ବାସୁଦେବପୁର,୦୯/୦୨: ବାଜା, ବାଣ ଓ ରୋଷଣିରେ କମ୍ପୁଥିଲା ରାସ୍ତା । ଲାଗୁଥିଲା ଯେମିତି ବାହାଘର ଶୋଭାଯାତ୍ରା ଚାଲିଛି । ଗୋଟିଏ ନୁହେଁ ଦୁଇ ଦୁଇଟି ବ୍ୟାଣ୍ଡ ପାର୍ଟି ବାଜା ବଜାଇ ରୋଷଣି କରୁଥିଲେ । ତା’ ସହ ଡିଜେ ଗୀତ ସହିତ ତାଳକୁ ତାଳ ମିଶାଇ ନାଟି ନାଚି ଚାଲିଥାନ୍ତି କିଛି ଲୋକ । ବାଜୁଥିଲା ଖଇ କଉଡି ବିଞ୍ଚି ବିଞ୍ଚି ଗଙ୍ଗା ଜଳ ଛିଞ୍ଚି ଘରୁ ବିଦା ହୋଇ ଯାଉଛି ଦୁନିଆ ଛାଡ଼ି... ଗୀତ । ଶୋଭାଯାତ୍ରା ଦେଖି ରାସ୍ତାରେ ଯାଉଥିବା ଲୋକେ ମଧ୍ୟ ଅଟକି ଯାଉଥିଲେ ବରଗାଡ଼ି ଦେଖିବାକୁ । ହେଲେ ସୁସଜ୍ଜିତ ଗାଡ଼ିରେ ବର ଯାଉନଥିଲା, ଜଣେ ବୃଦ୍ଧଙ୍କ ଶବକୁ ଶୋଭାଯାତ୍ରାରେ ମଶାଣି ନିଆଯାଉଥିଲା ।
ଏହି ଶବ ଶୋଭାଯାତ୍ରା ଥିଲା ଭଦ୍ରକ ଜିଲ୍ଲା ବାସୁଦେବପୁର ବ୍ଲକ୍ ବାଲିମେଦ ପଞ୍ଚାୟତ ପାନପୁର ଭୋଇସାହିର ଧନେଶ୍ୱର ଭୋଇଙ୍କର । ସେ ଗ୍ରାମରେ ଧନିଆ ଜେଜେ ନାମରେ ବେଶ୍ ପରିଚିତ ଥିଲେ । ଜେଜେଙ୍କୁ ମୃତ୍ୟୁ ବେଳକୁ ୯୭ ବର୍ଷ ହୋଇଥିଲା । ମୃତ୍ୟୁ ପୂର୍ବରୁ ବାରମ୍ବାର ଧନିଆ ଜେଜେ କହୁଥିଲେ, ମୁଁ ମରିଗଲେ ମୋତେ କେହି ପୁରୀ ସ୍ୱର୍ଗଦ୍ୱାର ନେବନାହିଁ । ମୋତେ ମୋ ପଞ୍ଚାୟତର ବିଭିନ୍ନ ଗାଁ ବୁଲାଇବା ସହିତ ବାଣ, ରୋଷଣି, ଡିଜେ ବଜାଇ ମହା ଆଡ଼ମ୍ବର ସହିତ ମଶାଣି ନେଇଯିବ ।
ଶନିବାର ସକାଳେ ତାଙ୍କ ମୃତ୍ୟୁ ହୋଇଥିଲା । ବାପାଙ୍କ କହିବା ମୁତାବକ ପୁଅ ନିରଞ୍ଜନ ଭୋଇ ଓ ରବିନ୍ଦ୍ର ଭୋଇ ଦୁଇଟି ବ୍ୟାଣ୍ଡପାର୍ଟି, ଗୋଟିଏ ଡିଜେ ସହିତ ବାଣ ରୋଷଣିର ଆୟୋଜନ କରିଥିଲେ । ଶତାଧିକ ସମ୍ପର୍କୀୟ ହାତରେ ଫୁଲ ପକାଇ ଦାସସାହି, ସେଠିସାହି, ରାଉତ୍ ସାହି, ତ୍ରିନାଥ ଛକ, ପଞ୍ଚାୟତ କାର୍ଯ୍ୟାଳୟ ଦେଇ ଗାଁ ମଶାଣିକୁ ନେଇଯାଇଥିଲେ । ପଞ୍ଚାୟତ କାର୍ଯ୍ୟାଳୟରେ ବିଭିନ୍ନ ମହାସଂଘର ମହିଳାମାନେ ଜେଜେଙ୍କୁ ଶ୍ରଦ୍ଧାସୁମନ ଜ୍ଞାପନ କରିଥିଲେ । ପରେ ନିଜ ଗାଁ ମଶାଣିରେ ଶେଷକୃତ୍ୟ ସମ୍ପନ୍ନ ହୋଇଥିଲା । ବଡ଼ ପୁଅ ମୁଖାଗ୍ନି ଦେଇଥିଲେ । ଘଟଣାଟି ଏବେ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
