ନୂଆଦିଲ୍ଲୀ: ବିହାରକୁ ସ୍ୱତନ୍ତ୍ର ରାଜ୍ୟ ମାନ୍ୟତା ଦେବାର ଦାବିକୁ କେନ୍ଦ୍ର ସରକାର ପ୍ରତ୍ୟାଖ୍ୟାନ କରିଛନ୍ତି। ଏହା ଏନଡିଏର ମୁଖ୍ୟ ସହଯୋଗୀ ଦଳ ଜେଡିୟୁର ମୁଖ୍ୟ ଦାବି ଥିଲା । ଏକ ଲିଖିତ ଉତ୍ତରରେ ରାଜ୍ୟ ଅର୍ଥମନ୍ତ୍ରୀ ପଙ୍କଜ ଚୌଧୁରୀ କହିଛନ୍ତି ଯେ, ବିହାରକୁ ସ୍ବତନ୍ତ୍ର ମାନ୍ୟତା ଦେବା ପାଇଁ କୌଣସି ମାମଲା ନାହିଁ।

ବିହାର ଝଞ୍ଜରପୁରର ସାଂସଦ ରାମପ୍ରୀତ ମଣ୍ଡଳ ପ୍ରଶ୍ନ କରିଛନ୍ତି ଯେ, ଅର୍ଥନୈତିକ ବିକାଶ ଏବଂ ଶିଳ୍ପାୟନକୁ ପ୍ରୋତ୍ସାହିତ କରିବା ପାଇଁ ବିହାର ଏବଂ ଅନ୍ୟାନ୍ୟ ପଛୁଆ ରାଜ୍ୟ ମାନଙ୍କୁ ସ୍ୱତନ୍ତ୍ର ରାଜ୍ୟ ମାନ୍ୟତା ଦେବା ପାଇଁ ସରକାରଙ୍କ ପାଖରେ କୌଣସି ଯୋଜନା ଅଛି କି ନାହିଁ । ତେବେ ପଙ୍କଜ ଚୌଧୁରୀ ଏହାର ଉତ୍ତର ଦେଇ କହିଛନ୍ତି ଯେ, ଏହା ପୂର୍ବରୁ ଜାତୀୟ ବିକାଶ ପରିଷଦ (ଏନଡିସି) କେତେକ ରାଜ୍ୟକୁ ସହାୟତା ଯୋଜନା ପାଇଁ ସ୍ବତନ୍ତ୍ର ଶ୍ରେଣୀର ମାନ୍ୟତା ଦେଇଥିଲା ଯେଉଁଥିରେ ଅନେକ ବିଶେଷତା ରହିଥିଲା, ଯାହାକୁ ବିଶେଷ ଧ୍ୟାନ ଦେବାର ଆବଶ୍ୟକ ରହିଥିଲା । ଏହି ବିଶେଷତା ଗୁଡିକରେ ପାହାଡୀ ଏବଂ କଠିନ ଭୂଭାଗ, କମ୍ ଜନସଂଖ୍ୟା ଅଂଚଳ କିମ୍ବା ଆଦିବାସୀ ଜନସଂଖ୍ୟାର ବୃହତ ଅଂଶ, ପଡୋଶୀ ଦେଶ ସହିତ ସୀମାରେ ରଣନୀତିକ ଅବସ୍ଥାନ, ଅର୍ଥନୈତିକ ଏବଂ ଭିତ୍ତିଭୂମି ପଛୁଆ ଏବଂ ରାଜ୍ୟ ଆର୍ଥିକର ଅଣ-କାର୍ଯ୍ୟକ୍ଷମ ପ୍ରକୃତି ସାମିଲ ରହିଛି । "

ସେ ଆହୁରି ମଧ୍ୟ ବ୍ୟାଖ୍ୟା କରିଛନ୍ତି ଯେ, ଏହା ପୂର୍ବରୁ, ବିହାରକୁ ସ୍ବତନ୍ତ୍ର ବର୍ଗ ମାନ୍ୟତା ପାଇଁ ଏକ ଆନ୍ତଃ ମନ୍ତ୍ରୀସ୍ତରୀୟ ଗୋଷ୍ଠୀ (ଆଇଏମଜି) ପକ୍ଷରୁ ବିଚାର କରାଯାଇଥିଲା, ଯାହା ମାର୍ଚ୍ଚ ୩୦, ୨୦୧୨ ରେ ଏହାର ରିପୋର୍ଟ ଦାଖଲ କରିଥିଲା । ଆଇଏମଜି ଏହି ନିଷ୍କର୍ଷରେ ପହଞ୍ଚିଥିଲା କି, ଉପସ୍ଥିତ ଏନଡିସି ମାନଦଣ୍ଡ ଆଧାରରେ ବିହାର ପାଇଁ ସ୍ୱତନ୍ତ୍ର ଶ୍ରେଣୀ ସ୍ଥିତି ପାଇଁ କୌଣସି ମାମଲା ପ୍ରସ୍ତୁତ ହେଉନାହିଁ। 

ସୂଚନାଥାଉକି, ସ୍ବତନ୍ତ୍ର ପାହ୍ୟା କୌଣସି ପଛୁଆ ରାଜ୍ୟକୁ ଏହାର ବିକାଶରେ ତ୍ବରାନ୍ବିତ କରିବା ପାଇଁ  ଅଧିକ କେନ୍ଦ୍ରିୟ ଅନୁଦାନ ସୁନିଶ୍ଚିତ କରିଥାଏ । ଯଦିଓ ସମ୍ବିଧାନ କୌଣସି ରାଜ୍ୟ ପାଇଁ ବିଶେଷ ମାନ୍ୟତା ପ୍ରଦାନ କରୁନାହିଁ,ତଥାପି ପଞ୍ଚମ ଅର୍ଥ ଆୟୋଗର ସୁପାରିଶ କ୍ରମେ ଏହା ୧୯୬୯ ରେ ପ୍ରବର୍ତ୍ତିତ ହୋଇଥିଲା । ବର୍ତ୍ତମାନ ପର୍ଯ୍ୟନ୍ତ ସ୍ବତନ୍ତ୍ର ମାନ୍ୟତା ପାଇଥିବା ରାଜ୍ୟ ଗୁଡ଼ିକରେ ଜାମ୍ମୁ କାଶ୍ମୀର (ବର୍ତ୍ତମାନ ଏକ କେନ୍ଦ୍ରଶାସିତ ଅଂଚଳ), ଉତ୍ତର-ପୂର୍ବ ରାଜ୍ୟ, ହିମାଚଳ ପ୍ରଦେଶ ଏବଂ ଉତ୍ତରାଖଣ୍ଡ ଭଳି ପାହାଡି ରାଜ୍ୟ ଅନ୍ତର୍ଭୁକ୍ତ।