ସିଙ୍ଗାପୁର,୦୮/୧୨: ଡିଫେଣ୍ଡିଂ ଚାମ୍ପିଅନ୍ ଡିଙ୍ଗ୍ ଲିରେନ୍ ଓ ଭାରତର ଡି. ଗୁକେଶଙ୍କ ମଧ୍ୟରେ ଚାଲିଥିବା ବିଶ୍ୱ ଚେସ୍ ଚାମ୍ପିଅନସିପ୍ ମୁକାବିଲାର ଦଶମ ରାଉଣ୍ଡ୍ ଡ୍ର’ ହୋଇଛି । ଫଳରେ ଉଭୟ ଖେଳାଳି ପଏଣ୍ଟ ଭାଗ କରିଛନ୍ତି ଏବଂ ସ୍ଥିତି ୫-୫ ପଏଣ୍ଟରେ ବରାବର ରହିଛି । ଏହି ମୁକାବିଲାରେ କ୍ରମାନ୍ୱୟରେ ୭ଟି ରାଉଣ୍ଡ୍ ଡ୍ର’ ହୋଇଛି । ଆଉ ୪ ରାଉଣ୍ଡ୍ ଖେଳ ବାକି ଅଛି । ଯଦି ମ୍ୟାଚ୍ ଅମୀମାଂସିତ ରହେ ତା’ହେଲେ ଉଭୟଙ୍କ ମଧ୍ୟରେ ଟାଇବ୍ରେକ୍ ଖେଳାଯିବ ।
ଲିରେନ ଶନିବାର ଧଳା ଗୋଟିରେ ଲଣ୍ଡନ ସିଷ୍ଟମ ରଣନୀତିରେ ଖେଳ ଆରମ୍ଭ କରିଥିଲେ । କ୍ୟାଣ୍ଡିଡେଟ୍ସ ଚାମ୍ପିଅନ୍ ଗୁକେଶ ତାଙ୍କୁ କଡ଼ା ଜବାବ ଦେଇଥିଲେ । ଦଶମ ଗୋଟି ଚାଳନାରେ ଗୁକେଶ ୨୬ମିନିଟ୍ ଅପଚୟ କରିଥିଲେ ହେଁ ଏହା ତାଙ୍କ ଉପରେ କୌଣସି ପ୍ରଭାବ ପକାଇନଥିଲା । ଶେଷରେ ୩୬ଟି ଗୋଟି ଚାଳନା ପରେ ଉଭୟ ପଏଣ୍ଟ ଭାଗ କରିଥିଲେ ।
