ଝାରସୁଗୁଡା,୨୫/୧୧: ସାମାନ୍ୟ ବଚସାରୁ ଭାଇର ଜୀବନ ନେଲା ଭାଇ । ସାନ ଭାଇର ଟାଙ୍ଗିଆ ଚୋଟରେ ପ୍ରାଣ ହରାଇଲା ବଡ଼ ଭାଇ । ମୃତକ ବଡ଼ ଭାଇ ସୁନୀଲ ସୋରେନ ଏବଂ ହତ୍ୟାକାରୀ ସାନଭାଇ ସୁଶୀଲ ସୋରେନ ବୋଲି ଜଣାପଡ଼ିଛି । ଝାରସୁଗୁଡା ଜିଲ୍ଲା ଲଖନପୁର ଥାନା ଅନ୍ତର୍ଗତ କୁଡାଲୋଇ ଗଙ୍ଗାପଡାରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ରବିବାର ବିଳମ୍ବିତ ରାତିରେ କୌଣସି ଏକ କଥାକୁ ନେଇ ସୁନୀଲ ଓ ସୁଶୀଲଙ୍କ ମଧ୍ୟରେ ବଚସା ହୋଇଥିଲା l ଏଥିରେ ରାଗିଯାଇ ସୁଶୀଲ ଏକ ଟାଙ୍ଗିଆରେ ସୁନୀଲଙ୍କ ମୁଣ୍ଡକୁ ଆକ୍ରମଣ କରିଥିଲା । ଫଳରେ ସେ ଗୁରୁତର ହୋଇ ତଳେ ପଡ଼ିଯାଇଥିଲେ । ଏହା ଦେଖି ପରିବାର ଲୋକେ ସୁନୀଲଙ୍କୁ ଉଦ୍ଧାର କରି ନିକଟସ୍ଥ ଚିକିତ୍ସାଳୟକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରେ ଏହି ଘଟଣା ସମ୍ପର୍କରେ ପୋଲିସକୁ ଖବର ଦେଇଥିଲେ ପରବାର ଲୋକେ । ଖବର ପାଇ ଘଟଣାସ୍ଥଳରେ ଲଖନପୁର ଥାନାପୋଲିସ ପହଞ୍ଚି ଅଭିଯୁକ୍ତ ସାନ ଭାଇ ସୁଶୀଲ ସୋରେନକୁ ପୋଲିସ ଅଟକ ରଖିଛି । ଏକ ସାଇଣ୍ଟିଫିକ୍‌ ଟିମ୍‌ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛି ।