ଜୟପୁର, ୨୫।୧୨: ରାଜସ୍ଥାନର କୋଟପୁତଲି-ବେହରର ଜିଲ୍ଲାରେ ପ୍ରାୟ ୭୦୦ ଫୁଟ୍ ଗଭୀର ବୋରୱେଲରେ ଜଣେ ୩ ବର୍ଷୀୟା ଶିଶୁ କନ୍ୟା ସୋମବାରଠାରୁ ଫସିରହିଛି । ଏନ୍ଡିଆର୍ଏଫ୍, ଏସ୍ଡିଆର୍ଏଫ୍ ଟିମ୍ର ଶତ ଚେଷ୍ଟା ପରେ ବି ଶିଶୁଟିକୁ ଉଦ୍ଧାର କରାଯାଇପାରିନାହିଁ । ଦେଶୀ ଯୋଗାଡ଼ ଏବଂ ଅନ୍ୟ ମାଧ୍ୟମରେ ଖବରଲେଖା ହେବା ସୁଦ୍ଧା ମାତ୍ର ୩୦ ଫୁଟ୍ ପର୍ଯ୍ୟନ୍ତ ହିଁ ଖୋଳାଯାଇଛି । ଭିତରକୁ ପଠାଯାଇଥିବା କ୍ୟାମେରାରେ ବି ଶିଶୁର ଗତିବିଧି ସ୍ପଷ୍ଟ ଦେଖାଯାଇପାରୁ ନାହିଁ । ଫଳରେ ପରିବାର ଲୋକେ ଚିନ୍ତାରେ ପଡ଼ିଛନ୍ତି । ଉଦ୍ଧାରକାର୍ଯ୍ୟରେ ପ୍ରଶାସନ ପକ୍ଷରୁ ଅବହେଳା କରାଯାଉଥିବା ଶିଶୁଟିର ଘର ଲୋକେ ଅଭିଯୋଗ ଆଣିଛନ୍ତି । ମେସିନ୍ରେ ଗାତ ଖୋଳାଯିବ ବୋଲି କୁହାଯାଉଥିଲେ ହେଁ ଏ ଯାଏ ମେସିନ୍ ସେଠାରେ ପହଞ୍ଚି ନ ଥିବା ସେମାନେ ପ୍ରକାଶ କରିଛନ୍ତି ।
ସୋମବାର ଅପରାହ୍ନ ପ୍ରାୟ ୨ଟାରେ ଶିଶୁ ଚେତନା ତାଙ୍କ ଜମିରେ ଖେଳୁଥିବା ବେଳେ ବୋରୱେଲ ଭିତରକୁ ଖସି ପଡ଼ିଥିଲା । ବୋର୍ୱେଲର ପ୍ରାୟ ୧୫୦ ଫୁଟ ଗଭୀରରେ ସେ ଫସି ଯାଇଥିଲା । ବୋର୍ୱେଲ ଭିତରୁ କାନ୍ଦ ଶବ୍ଦ ଶୁଣାଯିବା ପରେ ଚେତନା ତାହା ଭିତରେ ଖସି ପଡ଼ିଥିବା ପରିବାର ଲୋକେ ଜାଣିବାକୁ ପାଇଥିଲେ । ତାହା ମଧ୍ୟକୁ ଅକ୍ସିଜେନ ପାଇପ୍ ଛଡ଼ା ଯାଇଛି । ମାଟି ବେଶ୍ ଟାଣ ଥିବାରୁ ଖୋଳିବା କଷ୍ଟକର ହେଉଛି । ଉଦ୍ଧାରକାରୀ ଟିମ୍ ହୁକ୍ ଥିବା ରଡ୍ ସାହାଯ୍ୟରେ ଶିଶୁକୁ ବାହାର କରିବାକୁ ଚେଷ୍ଟା କରୁଛନ୍ତି । ସୋମବାର ବିଳମ୍ବିତ ରାତି ସୁଦ୍ଧା ଶିଶୁଟିକୁ ପ୍ରାୟ ୩୦ ଫୁଟ ଉପରକୁ ଅଣାଯାଇଛି । ତେବେ ହୁକ୍ ଲାଖିବାରୁ ଚେତନାଙ୍କୁ ସମ୍ପୂର୍ଣ୍ଣ ଭାବେ ବାହାର କରାଯାଇପାରି ନ ଥିଲା ।
