ଝାରସୁଗୁଡ଼ା,୦୩/୦୧: ରାଜସ୍ଥାନର ଜୟସଲମେର୍ଠାରେ ଅନୁଷ୍ଠିତ ଅର୍ଥମନ୍ତ୍ରୀଙ୍କ ସମ୍ମିଳନୀରେ ଝାରସୁଗୁଡ଼ାଠାରେ ଇଣ୍ଡଷ୍ଟ୍ରିଆଲ ପାର୍କ ପ୍ରତିଷ୍ଠା ଲାଗି ପ୍ରସ୍ତାବ ରଖାଯାଇଛି । ଦିଲ୍ଲୀ, ମୁମ୍ବାଇ, ସିଙ୍ଗାପୁରରେ ରୋଡ୍ ସୋ' କରି ରାଜ୍ୟରେ ଶିଳ୍ପ ବିକାଶ ଦିଗରେ ପଦକ୍ଷେପ ନିଆଯିବାକୁ ପ୍ରୟାସ କରାଯାଇଛି । ଶିଳ୍ପପତିମାନେ ଏ ଦିଗରେ ଆଗ୍ରହ ପ୍ରକାଶ କରିଛନ୍ତି । ଚଳିତ ମାସ ୨୮ ଓ ୨୯ ତାରିଖରେ ଶିଳ୍ପପତିମାନେ ଆସୁଛନ୍ତି । ରାଜ୍ୟରେ ୧୩ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ । ଯୁବକ ଯୁବତୀଙ୍କୁ ଚାକିରି ମିଳିବ । ଝାରସୁଗୁଡ଼ାରେ ଶିଳ୍ପ ଓ ବାଣିଜ୍ୟର ପ୍ରମୁଖ କେନ୍ଦ୍ର ହେବ ବୋଲି ଗୁରୁବାର ସନ୍ଧ୍ୟାରେ ଝାରସୁଗୁଡ଼ା ଜିଲ୍ଲା ମହୋତ୍ସବ ‘ଦୁଲ୍ଦୁଲି’ ଉଦ୍ଘାଟନ କରି ମୁଖ୍ୟମନ୍ତ୍ରୀ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏଭଳି ମତବ୍ୟକ୍ତ କରିଛନ୍ତି ।
‘ଦୁଲ୍ଦୁଲି ମଞ୍ଚ’ରୁ ମୁଖ୍ୟମନ୍ତ୍ରୀ ଶ୍ରୀ ମାଝୀ ବିରୋଧୀଙ୍କୁ ସମାଲୋଚନା କରିଥିଲେ । ଆଇଭରି ଟାୱାର୍ ଭିତରେ ରହି ବିଗତ ଦିନରେ ଶାସନ କରିଥିବା ଲୋକେ ଏବେ ମଇଦାନକୁ ଓହ୍ଲାଇବାକୁ ବାଧ୍ୟ ହେଉଛନ୍ତି । ୨୪ବର୍ଷ ଭିତରେ ଲୋକଙ୍କ ପାଇଁ କାମ କରିଥିଲେ ଆଜି ଏ ତିରସ୍କାର ମିଳି ନ ଥାନ୍ତା । ଏବେ ସେମାନେ ହତାଶା ଭିତରେ ରହିଛନ୍ତି ବୋଲି ମୁଖ୍ୟମନ୍ତ୍ରୀ ପୂର୍ବ ସରକାରକୁ କଡ଼ା ସମାଲୋଚନା କରିଥିଲେ । ଝାରସୁଗୁଡ଼ାବାସୀଙ୍କୁ ଗୁଣାତ୍ମକ ସ୍ୱାସ୍ଥ୍ୟସେବା ଯୋଗାଇ ଦେବା ଲାଗି ରାଜ୍ୟ ସରକାର ପ୍ରତିଶ୍ରୁତିବଦ୍ଧ । ଖୁବ୍ଶୀଘ୍ର ମଙ୍ଗଳବଜାରଠାରେ ୨୪ଘଣ୍ଟିଆ ସ୍ୱାସ୍ଥ୍ୟସେବା ଯୋଗାଇବା ଲାଗି ଡାକ୍ତରଖାନା ପ୍ରତିଷ୍ଠା ହେବ ବୋଲି ମୁଖ୍ୟମନ୍ତ୍ରୀ ଶ୍ରୀ ମାଝୀ ପ୍ରତିଶ୍ରୁତି ଦେଇଛନ୍ତି ।
ଏଥିପୂର୍ବରୁ ମୁଖ୍ୟମନ୍ତ୍ରୀ ଝାଡ଼େଶ୍ୱର ମନ୍ଦିରକୁ ଯାଇ ଠାକୁରଙ୍କୁ ଦର୍ଶନ କରିଥିଲେ । ସେଠାରେ ୨ କୋଟି ଟଙ୍କା ବ୍ୟୟରେ ପ୍ରସ୍ତାବିତ ଇକୋ ପାର୍କର ଶିଳାନ୍ୟାସ କରିଥିଲେ । ସାଂସଦ ପ୍ରଦୀପ ପୁରୋହିତ କହିଲେ, ଆଗେ ଲୋକେ ସରକାରକୁ ଖୋଜୁଥିଲେ । ମାତ୍ର ଏବେ ଲୋକଙ୍କ ପାଖରେ ମନ୍ତ୍ରୀମାନେ ପହଞ୍ଚି ସେବା କରୁଛନ୍ତି । ମୋହନ ମାଝୀ ଲୋକଙ୍କ ମୁଖ୍ୟମନ୍ତ୍ରୀ । ରାଜସ୍ୱ ମନ୍ତ୍ରୀ ସୁରେଶ ପୂଜାରୀ କହିଥିଲେ, ଦେଶର ଅନ୍ୟାନ୍ୟ ପ୍ରାନ୍ତରେ ବି ଲୋକ ମହୋତ୍ସବର ଆୟୋଜନ ହେଉଛି । ହେଲେ ଝାରସୁଗୁଡ଼ା ଜିଲ୍ଲା ମହୋତ୍ସବର ସ୍ଥାନ ସ୍ୱତନ୍ତ୍ର । ‘ଦୁଲ୍ଦୁଲି’ ଯେଭଳି କାୟା ବିସ୍ତାର କରିବାରେ ଲାଗିଛି³ ଆଗକୁ ଏହା କିଭଳି ଆୟୋଜନ କରାଯିବ ସେ ଦିଗରେ ଜିଲ୍ଲା ପ୍ରଶାସନ ଅଲଗା କିଛି ଚିନ୍ତା କରୁ ବୋଲି ଶ୍ରୀ ପୂଜାରୀ କହିଥିଲେ । ସ୍ଥାନୀୟ ବିଧାୟକ ଟଙ୍କଧର ତ୍ରିପାଠୀ, ଉତ୍ତରାଞ୍ଚଳ ରାଜସ୍ୱ କମିଶନର ସଚ୍ଚିନ ରାମଚନ୍ଦ୍ର ଯାଦବ, ଆଇଜି ହିମାଂଶୁ ଲାଲ, ଜିଲ୍ଲାପାଳ ଅବୋଲି ସୁନୀଲ ନରୱଣେ, ଏସ୍ପି ସ୍ମିଥ ପରମାର ପ୍ରମୁଖ ଉପସ୍ଥିତ ଥିଲେ । ସୁପ୍ରସିଦ୍ଧ ଓଡ଼ିଶୀ ନୃତ୍ୟ ଗୁରୁ ସ୍ୱର୍ଗତ କେଳୁଚରଣ ମହାପାତ୍ରଙ୍କ ବୋହୂ ନୃତ୍ୟାଙ୍ଗନା ସୁଜାତା ମହାପାତ୍ରଙ୍କୁ ମୁଖ୍ୟମନ୍ତ୍ରୀ ‘ଦୁଲଦୁଲି’ ମଞ୍ଚରେ ସମ୍ବର୍ଦ୍ଧିତ କରିଥିଲେ ।
