ଜଳେଶ୍ୱର, ୨୦।୭: ରାଜ୍ୟପାଳଙ୍କ ପୁଅ ଲଳିତ କୁମାର ଏବଂ ତାଙ୍କ ୫ ଜଣ ସହଯୋଗୀଙ୍କୁ ତୁରନ୍ତ ଗିରଫ କରିବାକୁ ଦାବି । ନୈତିକତା ଦୃଷ୍ଟିରୁ ରାଜ୍ୟପାଳଙ୍କ ଇସ୍ତଫା ଦାବିରେ ଶନିବାର ପୂର୍ବାହ୍ନରେ ପୋଲିସ ମହାନିର୍ଦ୍ଦେଶକ, ଓଡ଼ିଶା(D.G.)ଙ୍କୁ ଜଳେଶ୍ୱର ଏସ୍.ଡି.ପି.ଓ. ଶ୍ରୀଯୁକ୍ତ ଦିଲ୍ଲୀପ ସାହୁଙ୍କ ଜରିଆରେ ସି.ପି.ଆଇ.ଏମ୍. ର ପ୍ରତିନିଧିଦଳ ଦାବିପତ୍ର ପ୍ରଦାନ କରିଛନ୍ତି । 

ଚଳିତ ଜୁଲାଇ ୭ ତାରିଖରେ ଲଳିତ କୁମାର ଏବଂ ତାଙ୍କର ୫ ସହଯୋଗୀ କାର୍ଯ୍ୟରତ ଏ.ଏସ୍.ଓ ବୈକୁଣ୍ଠ ପ୍ରଧାନଙ୍କୁ ମାଡ଼ ମାରିବା ଓ ଜୀବନରୁ ମାରିଦେବା ଧମକ ଦେଇଥଲେ । ଏହି ଘଟଣାକୁ ୧୪ଦିନ ବିତିଯାଇଥିଲେ ମଧ୍ୟ ପୋଲିସ ଏତଲାକୁ ପଞ୍ଜିକରଣ ନକରି ନିରବଦ୍ରଷ୍ଟା ସାଜିବା ଦ୍ୱାରା ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଛି । ଦୋଷୀମାନଙ୍କ ଉପରେ କାର୍ଯ୍ୟନୁଷ୍ଠାନ ନକରି ଏ.ଏସ୍.ଓ ବୈକୁଣ୍ଠ ପ୍ରଧାନକୁ ବଦଳି କରାଯାଇଛି । ରାଜ୍ୟପାଳ ନିଜ ପୁଅକୁ ଘଣ୍ଟ ଘଉଡ଼ାଉଥିବା ଏବଂ ଗୃହ ବିଭାଗର ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ଏଭଳି ଏକ ସମ୍ବେଦନଶୀଳ ଘଟଣାରେ ନିରବ ରହିବା ଯୋଗୁଁ ସାରା ରାଜ୍ୟରେ ଏକ ଖରାପ ନଜର ସୃଷ୍ଟି କରିଛି । 

ରାଜଭବନର ଗାରିମାକୁ ନଷ୍ଟ କରିଥିବା ରାଜ୍ୟପାଳ ନୈତିକତା ଦୃଷ୍ଟିରୁ ଇସ୍ତଫା ଦେବା ଆବଶ୍ୟକ । ଓଡ଼ିଶା ପୋଲିସ ମହାନିର୍ଦ୍ଦେଶକ ନିରପେକ୍ଷତା ଅବଲମ୍ବନ କରି ଦୋଷୀମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଆଶା ରଖିଛନ୍ତି ସି.ପି.ଆଇ.ଏମ୍. ଦଳ । ନଚେଚ୍ ଆଗାମୀ ଦିନରେ ସି.ପି.ଆଇ.ଏମ୍. ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବ ବୋଲି ପ୍ରତିନିଧିଦଳ ଚେତାବନୀ ଦେଇଛନ୍ତି ।