କେନ୍ଦ୍ରାପଡ଼ା,୧୭/୦୭: କେନ୍ଦ୍ରାପଡାରେ ଜନବସତି ମୁହାଁ କୁମ୍ଭୀର । ଭୟଭୀତ ସ୍ଥାନୀୟଲୋକ । ଏହାରି ଭିତରେ ଦେଖିବାକୁ ମିଳିଛି ଏକ ଅଜବ ଦୃଶ୍ୟ । ରାଜନଗର ବ୍ଲକ ଖୋଳା ନିକଟରେ ନଦୀରୁ ଉଠି ବିଦ୍ୟୁତ ଖୁଣ୍ଟ ଉପରକୁ ଚଢିଲା କୁମ୍ଭୀର । ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

ସୂଚନା ଅନୁଯାୟୀ, ଏବେ ଚାଲିଛି କୁମ୍ଭୀର ପ୍ରଜନନ ଋତୁ। ରାଜନଗର ବ୍ଲକ ବିଶ୍ଵ ପ୍ରସିଦ୍ଧ ଭିତରକନିକାରେ ଚଳିତବର୍ଷ ବଉଳା କୁମ୍ଭୀର ମାନେ ୧୧୪ଟି ବସା କରିଛନ୍ତି । ବଉଳା କୁମ୍ଭୀର ଜନବସତିକୁ ପଶି ଆସି ଅନେକ ଥର ଲୋକ ଓ ଗୃହ ପାଳିତ ପଶୁଙ୍କୁ ଆକ୍ରମଣ କରିବାର ପୂର୍ବରୁ ଦେଖିବାକୁ ମିଳିଛି । ସାଧାରଣତଃ କୁମ୍ଭୀର ପୋଖରୀ, ନଦୀ ଏବଂ ନାଳରେ ଦେଖିବାକୁ ମିଳିଥାନ୍ତି ।  କିନ୍ତୁ ପ୍ରଥମ ଥର ପାଇଁ କୁମ୍ଭୀର ବିଦ୍ୟୁତ ଖୁଣ୍ଟ ଉପରକୁ ଚଢିଛି । ଏହା ଦେଖି ପିଲାମାନେ ଭିଡିଓ କରିବା ସହିତ ହୋହାଲ୍ଲା କରିଛନ୍ତି । ଭିତରକନିକା ଜାତୀୟ ଉଦ୍ୟାନ ମଧ୍ୟରେ ପ୍ରଭାହିତ ପାଟଶାଳ ନଦୀରୁ କୁମ୍ଭୀର ଛୁଆ ଉଠିଆସି ୨୫ ଫୁଟ ଉଚ୍ଚ ବିଦ୍ୟୁତ ଖୁଣ୍ଟ ଉପରେ ଚଢି ଯାଇଥିଲା । ବର୍ତ୍ତମାନ ଏହାର ଭିଡିଓ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଏନେଇ ସ୍ଥାନୀୟଲୋକ ବନ ବିଭାଗକୁ ସୂଚନା ଦେଇଛନ୍ତି ।