ଗୋପାଳପୁର ୧୫/୩ ; ତଟ ସୁରକ୍ଷାର ବାର୍ତ୍ତା ନେଇ ଦୀର୍ଘ ୬ ହଜାର ୫୫୩ କିଲୋମିଟରର ସାଇକେଲ ଶୋଭାଯାତ୍ରାର ଉଦ୍ଦେଶ୍ୟ ନେଇ କଲିକତାରୁ ବାହାରିଥିବା ସିଆଇଏସଏଫ ଯବାନ ଶନିବାର ଗୋପାଳପୁରରେ ପହଞ୍ଚିଥିଲେ। ଏହି ଦଳକୁ ସ୍ବାଗତ ଜଣାଇବା ପାଇଁ ବିଭାଗ ପକ୍ଷରୁ ଏକ କାର୍ଯ୍ୟକମ ଆୟୋଜିତ କରାଯାଇଥିଲା। ରାଜ୍ୟ ଖଣି ଇସ୍ପାତ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ଯୋଗ ଦେଇ ଯବାନମାନଙ୍କୁ ସ୍ବାଗତ ଜଣାଇ ଥିଲେ। ରାଷ୍ଟ୍ରର ତଟୀୟ ସୁରକ୍ଷା ପାଇଁ ସଚେତନତା ସୃଷ୍ଟି କରାଇବା ଲକ୍ଷ୍ୟରେ ଭାରତୀୟ ଯବାନମାନଙ୍କ ସାଇକେଲ ଚାଳନା ଦେଶବାସୀ ଙ୍କୁ ସୁରକ୍ଷା ଦେବା ପାଇଁ ବଦ୍ଧ ପରିକର ରହିଥିବାର ବାର୍ତ୍ତା ପହଞ୍ଚାଇ ପାରିଥିବା ମତପୋଷଣ ସହ ଏଭଳି କାର୍ଯ୍ୟକୁ ପ୍ରଶଂସା କରିଥିଲେ।
ସିଆଇଏସଏଫର ୫୬ ତମ ପ୍ରତିଷ୍ଠା ଦିବସ ଅବସରରେ ଗତ ମାର୍ଚ୍ଚ ମାସ ୭ ତାରିଖରେ ଏହି ସାଇକେଲ ଶୋଭଯାତ୍ରାର ଶୁଭାରମ୍ଭ କରିଥିଲେ ଗୃହରାଷ୍ଟ୍ରମନ୍ତ୍ରୀ ଅମିତ ଶାହା । ଦୁଇଟି ଟିମରେ ବିଭକ୍ତ ହୋଇଥିବା ବେଳେ ଗୋଟିଏ ଟିମ ଗୁଜୁରାଟରୁ ବାହାରିଥିବା ବେଳେ ଅନ୍ୟ ଏକ ଟିମ୍ କଲିକତାରୁ ବାହାରିଥିଲା । କଲିକତାରୁ ବାହାରିଥିବା ଟିମ୍ ଶନିବାର ଗୋପାଳପୁରରେ ପହଞ୍ଚିଥିଲା । ଗୋପାଳପୁରେ ପହଞ୍ଚିବା ପରେ ଏକ କାର୍ଯ୍ୟକ୍ରମର ଆୟୋଜନ କରାଯାଇଥିଲା । କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ବ୍ରହ୍ମପୁର ଏସପି ଡ଼ା.ସ୍ରବଣା ବିବେକ ଏମ, ଅର୍ଜୁନ ଆଓ୍ବାଡ଼ି ଭାରୋତ୍ତଳକ କେ.ରବି କୁମାର ଓ ବ୍ରହ୍ମପୁର ଫିଜିକାଲ ଏକାଡ଼େମୀର ମୁଖ୍ୟ ସୀମାଞ୍ଚଳ ବାରିକ ଯୋଗ ଦେଇଥିଲେ ।
ଗୋପାଳପୁରରୁ ପୁଣି ଏହି ଦଳ କନ୍ୟାକୁମାରୀ ପର୍ଯ୍ୟନ୍ତ ସାଇକେଲ ଶୋଭଯାତ୍ରାର ଶୁଭାରମ୍ଭ କରିଥିଲେ ବାଣିଜ୍ୟ ଓ ପରିବହନ ମନ୍ତ୍ରୀ ।ଏହି ଅବସରରେ ନିଜେ ମନ୍ତ୍ରୀ ବିଭୂତି ଜେନା ଗୋପାଳପୁର ରୁ ଡୁରା ଛକ ପର୍ଯ୍ୟନ୍ତ ସାଇକେଲ ଚଳାଇ ଯବାନ ମାନଙ୍କ ମନୋବଳ ବଢାଇଥିଲେ।ମନ୍ତ୍ରୀଙ୍କ ସହ ଏସପି ମଧ୍ୟ ସାଇକେଲ ଚଳାଇ କିଛି ଦୂର ରାସ୍ତା ଯାତ୍ରା କରିଥିଲେ । ଏହି ଦୁଇଟି ଟିମ ଗତ ମାର୍ଚ୍ଚ ମାସ ୭ ତାରିଖରୁ ବାହାରିଥିବା ବେଳେ ୨୫ ଦିନ ମଧ୍ୟରେ ନିଜର ଯାତ୍ରା ତଥା ୬୫୫୩ କିଲୋମିଟର ଯାତ୍ରା ଅତିକ୍ରମ କରିବ । ପ୍ରତିଦିନ ଏହି ଟିମ୍ ୧୨୦ କିଲୋମିଟର ପର୍ଯ୍ୟନ୍ତ ସାଇକେଲ ଚଳାଇ ଯାତ୍ରା କରିବେ । ବିଶେଷ କରି ତଟ ସୁରକ୍ଷା ସହ ଦେଶ ସେବାରେ ସମସ୍ତେ ବ୍ରତୀ ହେବାର ବାର୍ତ୍ତା ନେଇ ବାହାରିଛି ଏହି ସାଇକେଲ ଶୋଭାଯାତ୍ରା । ଏହି ଅବସରରେ ସିଆଇଏସଏଫର ବହୁ ବରିଷ୍ଠ ଅଧିକାରୀ ମାନେ ମଧ୍ୟ ସାମିଲ ଥିଲେ ।
