ପୁରୀ,୧୪/୦୬: ସ୍ନାନ ପୂର୍ଣ୍ଣମୀ ବ୍ୟତୀତ ବର୍ଷ ତମାମ୍ ସୁନା କୂଅ ପାଣିର ବ୍ୟବହାର ନାହିଁ । ଏଣୁ ସୁନା କୂଅ ଜଳ ଠାକୁରଙ୍କୁ ବାଧିଲା । ଅତ୍ୟଧିକ ମାତ୍ରାରେ ସ୍ନାନ ପାଇଁ ଦାରୁବ୍ରହ୍ମଙ୍କୁ ଜ୍ୱର । ପୁରୁଷୋତ୍ତମଙ୍କ ରୀତିନୀତିରେ ପ୍ରତିଫଳିତ ମନୁଷ୍ୟର ଜୀବନ ଶୈଳୀ । ଶ୍ରୀମନ୍ଦିରରେ ମହାପ୍ରଭୁଙ୍କ ମାନବ ଳୀଳା ଅବସରରେ ରୋଗର ଉପଚାର ଚାଲିଛି । ଯାନିଯାତ୍ରା ସହ ଜୀବନ ଚକ୍ରରେ ବନ୍ଧା ଏହି ମହାପ୍ରଭୁଙ୍କ ଏହି ଅନବସର ସେବା । ଆତ୍ମୀୟଙ୍କ ସେବାରେ ଠାକୁରେ ଆରୋଗ୍ୟ ଲାଭ କରନ୍ତି ।
ଶୀଘ୍ର ଆରୋଗ୍ୟ କାମନା କରି ଦଇତାପତି ସେବକମାନେ ଠାକୁରଙ୍କ ଗୁପ୍ତ ପୂଜାରେ ଲାଗିଛନ୍ତି । ଦାରୁଦିଅଁଙ୍କ ଓଦା ବସ୍ତ୍ର ଉଲାଗି ପରେ ଶ୍ରୀବିଗ୍ରହଙ୍କ ଶ୍ରୀଅଙ୍ଗ ଫିଟା ନୀତି । ବର୍ଷ ତମାମ୍ ଶ୍ରୀବିଗ୍ରହଙ୍କୁ ଲାଗି ହୋଇଥିବା ଚନ୍ଦନ ଓ କରାଳ ଖୋଲାଯିବ । ଏହାପରେ ଠାକୁରେ ଫୁଲୁରି ତେଲ ଲାଗି ହେବେ । ଠାକୁରଙ୍କୁ ଓଷୁଅ ଲାଗି କରାଯିବ । ଓଷୁଅ ଲାଗି ପରେ ଠାକୁରେ ଚକାକୁ ଉଠିବେ । ଅଣସରରେ ସାଧାରଣ ମନୁଷ୍ୟ ଭଳି ଠାକୁରଙ୍କୁ ମଧ୍ୟ ପଥି, ପାଚନ ଓ ଔଷଧର ଆବଶ୍ୟକତା ପଡ଼ୁଛି । ସ୍ୱତନ୍ତ୍ର ପଣା "ପାଚନ ପାଣି' ପ୍ରସ୍ତୁତ କରି ମହାପ୍ରଭୁଙ୍କୁ ଅର୍ପଣ କରାଯାଉଛି । ଅନବସରରେ ପ୍ରତି ଦିନ ଶ୍ରୀବିଗ୍ରହଙ୍କୁ ଦୁଇଥର ପଣା ଓ ଚକଟା ଭୋଗ ଅର୍ପଣ କରାଯାଉଛି । ଭୋଗରେ ଠାକୁରଙ୍କୁ କେବଳ ସର ଓ ଫଳମୂଳ ଆଦି ଲାଗି କରାଯାଉଛି ।
ଆସନ୍ତା ୨୦ ତାରିଖ ଶୁକ୍ରବାର ଠାକୁରଙ୍କ ଚକା ବିଜେ ନୀତି ଅନୁଷ୍ଠିତ ହେବ । ଶନିବାର ଏକାଦଶୀରେ ଖଳିଲାଗି ଓ ରବିବାର ଦ୍ୱାଦଶୀରେ ରାଜପ୍ରସାଦ ବିଜେ । ଗଜପତି ମହାରାଜ ମହାପ୍ରଭୁଙ୍କ ଆରୋଗ୍ୟ ସୂଚନା ପାଇବେ । ସୋମବାର ଘଣାଲାଗି ହୋଇ ପରଦିନ ଶ୍ରୀପୟରମୁଦା ଶେଷ ହୋଇ ଠାକୁରଙ୍କ ବନକଲାଗି ଅନୁଷ୍ଠିତ ହେବ । ୨୫ ତାରିଖ ଅମାବାସ୍ୟାରେ ପୁନଃ ବନକଲାଗି ବଢ଼ି ୨୬ ତାରିଖ ଗୁରୁବାର ଠାକୁରେ ନବଯୌବନ ଦର୍ଶନ ଦେବେ । ଠାକୁରଙ୍କ ଅଣସର ବିଧିରେ ଦଇତାପତିଙ୍କ ସମେତ ତଡ଼ଉ ପଟ୍ଟନାୟକ, ଦେଉଳ କରଣ, ଚାଙ୍ଗଡ଼ାମେକାପ, କୋଠସୁଆଁସିଆ, ଚିତ୍ରକାର, ମଣ୍ଡଣି, ପୂଜାପଣ୍ଡା, ଦକ୍ଷିଣଦ୍ୱାର ପଢ଼ିଆରି, ପାଳିଆ ମୁଦୁଲି, ଭଣ୍ଡାରମେକାପ, ପ୍ରଧାନି ଓ ଦୈନିକ ନୀତି ସଂପୃକ୍ତ ସମସ୍ତ ସେବକଙ୍କ କାର୍ଯ୍ୟ ରହିଥାଏ ।
