ଲମତାପୁଟ, ୧୯/୧୦: କୋରାପୁଟ ଜିଲ୍ଲା ବାଲଡ଼ା ଗ୍ରାମ ନିକଟ ଚାଷ ଜମିରେ ବୃଦ୍ଧାଙ୍କୁ ହତ୍ୟା କରିଥିବା ମାମଲାରେ ପାଡୁଆ ପୋଲିସ ବୃଦ୍ଧାଙ୍କ ସମ୍ପର୍କୀୟ ପୁତୁରା ସମ୍ବା ଖିଲକୁ ଗିରଫ କରିଛି । କିଛି ଟଙ୍କା ଏବଂ ସୁନା ଲୁଟିବା ଉଦ୍ଦେଶ୍ୟରେ ସମ୍ପର୍କୀୟ ପୁତୁରା ନିଜ ମାଉସୀଙ୍କୁ ହତ୍ୟା କରି ଜମିରେ ଫିଙ୍ଗି ଚାଲିଯାଇଥିଲା । କୋରାପୁଟ ଜିଲ୍ଲା ଲମତାପୁଟ ବ୍ଲକ୍ର ବାଲଡ଼ା ଗ୍ରାମରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଅକ୍ଟୋବର ୧୧ ତାରିଖରେ ବୃଦ୍ଧା ମାଲେ ଖିଲ କୌଣସି ଏକ କାର୍ଯ୍ୟ ପାଇଁ ବାଲଡ଼ା ଗ୍ରାମ ଯାଇଥିବା ବେଳେ ଅଭିଯୁକ୍ତ ସମ୍ବା ଖିଲ ମଧ୍ୟ ସେହି ସ୍ଥାନକୁ ଯାଇଥିଲା । ଉଭୟ ମିଶି ମଦ୍ୟ ପାନ କରିଥିଲେ । ବୃଦ୍ଧା ମଦ ଟଙ୍କା ଦେଉଥିବା ସମୟରେ ତାଙ୍କ ପାଖେ ଅଧିକ ଟଙ୍କା ଥିବାର ଦେଖିଥିଲା ଅଭିଯୁକ୍ତ ସମ୍ବା l ବୃଦ୍ଧାଙ୍କୁ ଟଙ୍କା ମଧ୍ୟ ମାଗିଥିଲା । କିନ୍ତୁ ବୃଦ୍ଧା ଟଙ୍କା ଦେବାକୁ ମନା କରି ଦେବାରୁ ଉଭୟଙ୍କ ମଧ୍ୟରେ ବଚସା ହୋଇଥିଲା । ପରବର୍ତୀ ସମୟରେ ବୃଦ୍ଧା ଘରକୁ ଯାଉଥିବା ବେଳେ ଅଭିଯୁକ୍ତ ସମ୍ବା ବୃଦ୍ଧାଙ୍କ ପଛେ ପଛେ ଯାଇ ତାଙ୍କୁ ହତ୍ୟା କରି ୧୩୦୦ ଟଙ୍କା ଓ କିଛି ସୁନା ଗହଣା ଲୁଟି ନିକଟ ଜଙ୍ଗଲରେ ଲୁଚି ରହିଥିଲା । ଏନେଇ ମହିଳାଙ୍କ ପରିବାର ଲୋକେ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ତଦନ୍ତ କରିଥିଲା । ଶେଷରେ ଏହି ଘଟଣାର ପର୍ଦ୍ଦାଫାଶ ହୋଇଥିଲା । ଏସଡିପିଓ ଏକ ଟିମ୍ ଗଠନ କରି ଅଭିଯୁକ୍ତକୁ ଧରିଥିଲେ । ପରେ ଅଭିଯୁକ୍ତ ସମ୍ପର୍କୀୟ ପୁତୁରା ସମ୍ବା ଖିଲକୁ ଘଟଣା ସ୍ଥଳକୁ ନେଇ ସିନ୍ ରିକ୍ରିଏସନ୍ କରିଥିଲେ । ଅଭିଯୁକ୍ତ ଜଣକ ନିଜ ଦୋଷ ସ୍ଵୀକାର କରିବା ସହ ସେ କାହିଁକି ଓ କିପରି ବୃଦ୍ଧା ଜଣକୁ ହତ୍ୟା କରି ଫିଙ୍ଗି ଚାଲି ଯାଇଥିଲା ତାହାର ଜାଣିପାରିଲା ପୋଲିସ । ଶେଷରେ ଶୁକ୍ରବାର ପୋଡୁଆ ପୋଲିସ ଅଭିଯୁକ୍ତକୁ କୋର୍ଟ ଚାଲାଣ କରିଥିବା ନନ୍ଦପୁର ଏସଡିପିଓ ସମ୍ବିତ କୁମାର ମାଝୀ ସୂଚନା ଦେଇଛନ୍ତି l
