କାଶୀପୁର - କାଶୀପୁର ବ୍ଲକ ସୀମାନ୍ତ ସିଙ୍ଗାରାମ ରେଳ ଷ୍ଟେସନ ନିକଟରେ ଏକ ଅଭାବନୀୟ ଘଟଣା ଘଟିଛି। ଆଜି ଅପରାହ୍ନରେ ଚଳନ୍ତା ଟ୍ରେନରୁ ଓହ୍ଲାଉ ଥିବା ପତିପତ୍ନୀ ଦୁହେଁ ତଳେ ପଡ଼ି ଗୁରୁତର ହୋଇଛନ୍ତି। ଆହତ ଦମ୍ପତିଙ୍କୁ ରେଳ କର୍ମଚାରୀଙ୍କ ସହ ସମ୍ପର୍କୀୟ ଲୋକ ଉଦ୍ଧାର କରି ନିକଟସ୍ଥ ଉତ୍କଳ ହସ୍ପିଟାଲରେ ଭର୍ତ୍ତି କରିଥିଲେ। ଉତ୍କଳ ହସ୍ପିଟାଲରେ ଚିକିତ୍ସିତ ହେଉଥିବା ପତି- ପତ୍ନୀ ଦୁହେଁ ଲକ୍ଷ୍ମୀପୁର ବ୍ଲକ ଓଡ଼ିଆପେଣ୍ଠ ପଞ୍ଚାୟତ ଅନ୍ତର୍ଗତକୁମ୍ଭାର ଗୁଡ଼ାଗ୍ରାମର ଝାଲି ରାମ କାଶୀ ଓ ତାଙ୍କ ପତ୍ନୀ ମାଳତୀ କାଶୀ ବୋଲି ଜଣା ଯାଇଛି।
ସ୍ୱାମୀ ସ୍ତ୍ରୀ ଦୁହେଁ କୌଣସି କାମରେ ଟିକିରି ଆସି ଥିଲେ। ଅପରାହ୍ନରେ ଘରକୁ ଫେରିବା ପାଇଁ ଟିକିରି ଷ୍ଟେସନରେ ଟ୍ରେନ ଅପେକ୍ଷାରେ ରହି ଥିଲେ। ଏହି ସମୟରେ ପୁରୀ ଠାରୁ ଜଗଦଲପୁର ଅଭିମୁଖେ ଯାଉ ଥିବା ସ୍ୱତନ୍ତ୍ର ଟ୍ରେନ ଟିକିରି ଷ୍ଟେସନରେ ଅଟକିବାରୁ ବିଶାଖାପାଟଣା-କୋରାପୁଟ ପାସେଞ୍ଜର ଟ୍ରେନ ଭାବି ରେଳଗାଡ଼ିରେ ଚଢ଼ି ଯାଇଥିଲେ। କିନ୍ତୁ ଜଗଦଲପୁର ଅଭିମୁଖେ ଯାଉଥିବା ସ୍ୱତନ୍ତ୍ର ଟ୍ରେନ ସିଙ୍ଗାରାମ ଷ୍ଟେସନରେ ବେଗକୁ ହ୍ରାସ କରି ଥିଲେ ସୁଦ୍ଧା ଅଟକି ନ ଥିଲା ।
ତରତର ହୋଇ ଝାଲି ରାମ ଏବଂ ତାଙ୍କ ପତ୍ନୀ ଟ୍ରେନରୁ ଓହ୍ଲାଇବା ବେଳେ ତଳେ ପଡ଼ି ଗୁରୁତର ହୋଇ ଥିବା ଜଣା ଯାଇଛି। ଖବର ପାଇ ଆହତଙ୍କ ପରିବାର ଉତ୍କଳ ହସ୍ପିଟାଲରେ ପହଞ୍ଚିଛନ୍ତି।