ଭୁବନେଶ୍ୱର,୧୪/୦୬: ଇତିହାସ ରଚିଲା ଓଡ଼ିଆ ସିନେମା ‘ବୋଉ ବୁଟୁ ଭୂତ’ । ରଜରେ ଓଡ଼ିଆ ସିନେମାରେ ପୁଣି ଥରେ ଲେଖା ହେଲା ନୂଆ ଇତିହାସ । ପ୍ରଥମ ଥର ପାଇଁ ଓଡ଼ିଆ ସିନେମାକୁ ନେଇ ବକ୍ସ ଅଫିସ୍ରେ ସୃଷ୍ଟି ହେଲା ଝଡ଼ । ପ୍ରଥମ ଦିନରେ ସିନେମା ୫୧.୨ ଲକ୍ଷରୁ ଅଧିକ ଟଙ୍କା ରୋଜଗାର କରିଛି । ଗୋଟିଏ ଭୂତ ସିନେମା ଭାବେ ଓଡ଼ିଆ ଚଳଚ୍ଚିତ୍ର ଦୁନିଆରେ ଐତିହାସିକ ପାଦଚିହ୍ନ ଛାଡ଼ିଲା । ଏଥିପାଇଁ ପ୍ରଯୋଜନା ସଂସ୍ଥା ଓଡ଼ିଆ ଦର୍ଶକଙ୍କୁ କୃତଜ୍ଞତା ଜଣାଇଛି । ଏହାଦ୍ୱାରା ଓଲିଉଡ୍ର ଅନ୍ୟତମ ସୁପର୍ଷ୍ଟାର୍ ବାବୁସାନ୍, ମେଗାଷ୍ଟାର୍ ଅନୁଭବ ମହାନ୍ତିଙ୍କୁ ପଛରେ ପକାଇ ଦେଇଛନ୍ତି । ୨୦୨୪ ଅକ୍ଟୋବର ୯ରେ ଦଶହରା ଦୁର୍ଗାପୂଜା ଅବସରରେ ପ୍ରେକ୍ଷାଳୟକୁ ଆସିଥିଲା ଅନୁଭବଙ୍କ ସିନେମା ‘କର୍ମ’ । ଯେଉଁଥିରେ ସାରା ଓଡ଼ିଶା ‘ଚିରିଂ ଚିରିଂ’ ହୋଇ ନାଚିଥିଲା, ଆଜି ପର୍ଯ୍ୟନ୍ତ ନାଚୁଛି । ସେତେବେଳେ ଏହି ସିନେମା ପ୍ରଥମ କରି ପ୍ରଥମ ଦିନ ବକ୍ସ ଅଫିସ୍ କଲେକ୍ସନ୍ରେ ଇତିହାସ ରଚିଥିଲା । ‘କର୍ମ’ ୩୭.୨୦ ଲକ୍ଷ ରୋଜଗାର କରିଥିଲା । ଆଜି ବାବୁସାନ୍ଙ୍କ ‘ବୋଉ ବୁଟୁ ଭୂତ’ ୫୧.୨ ଲକ୍ଷ ରୋଜଗାର କରି ରେକର୍ଡ କରିଛି ।
ଚଳିତ ବର୍ଷ ରଜ ଉପଲକ୍ଷେ ମୁକ୍ତିଲାଭ କରିଥିଲା ବାବୁସାନ୍ଙ୍କ ନିଜସ୍ୱ ଫିଲ୍ମସ୍ ବ୍ୟାନରରେ ପ୍ରସ୍ତୁତ ପତ୍ନୀ ତୃପ୍ତିଙ୍କ ପ୍ରଯୋଜିତ ‘ବୋଉ ବୁଟୁ ଭୂତ’ । ସାରା ଓଡ଼ିଶାର ୬୧ ପ୍ରେକ୍ଷାଳୟରେ ମୁକ୍ତିଲାଭ କରିଥିବା ସିନେମାକୁ ନେଇ ସମସ୍ତଙ୍କର ଆଶା ଥିଲା । ଯାହା ପ୍ରଥମ ଦିନ ବକ୍ସ ଅଫିସ୍ କଲେକ୍ସନ୍ ରିପୋର୍ଟ ପରେ ପ୍ରମାଣିତ ହୋଇଛି । ଏବେ ସମୀକ୍ଷକଙ୍କ ଆଶା³ ଏ ସିନେମା ୧୫ କୋଟିରୁ ଅଧିକ ବେପାର କରିବ । ପ୍ରଥମ ଥର ପାଇଁ ଭୂତ ସିନେମାକୁ ନେଇ ବାବୁସାନ୍ ପରୀକ୍ଷା ନିରୀକ୍ଷା କରିଥିବାବେଳେ ଏଥିରେ ତାଙ୍କ ନାୟିକା ସାଜିଛନ୍ତି ପୁରୁଣା ରିଲ୍ ସାଥୀ ଅର୍ଚ୍ଚିତା । ବାବୁସାନ୍ଙ୍କ ମା’ ଅପରାଜିତା ପ୍ରମୁଖ ଭୂମିକାରେ ଅଛନ୍ତି । ସୁନ୍ଦରୀ କୁକିଜ୍ ଏକ ଗୀତରେ ଦର୍ଶକଙ୍କୁ ବେଶ୍ ପ୍ରଭାବିତ କରିଛନ୍ତି । ସିନେମାର ‘ଓଦା ଲାଗେ’ ଆଉ "ଡୁଙ୍ଗୁଥିଲି’ ଗୀତ ଟ୍ରେଣ୍ଡିଂରେ ରହିଛି । ସଙ୍ଗୀତ ଦେଇଛନ୍ତି ବାବୁସାନ୍ଙ୍କ ପୁରୁଣା ଯୋଡ଼ିଦାର ଗୌରବ ଆନନ୍ଦ । ସିନେମାର କାହାଣୀ ମହମ୍ମଦ ଇମ୍ରାନ୍ ଓ ସଂଳାପ ଲେଖିଛନ୍ତି ପ୍ରଣବ ପ୍ରସନ୍ନ ରଥ । ନିର୍ଦ୍ଦେଶନା ଦେଇଛନ୍ତି ଜଗଦୀଶ ମିଶ୍ର। ଖୁସିର କଥା³ ଏବେ ଓଡ଼ିଆ ସିନେମାରେ ବକ୍ସ ଅଫିସ୍ କଲେକ୍ସନ୍ ରିପୋର୍ଟ ସାମ୍ନାକୁ ଆସୁଛି । ‘କର୍ମ’ ପରେ ‘ବୋଉ ବୁଟୁ ଭୂତ’ ଦ୍ୱିତୀୟ ସିନେମା, ଯାହାର ବକ୍ସ ଅଫିସ୍ କଲେକ୍ସନ୍ ରିପୋର୍ଟ ସାର୍ବଜନୀନ ହୋଇଛି
