ଲମତାପୁଟ, ୨୦/୦୧ : କୋରାପୁଟ ଜିଲ୍ଲା ଲମତାପୁଟ ବ୍ଲକରେ ହାଡ଼ଭଙ୍ଗା ଶୀତ। ବିଭିନ୍ନ ସ୍ଥାନରେ ତୁଷାରପାତ ହେଉଛି। ସପ୍ତାହେ ଧରି ଧୀରେ ଧୀରେ ପାରଦ ଉପରମୁହାଁ ହେଉଥିବା ବେଳେ ଆଜି ଅଚାନକ ପାରଦ ୪ଡିଗ୍ରୀ ଖସିଛି। ଲମତାପୁଟରେ ଦିନବେଳା ତାପମାତ୍ରା ୧୦ ରୁ ୧୨ ଡିଗ୍ରୀ ରହୁଥିବା ବେଳେ ସୁଲୁସୁଲୁଆ ପବନ ଜନଜୀବନ ଅସ୍ତବ୍ୟସ୍ତ କରିଛି।
ସୂଚନାନୁଯାୟୀ ଦିନ ୧୦ଟା ପର୍ଯ୍ୟନ୍ତ କୁହୁଡ଼ି ସାରା ଅଞ୍ଚଳକୁ ଢାଙ୍କି ରଖୁଛି। ଶୀତ ଦାଉରୁ ରକ୍ଷା ପାଇବା ପାଇଁ ଲୋକମାନେ ନିଆଁ ଜାଳି ବସୁଛନ୍ତି। ସକାଳୁ ସକାଲୁ ଚା ଦୋକାନରେ ଭିଡ଼ ଜମୁଛି। ଆଉ କିଛି ଲୋକ ବ୍ୟାୟାମ କରି ଶୀତ ଛଡାଉଛନ୍ତି। ସେପଟେ ଘନ କୁହୁଡ଼ି ଯୋଗୁଁ ଯାତାୟତ ବାଧାପ୍ରାପ୍ତ ହେଉଛି। ୫ ମିଟର ଦୂରତା ଭିଜିବିଲିଟି ଥିବାରୁ ଗାଡି ମଟର ଗୁଡ଼ିକ ଦୁର୍ଘଟଣାର ଶିକାର ହେଉଛନ୍ତି।
ଏହି ଖବରଟିକୁ ପଢନ୍ତୁ-ଜାଡ଼ରେ ଥରୁଛି ଓଡ଼ିଶା, ଶୀତ ଆହୁରି ୪ରୁ ୫ ଦିନ କରିବ କଲବଲ: ଦୁଇ ଦିନ କୁହୁଡି ସମ୍ଭାବନା
ପ୍ରକାଶ ଥାଉକି, ଆଜି ରାଜ୍ୟରେ କୁହୁଡ଼ି ଦୃଶ୍ୟମାନ ହୋଇଛି। ସୋମବାର ଖୋର୍ଦ୍ଧା, ପୁରୀ, ଜଗତ୍ସିଂହପୁର, କେନ୍ଦ୍ରାପଡ଼ା, ନୟାଗଡ଼, କଳାହାଣ୍ଡି, କନ୍ଧମାଳ, ସୁନ୍ଦରଗଡ଼, କୋରାପୁଟ ଓ କଟକରେ ସ୍ୱଳ୍ପରୁ ମଧ୍ୟମ ଧରଣର କୁହୁଡ଼ି ଦେଖିବାକୁ ମିଳିଛି। ମଙ୍ଗଳବାର ଗଞ୍ଜାମ, ଗଜପତି, ପୁରୀ, ଖୋର୍ଦ୍ଧା, କଟକ, ଜଗତ୍ସିଂହପୁର, କେନ୍ଦ୍ରାପଡ଼ା, ନୟାଗଡ଼, କଳାହାଣ୍ଡି, କନ୍ଧମାଳ ଓ ସୁନ୍ଦରଗଡ଼ରେ ସ୍ୱଳ୍ପରୁ ମଧ୍ୟମ ଧରଣର କୁହୁଡ଼ି ଦୃଶ୍ୟମାନ ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ଜି. ଉଦୟଗିରିରେ ରାତି ତାପମାତ୍ରା ୫ ଡିଗ୍ରୀ ତଳକୁ ଖସିଛି । ଏଠାରେ ପାରଦ ୪.୮ ଡିଗ୍ରୀ ସେଲସିୟସ୍ ରେକର୍ଡ ହୋଇଛି । ସେମିଳିଗୁଡ଼ାରେ ୭.୨, ଦାରିଙ୍ଗିବାଡ଼ି ଓ ଝାରସୁଗୁଡ଼ାରେ ୯ ଡିଗ୍ରୀ, ରାଉରକେଲାରେ ୯.୫, ଭଦ୍ରକରେ ୧୦, କେନ୍ଦୁଝରରେ ୧୦.୪, କୋରାପୁଟରେ ୧୦.୫, ଭବାନୀପାଟଣାରେ ୧୦.୬ ଡିଗ୍ରୀ ରେକର୍ଡ ହୋଇଛି । ଆସନ୍ତା ୪ରୁ ୫ ଦିନ ଯାଏ ରାଜ୍ୟରେ ଶୀତ ଜାରି ରହିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି ।
