ଭୁବନେଶ୍ୱର, ୧୧/୧୦ : ରାଜ୍ୟରେ ୬୦% ଡାକ୍ତର ପଦବି ଖାଲି ପଡ଼ିଥିବା ବେଳେ ସ୍ୱାସ୍ଥ୍ୟ ବିଭାଗର ତ୍ରୁଟିପୂର୍ଣ୍ଣ ନିଷ୍ପତ୍ତି ଯୋଗୁ ଅନେକ ଡାକ୍ତର କାର୍ଯ୍ୟରେ ଯୋଗଦେଇ ପାରୁନାହାନ୍ତି । ସେମାନଙ୍କୁ ମାସ ମାସ ଧରି ଅପେକ୍ଷା କରିବାକୁ ପଡୁଛି । ଏ ପରିସ୍ଥିତିରେ ଛୁଟିରେ ଥିବା ଡାକ୍ତରମାନେ ଅଧିକ ଚିନ୍ତା ବଢ଼ାଉଛନ୍ତି। ବିଭାଗର ଉଦାସୀନତା ଓ ପ୍ରିୟାପ୍ରୀତି ଯୋଗୁ ଡାକ୍ତରମାନେ ଲମ୍ବା ଛୁଟିରେ ରହୁଛନ୍ତି। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ବିଭାଗର ହାତ ଯାଉନି।
ରାଜ୍ୟରେ ୧୫ହଜାର ୭୭୪ ମଞ୍ଜୁରୀପ୍ରାପ୍ତ ଡାକ୍ତର ପଦବି ରହିଛି । ସେଥିରୁ ୯୨୬୮ ପଦବି ଖାଲିପଡ଼ିଛି । ୬୫୦୬ ଡାକ୍ତର କାର୍ଯ୍ୟରତ ଅଛନ୍ତି । ସେମାନଙ୍କ ମଧ୍ୟରୁ କେତେକ ଡାକ୍ତର ଇଚ୍ଛାକୃତ ଭାବେ କାର୍ଯ୍ୟରେ ଯୋଗଦେଉନାହାନ୍ତି । ଆଉ କେତେକ ଡାକ୍ତର କାମ କରିବାକୁ ଚାହୁଁଥିଲେ ମଧ୍ୟ ସେମାନଙ୍କୁ ସୁଯୋଗ ଦିଆଯାଉନି । ସ୍ୱାସ୍ଥ୍ୟ ବିଭାଗର ତ୍ରୁଟିପୂର୍ଣ୍ଣ ଆଦେଶନାମା ପାଇଁ ସେମାନେ ମାସ ମାସ ଧରି କାମ କରିବାରୁ ବଞ୍ଚିତ ହେଉଛନ୍ତି ବୋଲି ଅଭିଯୋଗ କରିଛନ୍ତି। ସେମାନେ ନିଯୁକ୍ତି ପାଇଥିବା ସ୍ଥାନରେ ଯୋଗଦେବାକୁ ବାରମ୍ବାର ସ୍ୱାସ୍ଥ୍ୟ ବିଭାଗକୁ ନିବେଦନ କରୁଥିଲେ ସୁଦ୍ଧା ବିଭିନ୍ନ ଅନୁମତି ମିଳୁନାହିଁ ।
ସୂଚନା ଅନୁଯାୟୀ ନୟାଗଡ଼ା ଜିଲ୍ଲାରେ କାର୍ଯ୍ୟରତ ଜଣେ ମହିଳା ଡାକ୍ତର ୯ମାସ ତଳେ ଖୋର୍ଦ୍ଧାକୁ ବଦଳି ହୋଇ ଆସିଥିଲେ । ସ୍ୱାସ୍ଥ୍ୟ ବିଭାଗ ଆଦେଶ ପାଇଲା ପରେ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ସମ୍ପୃକ୍ତ ମହିଳା ଡାକ୍ତରଙ୍କୁ ରିଲିଭ୍ କରି ତାଙ୍କ ସ୍ଥାନରେ ବଦଳି ହୋଇ ଆସିଥିବା ଡାକ୍ତରଙ୍କୁ କାର୍ଯ୍ୟରେ ଯୋଗ ଦେବାକୁ ଅନୁମତି ଦେଇଥିଲେ । ହେଲେ ନୟାଗଡ଼ରୁ ବଦଳି ହୋଇ ଆସିଥିବା ମହିଳା ଡାକ୍ତର ଖୋର୍ଦ୍ଧାରେ ଯୋଗଦାନ କରିବା ବେଳେ ଆଶ୍ଚର୍ଯ୍ୟଜନକ ଘଟଣା ଦେଖିବାକୁ ମିଳିଥିଲା । କାରଣ ସେଠାରେ ପୂର୍ବରୁ ଜଣେ ଡାକ୍ତର ନିଯୁକ୍ତ ଅଛନ୍ତି । ସମ୍ପୃକ୍ତ ମହିଳା ଡାକ୍ତର ଏନେଇ ମାସ ମାସ ଧରି ବିଭାଗୀୟ ଅଧିକାରୀଙ୍କୁ ଗୁହାରୀ କଲେ ସୁଦ୍ଧା କୌଣସି ପଦକ୍ଷେପ ନିଆଯାଉନି । ଅନେକ ଡାକ୍ତର ଏଭଳି ତ୍ରୁଟିପୂର୍ଣ୍ଣ ନିଷ୍ପତ୍ତି ପାଇଁ କାର୍ଯ୍ୟରେ ଯୋଗଦେଇ ପାରୁନାହାନ୍ତି।
