ନୂଆଦିଲ୍ଲୀ: ଦୋଷୀ ସାବ୍ୟସ୍ତ ହୋଇଥିବା ସାଂସଦ ଏବଂ ବିଧାୟକ ମାନଙ୍କୁ ନିର୍ବାଚନ ଲଢ଼ିବା ଉପରେ ସ୍ଥାୟୀ ପ୍ରତିବନ୍ଧକ ଲଗାଇବା ପାଇଁ ଦାବି କରାଯାଇଥିବା ଆବେଦନ ଉପରେ କେନ୍ଦ୍ର ସରକାର ସୁପ୍ରିମକୋର୍ଟରେ ଜବାବ ରଖିଛନ୍ତି । ଏହି ପ୍ରସଙ୍ଗରେ କେନ୍ଦ୍ର ସରକାର କୋର୍ଟକୁ କହିଛନ୍ତି ଯେ, ଅପରାଧିକ ମାମଲାରେ ଦୋଷୀ ସାବ୍ୟସ୍ତ ରାଜନେତାଙ୍କ ଉପରେ ଆଜୀବନ ପ୍ରତିବନ୍ଧକ କଠୋର ହେବ। ତେବେ କେନ୍ଦ୍ର ସରକାର ବର୍ତମାନର ଆଇନକୁ ସମର୍ଥନ କରିଛନ୍ତି ଏବଂ ଏହାକୁ ଜାରି ରଖିବେ ବୋଲି କହିଛନ୍ତି।
ପ୍ରଚଳିତ ଆଇନ ଅନୁଯାୟୀ, ଯଦି କୌଣସି ବ୍ୟକ୍ତିଙ୍କୁ ଦୁଇ ବର୍ଷରୁ ଅଧିକ ଜେଲଦଣ୍ଡ ଦିଆଯାଏ, ତେବେ ତାଙ୍କ ସଜା ପୂରଣ କରିବା ପରେ ତାଙ୍କୁ ଛଅ ବର୍ଷ ପର୍ଯ୍ୟନ୍ତ ନିର୍ବାଚନ ଲଢ଼ିବା ପାଇଁ ବାରଣ କରାଯାଏ। ଏହାର ଅର୍ଥ ହେଉଛି ଜଣେ ବ୍ୟକ୍ତି ତାଙ୍କ ଦଣ୍ଡର ଛଅ ବର୍ଷ ପୂରଣ କରିବା ପରେ ନିର୍ବାଚନ ଲଢ଼ିପାରିବେ। ଗତକାଲି (ମଙ୍ଗଳବାର) କେନ୍ଦ୍ର ଆଇନ ମନ୍ତ୍ରଣାଳୟ ଦ୍ୱାରା ଦାଖଲ କରାଯାଇଥିବା ଏକ ସତ୍ୟପାଠରେ କୁହାଯାଇଛି, "ସଂସଦୀୟ ନୀତି ଅନୁଯାୟୀ, ଲାଗୁ ହୋଇଥିବା ଧାରା ଅନୁଯାୟୀ କରାଯାଇଥିବା ଅଯୋଗ୍ୟତା ସମୟ ମଧ୍ୟରେ ସୀମିତ। ଏହି ପ୍ରସଙ୍ଗରେ ଜୀବନବ୍ୟାପୀ ପ୍ରତିବନ୍ଧକ ଲଗାଇବା ଉପଯୁକ୍ତ ହେବ ନାହିଁ।
ଆଇନଜୀବୀ ଅଶ୍ୱିନୀ ଉପାଧ୍ୟାୟ ୨୦୧୬ରେ ଜନହିତକର ଆବେଦନ ଲଗାଇଥିଲେ, ଯେଉଁଥିରେ ଜନପ୍ରତିନିଧିତ୍ୱ ଆଇନ,୧୯୫୧ର ଧାରା ୮ ଏବଂ ୯ର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରାଯାଇଥିଲା । ସେ କହିଥିଲେ ଯେ ରାଜନୈତିକ ଦଳଗୁଡ଼ିକ କାହିଁକି ଭଲ ଭାବମୂର୍ତ୍ତି ଥିବା ଲୋକଙ୍କୁ ଖୋଜି ପାରୁନାହାଁନ୍ତି ତାହା ବୁଝାଇବା ଉଚିତ।
ଏହା ପରେ, ସୁପ୍ରିମକୋର୍ଟ କେନ୍ଦ୍ର ସରକାର ଏବଂ ନିର୍ବାଚନ କମିଶନଙ୍କ ଠାରୁ ଉତ୍ତର ମାଗିଥିଲେ ଯେ ଯେତେବେଳେ ଜଣେ ସରକାରୀ କର୍ମଚାରୀ ଦୋଷୀ ସାବ୍ୟସ୍ତ ହୁଅନ୍ତି, ସେ ଜୀବନବ୍ୟାପୀ ଚାକିରିରୁ ବାହାର ହୋଇଯାଆନ୍ତି, ତେବେ ଏହି ସମୟରେ କେମିତି ଜଣେ ଦୋଷୀ ବ୍ୟକ୍ତି ପୁଣି ସଂସଦକୁ ଯାଇ ପାରିବେ ? କୋର୍ଟ ପଚାରିଥିଲେ ଯେ ଯେଉଁମାନେ ଆଇନ ଭାଙ୍ଗିବେ ସେମାନେ ଆଇନ ତିଆରି କରିବାର କାମ କିପରି କରି ପାରିବେ ? କେନ୍ଦ୍ର ସରକାର ତାଙ୍କ ସତ୍ୟପାଠରେ କହିଛନ୍ତି ଯେ ସାଂସଦଙ୍କ ଅଯୋଗ୍ୟତା ନିଷ୍ପତ୍ତି ନେବାର ଅଧିକାର ସମ୍ପୂର୍ଣ୍ଣ ଭାବରେ ସଂସଦର ଏବଂ ଏହା ନ୍ୟାୟିକ ସମୀକ୍ଷା ବାହାରେ।
