ବାଲେଶ୍ୱର,୧୪/୦୬: ବଣମଲ୍ଲୀ ବଣରେ ଝଡ଼ି ନଯାଇ ତାହାର ସୁବାସ ସମାଜରେ ମହକିତ ହେବ ସେଥିପାଇଁ ‘ପ୍ରମେୟ’ ପ୍ରୟାସ ଜାରି ରଖିଛି । ଓଡ଼ିଆ ଜାତିରେ ଶ୍ରେଷ୍ଠ ଅନାଲୋଚିତ ପ୍ରତିଭାଙ୍କୁ ‘ପ୍ରମେୟ ଉତ୍କର୍ଷ’ ଜରିଆରେ ପ୍ରୋତ୍ସାହିତ କରୁଛି । ସମାଜରେ ଯେକୌଣସି କ୍ଷେତ୍ରରେ ଯିଏ ପ୍ରତିଭାକୁ ପ୍ରସ୍ପୁଟିତ କରିଛି, ତାଙ୍କୁ ଉତ୍କର୍ଷ ସମ୍ମାନରେ ସମ୍ମାନିତ କରି ଏକ ସାମାଜିକ ସହଭାଗିତାର ଉଦାହରଣ ସୃଷ୍ଟି କରିଛି ବୋଲି ‘ପ୍ରମେୟ’ ବାଲେଶ୍ୱର ସଂସ୍କରଣର ‘ଉତ୍କର୍ଷ-୨୦୨୫’ କାର୍ଯ୍ୟକ୍ରମରେ ଅତିଥିବୃନ୍ଦ ମତ ପ୍ରକାଶ କରିଛନ୍ତି ।
ବାଲେଶ୍ୱର ଗାନ୍ଧି ସ୍ମୃତି ଭବନ ପରିସରରେ ଶୁକ୍ରବାର ‘ପ୍ରମେୟ’ ବାଲେଶ୍ୱର ସଂସ୍କରଣର ‘ଉତ୍କର୍ଷ -୨୦୨୫’ କାର୍ଯ୍ୟକ୍ରମ ଆୟୋଜିତ ହୋଇଛି । ‘ପ୍ରମେୟ ଓ ନ୍ୟୁଜ-୭’ର ଗ୍ରୁପ୍ ଡାଇରେକ୍ଟର (ସେଲ୍ସ ଆଣ୍ଡ୍ ମାର୍କେଟିଂ) ହିମାଂଶୁ ହୋତା ସ୍ୱାଗତ ବକ୍ତବ୍ୟରେ କହିଲେ, କମ୍ ସମୟରେ ଆମେ ପାଠକଙ୍କ ବିଶ୍ୱାସ ଜିଣିଛୁ । ସଠିକ୍ ଖବର ପ୍ରକାଶ କରି ଆମେ ଅଗ୍ରଣୀମାନଙ୍କଠାରୁ ଆଗରେ ରହିପାରିଛୁ । ବରେଣ୍ୟ ଅତିଥି ଭାବେ ଶାସକ ଦଳ ମୁଖ୍ୟ ଉପ ସଚେତକ ତଥା ରେମୁଣା ବିଧାୟକ ଗୋବିନ୍ଦ ଦାସ ଯୋଗଦେଇ ଅନାଲୋଚିତ ବ୍ୟକ୍ତି ବିଶେଷଙ୍କୁ ଉତ୍କର୍ଷ ସମ୍ମାନରେ ସମ୍ମାନିତ କରି ‘ପ୍ରମେୟ’ଏକ ଗୁରୁତ୍ୱପୂର୍ଣ୍ଣ ସାମାଜିକ କାର୍ଯ୍ୟ କରିଛି ବୋଲି କହିଥିଲେ ।
ଅନ୍ୟତମ ବରେଣ୍ୟ ଅତିଥି ଭାବେ ବସ୍ତା ବିଧାୟିକା ସୁବାସିନୀ ଜେନା ଯୋଗଦେଇ କହିଲେ, ଏହି କାର୍ଯ୍ୟକ୍ରମ ଅନନ୍ୟ । ଖୁଚୁରା ବ୍ୟବସାୟୀଠାରୁ ଆରମ୍ଭ କରି ଲୋକକଳା, ସାମାଜିକ ସେବାରେ ଯେଉଁମାନେ ପ୍ରକୃତ ଉତ୍କର୍ଷ ହାସଲ କରିଛନ୍ତି ‘ପ୍ରମେୟ’ ସେମାନଙ୍କୁ ସମ୍ମାନିତ କରି ମହତ ଉଦ୍ଦେଶ୍ୟ ସାଧନ କରୁଛି । ଏବେ ତୃଣମୂଳ ସ୍ତରରେ ‘ପ୍ରମେୟ’ ପହଞ୍ଚି ଯଥେଷ୍ଟ ଆଦର ସାଉଁଟିଛି । ସଦର ବିଧାୟକ ମାନସ ଦତ୍ତ କହିଥିଲେ, ସାମାଜିକ କାର୍ଯ୍ୟରେ ନିୟୋଜିତ ଥିବା ପ୍ରତିଭାଙ୍କୁ ଯେଉଁ ଜୁରି ଚୟନ କରିଛନ୍ତି ସେମାନେ ଧନ୍ୟବାଦର ପାତ୍ର । ଖବରକାଗଜ କେବଳ ପାଠକଙ୍କ ମଧ୍ୟରେ ସୀମିତ ନାହିଁ³ ସାମାଜିକ କାର୍ଯ୍ୟକ୍ରମରେ ମଧ୍ୟ ଅଗ୍ରଣୀ ଭୂମିକା ନେଉଛି । ଅନ୍ୟତମ ବରେଣ୍ୟ ଅତିଥି କବି ପ୍ରଶାନ୍ତ ଦାଶ କାର୍ଯ୍ୟକ୍ରମକୁ ପ୍ରଶଂସା କରି ମାତ୍ର କେଇ ବର୍ଷ ମଧ୍ୟରେ ‘ପ୍ରମେୟ’ ଜନତାଙ୍କ ବିଶ୍ୱାସଭାଜନ ହୋଇପାରିଛି । ‘ପ୍ରମେୟ’ର ଏହି ସୁନ୍ଦର ପ୍ରୟାସ ସୁଦୂର ପ୍ରସାରି ହେଉ ବୋଲି କହିଥିଲେ । 
ପ୍ରମେୟ, ନ୍ୟୁଜ-୭ର ସିଇଓ ସୁନୀଲ କୁମାର ଦାସ କହିଥିଲେ, ଆମେ ସମାଜ ପାଇଁ କେବଳ ଖବର ଛାପୁନୁ³ ଗୁଣ୍ଡୁଚି ମୂଷା ଭଳି ଶିକ୍ଷା, ସ୍ୱାସ୍ଥ୍ୟର ଉନ୍ନତି ସହ ବିଭିନ୍ନ ବର୍ଗର ପ୍ରତିଭାଙ୍କୁ ଖୋଜି ବାହାର କରିବାକୁ ପ୍ରତିଶ୍ରୁତିବଦ୍ଧ । ପରେ ଅନ୍ୟତମ ଅତିଥି ବାଲେଶ୍ୱର ଜିଲ୍ଲାପାଳ ସୂର୍ଯ୍ୟବଂଶୀ ମୟୂର ବିକାଶ ଆଜିର ଏହି ମଞ୍ଚରୁ ଅନେକ ଅଜଣା କଥା ଜଣାପଡ଼ିଲା³ ନାପକିନ ଭଳି ଅତ୍ୟାବଶ୍ୟକ ସାମଗ୍ରୀ ପ୍ରସ୍ତୁତ କରୁଥିବା ଜଣେ ସେବକଙ୍କ ପ୍ରୟାସ ଅନେକଙ୍କ ପାଇଁ ପ୍ରେରଣାର ଉତ୍ସ ହେବ ବୋଲି ସେ ମତ ରଖିଥିଲେ ।
ମୁଖ୍ୟ ବକ୍ତା ଭାବେ ଫକୀରମୋହନ ବିଶ୍ୱବିଦ୍ୟାଳୟ କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀ ଯୋଗଦେଇ ଲୁକ୍କାୟିତ ଅବସ୍ଥାରେ ଥିବା ପ୍ରତିଭାଙ୍କୁ ଚିହ୍ନାଇବାରେ ‘ପ୍ରମେୟ’ର ଉଦ୍ୟମ ନିଆରା । ଏହି ମଞ୍ଚ ସେହିଭଳି ମାନ୍ୟ ବ୍ୟକ୍ତିବିଶେଷ ଓ ଅନୁଷ୍ଠାନକୁ ସମ୍ମାନିତ କରି ଗଣମାଧ୍ୟମର ସାମାଜିକ ଧର୍ମ ପାଳନ କରିପାରିଛି ବୋଲି ମତ ପ୍ରକାଶ କରିଥିଲେ ।
ବାଲେଶ୍ୱର ସଂସ୍କରଣ ମୁଖ୍ୟ କମଳାକାନ୍ତ ପତିଙ୍କ ତତ୍ତ୍ୱାବଧାନରେ ଅନୁଷ୍ଠିତ ଏହି ଉତ୍ସବରେ ପ୍ରମେୟର ସମସ୍ତ କର୍ମଚାରୀ ସହଯୋଗ କରିଥିଲେ । ଏଥିରେ ନୃତ୍ୟାନୁଷ୍ଠାନ ‘ନାଚ୍’ର କଳାକାରମାନେ ନୃତ୍ୟ ପରିବେଷଣ କରିଥିଲେ । ସୁରେଶ, ଶ୍ୱେତାଙ୍କ ସଙ୍ଗୀତ ଦର୍ଶକଙ୍କୁ ମତୁଆଲା କରିଥିଲା । ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ୧୨ ଜଣ ପ୍ରତିଭାଙ୍କୁ ଉତ୍କର୍ଷ-୨୦୨୫ ସମ୍ମାନରେ ସମ୍ମାନିତ କରାଯାଇଥିଲା । 
ସେହିଭଳି ଉତ୍କଳ ଦିବସ ଅବସରରେ ଭଦ୍ରକ ଓ ବାଲେଶ୍ୱରର ସ୍କୁଲ ଛାତ୍ରଛାତ୍ରୀଙ୍କୁ ନେଇ ଆୟୋଜିତ ବିତର୍କ ପ୍ରତିଯୋଗିତାର ଶ୍ରେଷ୍ଠ ୧୪ ଜଣ ପ୍ରତିଯୋଗୀଙ୍କୁ ଅତିଥିଙ୍କ ଦ୍ୱାରା ସମ୍ମାନିତ କରାଯାଇଥିଲା । ଉପସ୍ଥାପିକା ପାୟଲ ମଞ୍ଚ ପରିଚାଳନା କରିଥିବାବେଳେ ନ୍ୟୁଜ-୭ ବ୍ୟୁରୋ ମୁଖ୍ୟ ସର୍ବେଶ୍ୱର ନାଥ ଧନ୍ୟବାଦ ଅର୍ପଣ କରିଥିଲେ ।
