କୋରାପୁଟ, ୧୮/୦୮: ମଧ୍ୟାହ୍ନ ଭୋଜନରେ ପିଲାଙ୍କୁ ଦିଆଯାଉଥିଲା ନିମ୍ନମାନର ଖାଦ୍ୟ । ଅଭିଯୋଗ ପରେ ଖାଦ୍ୟର ମାନ ଯାଞ୍ଚ କଲେ ଲକ୍ଷ୍ମୀପୁର ବିଧାୟକ ପବିତ୍ର ସାଉଁନ୍ତା । ଲକ୍ଷ୍ମୀପୁର ବ୍ଳକ ଅନ୍ତର୍ଗତ ଧରଡ଼ାରେ ଥିବା ସରକାରୀ ଉନ୍ନତ ଉଚ୍ଚ ବିଦ୍ୟାଳୟରେ ଏଭଳି ଦୃଶ୍ୟ ଦେଖିବାକୁ ମିଳିଛି ।
ସୂଚନା ଅନୁଯାୟୀ, ବିଦ୍ୟାଳୟର ଛାତ୍ରଛାତ୍ରୀଙ୍କୁ ଭାତ ସହ ନିମ୍ନମାନର ଡାଲି ଦିଆଯାଉଥିବା ନେଇ ଅଭିଯୋଗ ହୋଇଥିଲା । ଏହି ଘଟଣାର ଯାଞ୍ଚ କରିଥିଲେ ଲକ୍ଷ୍ମୀପୁର ବିଧାୟକ ପବିତ୍ର ସାଉଁନ୍ତା । ଏତେ ନିମ୍ନମାନର ଖାଦ୍ୟ ଦିଆଯାଉଥିଲା ଯେ, ଛାତ୍ରଛାତ୍ରୀ ଏହାକୁ ଖାଇ ନପାରି ଫିଙ୍ଗି ଦେଉଥିବା ବିଧାୟକ ଦେଖିବାକୁ ପାଇଥିଲେ । ଏଥିସହିତ କୋରାପୁଟ ଜିଲ୍ଲାପାଳ ଏବଂ କୋରାପୁଟ ଗସ୍ତରେ ଥିବା ଉଚ୍ଚଶିକ୍ଷା ମନ୍ତ୍ରୀଙ୍କୁ ମଧ୍ୟ ଏହି ଖାଦ୍ୟ ଦେଖାଇଥିଲେ ।
ଅନ୍ୟପଟେ ଏନେଇ ଚିନ୍ତା ପ୍ରକାଶ କରିଥିଲେ ଉଚ୍ଚ ଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ । ବିଦ୍ୟାଳୟରେ ପାଠ ଠିକ୍ ଭାବରେ ପଢ଼ାଯାଉଛି କି ନାହିଁ, ତାହା ଉପରେ ମଧ୍ୟ ନଜର ପକାଇଥିଲେ ବିଧାୟକ । ଛାତ୍ରଛାତ୍ରୀଙ୍କୁ ବିଭିନ୍ନ ବିଷୟରେ ପ୍ରଶ୍ନ ପଚାରିଥିଲେ । ତେବେ ଅଧିକାଂଶ ଛାତ୍ରଛାତ୍ରୀ ସାମାନ୍ୟ ନିଜର ସ୍କୁଲର ନାଁ ବି ଠିକରେ ଲେଖିପାରିନଥିଲେ । ବିଦ୍ୟାଳୟରେ ଏକାଧିକ ସମସ୍ୟା ଥିବାରୁ ଏହାର ଯାଞ୍ଚ କରିବାକୁ କୋରାପୁଟ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ ମନ୍ତ୍ରୀ ସୂର୍ଯ୍ୟବଂଶୀ ସୂରଜ ।