ନୂଆଦିଲ୍ଲୀ:  ଭାରତୀୟ ଗ୍ରାଣ୍ଡମାଷ୍ଟର ଡି ଗୁକେଶ ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଛନ୍ତି । ଆଗମୀ ବିଶ୍ୱ ଚେସ ଚାମ୍ପିୟନସିପରେ ଜିତିବା ପାଇଁ ଗୁକେଶଙ୍କୁ ଅଭିନନ୍ଦନ ଜଣାଇଛନ୍ତି ପ୍ରଧାନମନ୍ତ୍ରୀ । ଏହି ସମୟରେ ଗୁକେଶଙ୍କ ସହ ତାଙ୍କ ବାପା ଓ ମା ମଧ୍ୟ ଉପସ୍ଥିତ ଥିଲେ। ସୂଚନା ମୁତାବକ, ଚଳିତ ମାସରେ ଗୁକେଶ ବିଶ୍ୱ ଚେସ୍ ଚାମ୍ପିୟନସିପର ୧୪ତମ ଓ ଶେଷ ପର୍ଯ୍ୟାୟରେ ଚୀନର ଚେସ ମାଷ୍ଟର ଡିଙ୍ଗ ଲିରେନଙ୍କୁ ହରାଇ ଏହି ଗୈରବକୁ ନିଜ ନାମରେ ସ୍ଥାପିତ କରିଥିଲେ। ଏହି କ୍ରମରେ ସେ ବିଶ୍ୱର ସର୍ବକନିଷ୍ଠ ଚେସ୍ ଚାମ୍ପିୟନ ହୋଇପାରିଛନ୍ତି।

ଗୁକେଶଙ୍କ ସହ ସାକ୍ଷାତକାର ସମୟର ଫଟୋକୁ ପିଏମ ମୋଦିଙ୍କ ନିଜ ଏକ୍ସ ହ୍ୟାଣ୍ଡେଲରେ ସେୟାର କରିଛନ୍ତି। “ଚେସ୍ ଚାମ୍ପିୟନ ଓ ଭାରତର ଗୈରବ ଗୁକେଶଙ୍କ ସହ ବହୁତ ସମୟ କଟିଲା। କିଛି ବର୍ଷ ହେବ ମୁଁ ତାଙ୍କ ସହ ଲଗାତାର ସମ୍ପର୍କରେ ଅଛି। ତାଙ୍କର ଦୃଢ ସଂକଳ୍ପ ଓ ସମର୍ପଣର ଭାବ ମତେ ସବୁଠୁ ଅଧିକ ପ୍ରଭାବିତ କରିଛି। ତାଙ୍କର ଆତ୍ମବିଶ୍ୱାସ ସତରେ ବହୁତ ପ୍ରେରଣାଦାୟୀ । ମତେ କିଛି ବର୍ଷ ପୂର୍ବର ତାଙ୍କର ଏକ ଭିଡିଓ ମନେଅଛି, ଯେଉଁଥିରେ ସେ କହୁଥିଲେ ସେ ବିଶ୍ବର ସର୍ବ କନିଷ୍ଠ ୱାର୍ଲ୍ଡ ଚାମ୍ପିୟନ ବନିବାର ଲକ୍ଷ୍ୟ ରଖିଛନ୍ତି। ଯାହା ତାଙ୍କର ନିରନ୍ତର ଚେଷ୍ଟା ଫଳରେ ସମ୍ଭବ ହୋଇପାରିଛି” ବୋଲି ପିଏମ ମୋଦି ଏହି ପୋଷ୍ଟରେ ଉଲ୍ଲେଖ କରିଛନ୍ତି। 

ଏହି ସାକ୍ଷାତକାର ସମୟରେ ଗୁକେଶ ନିଜ ସାଥିରେ ଆଣିଥିବା ଏକ ଚେସ ବୋର୍ଡ ମୋଦିଙ୍କୁ ଉପହାର ସ୍ୱରୁପ ଦେଇଥିଲେ। ଏହି ଚେସ ବୋର୍ଡରେ ଗୁକେଶଙ୍କ ଦସ୍ତଖତ ମଧ୍ୟ ରହିତିଲା। ଏହି ଚେସ ବୋର୍ଡରେ ଖେଳି ଗୁକେଶ ବିଶ୍ୱ ବିଜେତା ଟାଇଟଲ ହାସଲ କରିଥିଲେ।  

ଡି ଗୁକେଶ ଚେସ୍ ବିଶ୍ୱର ସର୍ବକନିଷ୍ଟ ବିଶ୍ୱ ବିଜେତା ହେବାର ମୁକୁଟ ହାସଲ କରିଛନ୍ତି। ଗୁକେଶଙ୍କ ପୂର୍ବରୁ ଋଷର ମହାନ ଚେସ୍ ଖେଳାଳି କାସ୍ପାରୋବଙ୍କ ନିକଟରେ ବିଶ୍ବର ସର୍ବକନିଷ୍ଠ ବିଶ୍ୱ ବିଜେତା ହେବାର ଗୈରବ ରହିଥିଲା। ସେ ୧୯୮୫ ମସିହାରେ ଅନାତେଲି କାପୋର୍ବଙ୍କୁ ୨୨ ବର୍ଷ ବୟସରେ ହରାଇ ଏହି ମୁକୁଟ ହାସଲ କରିଥିଲେ। 

ସୁଚନା ମୁତାବକ ଗୁକେଶ ୱାର୍ଲ୍ଡ ଚେସ ଚାମ୍ପିୟନ ହାସଲ କରିଥିବା ଭାରତର ଦ୍ୱିତୀୟ ଖେଳାଳି। ଭାରତର ପ୍ରଥମ ଖେଳାଳି ଭାବେ ବିଶ୍ୱନାଥନ ଆନନ୍ଦଙ୍କ ନାମରେ ବିଶ୍ୱ ବିଜେତା ଟାଇଟେଲ ରହିଛି। ବିଶ୍ୱନାଥନ 5 ଥର ବିଶ୍ୱ ବିଜେତା ଟାଇଟେଲ ନିଜ ନାମରେ କରିଛନ୍ତି। ଶେଷଥର ପାଇଁ ବିଶ୍ୱନାଥନ ୨୦୧୩ ମସିହାରେ ଏହି ମୁକୁଟ ହାସଲ କରିଥିଲେ। ଏହାସହ ଗୁକେଶ ବିଶ୍ୱନାଥନ ଆନନ୍ଦଙ୍କ କ୍ଲବରେ ମଧ୍ୟ ସାମିଲ ହୋଇଯାଇଛନ୍ତି ।