ଚନ୍ଦାହାଣ୍ଡି ୧୩/୦୯ ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ କୋଇଲିମୁଣ୍ଡା ପଞ୍ଚାୟତ ଅଧିନ ଝୁଲେନବର ଗ୍ରାମର ଜଣେ ବ୍ୟକ୍ତି ନିଜ ସ୍ତ୍ରୀର ଶବ ସତ୍କାର କରିବାକୁ ଶ୍ମଶାନକୁ ଯାଇ ମହୁ ମାଛି ଆକ୍ରମଣରେ ଗୁରୁତର ହୋଇଛନ୍ତି । ଗୁରୁତର ଅବସ୍ଥାରେ ତାଙ୍କୁ ଚନ୍ଦାହାଣ୍ଡି ଗୋଷ୍ଠୀ ଚିକିତ୍ସା କେନ୍ଦ୍ରରେ ଚିକିତ୍ସିତ କରାଯାଉଥିବା ଡାକ୍ତର ମନୀଷ କୁମାର ପୁରୋହିତ ଗଣମାଧ୍ୟମକୁ ସୂଚନା ଦେଇଛନ୍ତି । ଗୁରୁତର ବ୍ୟକ୍ତି ଜଣକ ହେଉଛନ୍ତି ୫୬ ବର୍ଷିୟ ସଦାନନ୍ଦ ବାଗ l ଚିକିତ୍ସା ପରେ ତାଙ୍କ ସ୍ୱାସ୍ଥ୍ୟ ଅବସ୍ଥା ସ୍ଥିର ଥିବା ନେଇ ଡାକ୍ତର ପୁରୋହିତ ସୂଚନା ଦେଇଛନ୍ତି l ସଦାନନ୍ଦଙ୍କ ବ୍ୟତୀତ ଶବ ସତ୍କାର କରିବା ପାଇଁ ଯାଇ ଥିବା ହେମନ୍ତ ନାଗ, ଯୁଧେଷ୍ଟି ବଗର୍ତ୍ତୀଙ୍କ ସମେତ ଅନ୍ୟ ମାନେ ସାମାନ୍ୟ ଆହତ ହୋଇ ଥିବା ନେଇ ଗ୍ରାମବାସୀ ସୂଚନା ଦେଇଛନ୍ତି ।
ସୂଚନା ମୁତାବକ ସଦାନନ୍ଦ ବାଗଙ୍କ ସ୍ତ୍ରୀ ସୁମତୀ ବାଗ ଦୀର୍ଘ ଦିନ ହେବ ଅସୁସ୍ଥ ରହିଥିଲେ । ତେବେ ଶୁକ୍ରବାର ଦିନ ତାଙ୍କର ମୃତ୍ୟୁ ହୋଇଥିଲା । ସୁମତୀଙ୍କ ଶବ ସତ୍କାର ପାଇଁ ପରିବାର ଲୋକଙ୍କ ସମେତ ଗ୍ରାମର ବନ୍ଧୁ ବାନ୍ଧବ ମାନେ ନିକଟସ୍ଥ ଶ୍ମଶାନକୁ ଯାଇଥିଲେ । ଶବକୁ କବର ଦେବା ପାଇଁ ଗାତ ଖୋଲୁ ଥିବା ସମୟରେ ସେଠାରେ ଥିବା ମହୁ ଫେଣାରୁ ହଠାତ୍ ମହୁ ମାଛି ସମସ୍ତଙ୍କୁ ଆକ୍ରମଣ କରିବାରୁ ଶବକୁ ଛାଡି ପ୍ରାଣ ବିକଳରେ ଯିଏ ଯୁଆଡେ ଦୌଡ଼ି ପଳାଇଥିଲେ l ସଦାନନ୍ଦ ସ୍ତ୍ରୀର ଶବ ପାଖରେ ରହି ଥିବାରୁ ତାଙ୍କୁ ମହୁ ମାଛି ଆକ୍ରମଣ କରିବାରୁ ସେ ଗୁରୁତର ହୋଇ ପଡିଥିଲେ l ତାଙ୍କୁ ସେଠାରୁ ଉଧାର କରି ପରିବାର ଲୋକେ 108 ଯୋଗେ ଚିକିତ୍ସା ପାଇଁ ଚନ୍ଦାହାଣ୍ଡି ଗୋଷ୍ଠୀ ଚିକିତ୍ସା କେନ୍ଦ୍ରରେ ଭର୍ତ୍ତୀ କରି ଥିଲେ l ଡାକ୍ତର ମନୀଷ କୁମାର ପୁରୋହିତଙ୍କ ଦ୍ୱାରା ଚିକିତ୍ସା ପରେ ସଦାନନ୍ଦ ସୁସ୍ଥ ହୋଇ ଘରକୁ ଫେରି ଥିଲେ l ମହୁମାଛି ଆକ୍ରମଣ ଭୟରେ ଶବ ୩ ଘଣ୍ଟା ଶ୍ମଶାନରେ ପଡି ରହିଥିଲା l