ନୂଆଦିଲ୍ଲୀ,୨୪/୦୧: ପୁଣି ଥରିଲା ମିଆଁମାର । ଗତକାଲି ବିଳମ୍ବିତ ରାତିରେ ଭୂକମ୍ପ ଝଟକା ଅନୁଭୂତ ହୋଇଛି। ଏହାର ରିକ୍ଟର ସ୍କେଲରେ ତୀବ୍ରତା ୪.୮ ରେକର୍ଡ଼ କରାଯାଇଛି । ତେବେ ଏହି ଭୂକମ୍ପଜନିତ ଆହତ କିମ୍ବା କ୍ଷୟକ୍ଷତି ସମ୍ବନ୍ଧରେ ଏବେ ସୁଦ୍ଧା କୌଣସି ସୂଚନା ମିଳିପାରିନାହିଁ । ଅନ୍ୟପଟେ ସୁନାମୀ ନେଇ ମଧ୍ୟ ଆଲର୍ଟ ଜାରି କରାଯାଇନାହିଁ । ଭୂକମ୍ପ ସମୟରେ ସ୍ଥାନୀୟ ଲୋକମାନେ ଭୟଭୀତ ହୋଇ ସୁରକ୍ଷିତ ସ୍ଥାନକୁ ଚାଲି ଯାଇଥିଲେ ।
ଭୂକମ୍ପ ରାତି ପ୍ରାୟ ୧ଟା ସମୟରେ ହୋଇଥିଲା। ଭୂକମ୍ପର ଗଭୀରତା ୧୦୬ କିଲୋମିଟର ଥିବା ଜଣାପଡ଼ିଛି । ଜାତୀୟ ଭୂବିଜ୍ଞାନୀ କେନ୍ଦ୍ର ଅନୁସାରେ , ମିଆଁମାରରେ ଏହି ସପ୍ତାହ ଆରମ୍ଭରୁ ୫.୧ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା । ଏହା ପୂର୍ବରୁ ଡିସେମ୍ବରରେ ମଧ୍ୟ ୪.୨ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା । ପ୍ରକାଶ ଥାଉକି, ମିଆଁମାର ବ୍ୟତୀତ ଆଫଗାନିସ୍ତାନ, ତିବ୍ଦତ ଓ ଫିଲିପିନ୍ସରେ ମଧ୍ୟ ଭୂକମ୍ପ ହୋଇଥିଲା । ଫିଲିପିନ୍ସରେ ୨ ଥର ଭୂକମ୍ପ ଅନୁଭୂତ ହୋଇଛି । ଭୂମିକମ୍ପର କେନ୍ଦ୍ର ଭୂମି ଠାରୁ ୧୦ କିଲୋମିଟର ଗଭୀରରେ ଥିଲା । ଏହି ଭୂକମ୍ପରେ ବର୍ତ୍ତମାନ ଯାଏଁ କୌଣସି କ୍ଷୟକ୍ଷତି ହେବାର ଆଶଙ୍କା ନାହିଁ। ଡ଼େକନ ହେରାଲ଼୍ଡର ରିପୋର୍ଟ ଅନୁସାରେ , ଭୂକମ୍ପ ଝଟକାରେ ଫିଲିପିନ୍ସର ରାସ୍ତାରେ ଫାଟ ସୃଷ୍ଟି ହେବା ସହ ଅନେକ ଘରର କାନ୍ଥରେ ମଧ୍ୟ ଫାଟ ସୃଷ୍ଟି ହୋଇଥିବା ଜଣାପଡ଼ିଛି।
