲେ।