କେନ୍ଦ୍ରାପଡ଼ା,୧୫/୮ : କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକ କୁରୁଣ୍ଟି ପଞ୍ଚାୟତ ବଳରାମପୁର ଗାଁରେ ଅଭାବନୀୟ ଘଟଣା ଘଟିଛି । ଘରେ ନିଆଁ ଲାଗି ୨ଜଣ ଶିଶୁ ଜୀବନ୍ତ ଦଗ୍ଧ ହୋଇ ଯାଇଥିବା ଜଣାପଡ଼ିଛି । ଦୁଇ ଶିଶୁଙ୍କ ମଧ୍ୟରେ ଜଣେ ୧୧ ବର୍ଷୀୟା ଝିଅ ଅନୁପମା ସାହାଣୀ ଓ ୯ ବର୍ଷର ପୁଅ ରିଷି ସାହାଣୀ। ଉଭୟ ସମ୍ପର୍କରେ ଭାଇଭଉଣୀ ବୋଲି ମଧ୍ୟ ସୂଚନା ମିଳିଛି । 

ବର୍ତ୍ତମାନ ସୁଦ୍ଧା ଘରେ କେମିତି ନିଆଁ ଲାଗିଲା ପ୍ରକୃତ କାରଣ ଜଣାପଡ଼ିନଥିବାବେଳେ ଗୃହ କର୍ତ୍ତା ସୁକାନ୍ତ ସାହାଣୀ ବାହାର ରାଜ୍ୟରେ ଦାଦନ ଖଟୁଛନ୍ତି। ଆଜି ସ୍ୱାଧୀନତା ଦିବସ ଅବସରରେ ଅନୁପମା ଓ ରିଷି ବିଦ୍ୟାଳୟକୁ ଯିବା ପାଇଁ ପ୍ରସ୍ତୁତ ହେଉଥିବା ବେଳେ ପୂର୍ବାହ୍ନ ସମୟରେ ସୁକାନ୍ତଙ୍କ ଦୁଇ ବଖରା ଚାଳ ଛପର ଘରେ କୌଣସି କାରଣରୁ ନିଆଁ ଲାଗି ଯାଇଥିଲା ଘର ଭିତରେ ନିଆଁ ଏପରି ବ୍ୟାପି ଯାଇଥିଲା ଯେ ଉଭୟ ଭାଇ ଭଉଣୀ ଘର ଭିତରୁ ବାହାରକୁ ବାହାରି ପାରିନଥିଲେ ।  

ଅନ୍ୟପଟେ ନିଆଁର କରାଳ ରୂପ ଦେଖି କେହି ଭିତରକୁ ପ୍ରବେଶ କରି ପାରିନଥିଲେ। ଏହି ସମୟରେ ଘର ଭିତରେ ରୋଷେଇ ପାଇଁ ରଖା ଯାଇଥିବା ଟାଙ୍କି ବିସ୍ଫୋରଣ ହୋଇଥିଲା। ତେବେ ପରେ ଅଗ୍ନିଶମ ବିଭାଗ ଏବଂ ଗାଁ ଲୋକେ ନିଆଁ ଆୟତ୍ତକୁ ଆଣିବାକୁ ଚେଷ୍ଟା କରିବା ସମୟରେ ଅନୁପମା ଓ ରିଷି ସମ୍ପୁର୍ଣ୍ଣ ରୂପେ ଦଗ୍ଧ ହୋଇଥିବା ଦେଖି ଉଭୟଙ୍କୁ ରାଜନଗର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା। 

ହେଲେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ।ଖବର ପାଇ କେନ୍ଦ୍ରାପଡା ଜିଲ୍ଲାପାଳ, ଆରକ୍ଷୀ ଅଧିକ୍ଷକ, ରାଜନଗର ବିଧାୟକ, ତହସିଲଦାର ଘଟଣାସ୍ଥଳରେ ଓ ମେଡ଼ିକାଲରେ ପହଞ୍ଚିଥିବା ବେଳେ ମୃତକ ଭାଇ ଭଉଣୀଙ୍କୁ ଜିଲ୍ଲା ଜରୁରୀକାଳୀନ ପାଣ୍ଠିରୁ ୬୦ ହଜାର ଟଙ୍କା ସହାୟତା ଯୋଗାଇ ଦିଆଯାଇଛି।