ମାଲକାନଗିରି/ମାଥିଲି, ୨୪/୩ ଜଙ୍ଗଲ ମଧ୍ୟରେ ଥିବା ଏକ ଗଛରୁ ଜଣେ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ପୁଲିସ ଓ ସାଇଣ୍ଟିଫିକ ଟିମର ତଦନ୍ତ ଆରମ୍ଭ ହୋଇଛି । ସୂଚନା ଯୋଗ୍ୟ ଯେ ମାଲକାନଗିରି ଜିଲ୍ଲା ମାଥିଲି ଥାନାସ୍ଥ ସାଲିମି ପଂଚାୟତ ଅନ୍ତର୍ଗତ ନୂଆଗୁଡା ଗ୍ରାମ ଜଙ୍ଗଲରେ ଜଣେ ଯୁବକ ରସି ଲଗାଇ ଆତ୍ମହତ୍ୟା କରିଥିବା ସୂଚନା ମିଳିଛି । ମୃତକ ଯୁବକ ହେଉଛନ୍ତି କିଆଙ୍ଗ ପଞ୍ଚାୟତ କଷିଗୁଡା ଗ୍ରାମର ଘନ ପୂଜାରୀ (୨୦) ବୋଲି ଜଣା ପଡ଼ିଛି । ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇଥିବା କିଛି ଲୋକ ଏହା ଦେଖି ଗ୍ରାମବାସୀଙ୍କୁ ଜଣାଇଥିଲେ । ଗ୍ରାମବାସୀ ମାଥିଲି ଥାନାକୁ ଜଣାଇବା ପରେ ମାଥିଲି ଥାନା ଅଧିକାରୀ ଘଟଣା ସ୍ଥଳରେ ସଦଳବଳେ ପହଞ୍ଚିଥିଲେ । ପୋଲିସ ଶବ ଜବତ କରିବା ସହିତ ସାଇଣ୍ଟିଫିକ ଟିମକୁ ଜଣାଇଛି । ତଦନ୍ତ ପରେ ଶବ ବ୍ୟବଛେଦ ନିମନ୍ତେ ପଠାଯିବ ବୋଲି ପୋଲିସ କହିଛି।