ତିଗିରିଆ ୧୩/୦୬: ମଦରେ ଭାସିଲା ଗାଁ ଦାଣ୍ଡ। ଏବେ ଆଉ ସଂରକ୍ଷିତ ଜଙ୍ଗଲରେ ନୁହେଁ ବରଂ ଘର ଭିତରେ ଚାଲିଛି ଚୋରା ଦେଶୀ ମଦ କାରବାର। କାଠ ତାଳେ ରଖାଯାଇଛି ପୁଳାପୁଳା ଦେଶୀ ମଦ ବ୍ୟାରେଲ l ଯେତେ ଖୋଜିଲେ ସେତେ ବାହାରୁଛି ଚୋରା ଦେଶୀ ମଦ। ଏହି ଦୃଶ୍ୟ ହେଉଛି କଟକ ଜିଲ୍ଲା ତିଗିରିଆ ଥାନା ଭିରୁଡ଼ା ଓ ପଣସପାଟଣା ଗ୍ରାମର। ଆଠଗଡ଼ ଓ କଟକ ଅବକାରୀ ବିଭାଗ ପକ୍ଷରୁ ମିଳିତ ଚଢ଼ାଉରେ ଜଣକୁ ଗିରଫ କରାଯାଇଥିବା ବେଳେ ଚାରି ଜଣ ଫେରାର ହୋଇଛନ୍ତି l ଗିରଫ ଅଭିଯୁକ୍ତ ଜଣକ ହେଲେ ସେହି ଗ୍ରାମର ଇନ୍ଦ୍ରମଣି ସାହୁ । ଅବକାରୀ ବିଭାଗ ପକ୍ଷରୁ ୪୮୫୦ ଲିଟର ଚୋରା ଦେଶୀ ମଦ ସହିତ ୧୭୧୫୦ ଲିଟର ପୋଚ ଜବତ୍ କରି ନଷ୍ଟ କରାଯାଇଛି। ଏହି ଚଢ଼ାଉରେ ୧୨ ରୁ ଅଧିକ ବିଭାଗୀୟ ଅଧିକାରୀ ସାମିଲ ଥିଲେ। ସୁଚନା ଥାଉ କି, ଏହି ସ୍ଥାନ ବେଆଇନ ଭାବେ ଚୋରା ଦେଶୀ ମଦର କୁଟୀର ଶିଳ୍ପ ପାଲଟିଛି । ଏହି ଅଞ୍ଚଳରୁ ଦେଶୀ ମଦ ପ୍ରସ୍ତୁତ କରାଯାଇ ରାଜ୍ୟ ତଥା ରାଜ୍ୟ ବାହରକୁ ଚୋରା ଚାଲାଣ କରାଯାଇ ଥାଏ ବୋଲି  ସ୍ଥାନୀୟ ଲୋକେ ବାରମ୍ୱାର ଅଭିଯୋଗ କରି ଆସୁଥିଲେ।