ଭୁବନେଶ୍ୱର, ୦୬/୦୪: ଭାରସାମ୍ୟ ହରାଇ ରାତି ଅଧରେ ଓଲଟିଲା ଟୁରିଷ୍ଟ ବସ୍ । ଦୁର୍ଘଟଣାରେ ୨୦ରୁ ଉର୍ଦ୍ଧ୍ୱ ଗୁରୁତର ହୋଇଥିବା ବେଳେ ଜଣେ ଯାତ୍ରୀ ପ୍ରାଣ ହରାଇଛନ୍ତି । ଗୁରୁତରଙ୍କୁ ଚିକିତ୍ସା ପାଇଁ ଭୁବନେଶ୍ୱର ସ୍ଥାନାନ୍ତର କରାଯାଇଛି । ପିପିଲି ସିଫା ନିକଟରେ ଏହି ଦୁର୍ଘଟଣା ଘଟିଛି ।
ସୂଚନା ମୁତାବକ, ବାଂଲାଦେଶରୁ କିଛି ପର୍ଯ୍ୟଟକ ଭ୍ରମଣ କରିବାକୁ ଭାରତ ଆସିଥିଲେ । ୧୪୦ଜଣ ପର୍ଯ୍ୟଟକ ପଶ୍ଚିମବଙ୍ଗରୁ ଦୁଇଟି ବସ୍ ଯୋଗେ ପୁରୀ ଅଭିମୁଖେ ଆସିଥିଲେ । ଯାତ୍ରୀମାନେ ଓଡିଶାର ବିଭିନ୍ନ ପର୍ଯ୍ୟଟନ ସ୍ଥାନ ଓ ତୀର୍ଥ କ୍ଷେତ୍ର ଭ୍ରମଣରେ ଆସିଥିଲେ । ଶନିବାର ବାଲେଶ୍ୱର ମନ୍ଦିର ବୁଲିବା ପରେ ପୁରୀ ଅଭିମୁଖେ ଯାତ୍ରା କରିଥିଲେ । ହେଲେ ରାତି ପ୍ରାୟ ୨ଟା ସମୟରେ ପିପିଲି ସିଫା ନିକଟରେ ଘଟିଲା ଦୁର୍ଘଟଣା । ପର୍ଯ୍ୟଟକଙ୍କ ଗୋଟିଏ ବସ୍ ଭାରସାମ୍ୟ ହରାଇ ଓଲଟି ପଡ଼ିଥିଲା । ଏହି ଦୁର୍ଘଟଣାରେ ୨୦ ରୁ ଉର୍ଦ୍ଧ୍ୱ ଯାତ୍ରୀ ଗୁରୁତର ହୋଇଥିବା ବେଳେ ଜଣଙ୍କର ମୃତ୍ୟୁ ହୋଇଛି । ଏହା ଦେଖି ସ୍ଥାନୀୟଲୋକ ତୁରନ୍ତ ପୋଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପିପିଲି ପୋଲିସ ଏବଂ ଅଗ୍ନିଶମ ବାହିନୀ ପହଞ୍ଚି ଯାତ୍ରୀମାନଙ୍କୁ ଉଦ୍ଧାର କରିଛନ୍ତି । ଗୁରୁତର ଯାତ୍ରୀମାନଙ୍କୁ ଉଦ୍ଧାର କରି ଚିକିତ୍ସା ପାଇଁ ଭୁବନେଶ୍ୱର ସ୍ଥାନାନ୍ତର କରାଯାଇଛି ।
