ଭୁବନେଶ୍ୱର,୧୯/୦୯: ବୋମା ମାଡ଼ରେ ଥରି ଉଠିଛି କେଦାରପଲ୍ଲୀ ବସ୍ତି । ବାଇକ୍‌ରେ ଆସି ବୋମା ମାଡ କଲେ ଦୃର୍ବୁତ୍ତ । ବୋମା ମାଡ଼ କରି ଯାଉଥିବା ବେଳେ ସିସିଟିଭିରେ ହେଲା କଏଦ୍ ହେଲା ଦୃଶ୍ୟ । ଗୋଷ୍ଠୀ ବିବାଦରୁ ବୋମାମାଡ଼ ହୋଇଥିବା ନେଇ ଜଣାପଡ଼ିଥିବା ବେଳେ ରାଜଧାନୀ ଭୁବନେଶ୍ୱରର କ୍ୟାପିଟାଲ ଥାନା ଅନ୍ତର୍ଗତ ବାପୁଜୀ ନଗରର କେଦାରପଲ୍ଲୀ ବସ୍ତି ଅଞ୍ଚଳରେ ଏଭଳି ଘଟଣା ଘିଟିଛି । 

ସୂଚନା ମୁତାବକ, ପୁଣି ଥରେ ଅଶାନ୍ତ ହୋଇଛି ଭୁବନେଶ୍ୱର । ପଦ୍ମକେଶରପୁର, ଚନ୍ଦକା ଓ ନୂଆପଲ୍ଲୀ ବୋମାମାଡ଼ ଘଟଣା ପରେ ପୁଣି ବୋମା ଫୁଟିଛି କ୍ୟାପିଟାଲ ଥାନା ଅନ୍ତର୍ଗତ କେଦାରପଲ୍ଲୀ ବସ୍ତିରେ । କେଦାରପଲ୍ଲୀର ୨ଗୋଷ୍ଠୀ ମଧ୍ୟରେ କିଛି ଦିନ ହେବ ଛକାପଞ୍ଝା ଲାଗିରହିଥିଲା । ହେଲେ ବୁଧବାର ସବୁ ସୀମା ଟପିଯାଇଥିଲା । ବୁଧବାର ରାତି ପ୍ରାୟ ୧୧ଟା ବେଳେ ଗୋଟିଏ ଗୋଷ୍ଠୀ ବସ୍ତିମୁଣ୍ଡରେ ବସିଥିଲେ । ଏହି ସମୟରେ ଅନ୍ୟ ଏକ ଗୋଷ୍ଠୀ ସେମାନଙ୍କ ଉପରକୁ ବୋମା ପକାଇଥିଲେ । ତେବେ ବୋମା ମାଡ଼ରେ କାହାରି କିଛି କ୍ଷତି ହୋଇନଥିଲା । 

ଏନେଇ ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ କ୍ୟାପିଟାଲ ଥାନା ପୋଲିସ ପହଞ୍ଚିଥିଲେ । ଏହି ଦୃଶ୍ୟ ସିସିଟିଭିରେ କଏଦ ହେଇଥିଲା । ଉକ୍ତ ସିସିଟିଭି ଆଧାରରେ ଦୃର୍ବୁତ୍ତଙ୍କୁ ଧରିବା ପାଇଁ ଚାରିଆଡ଼େ ମାରାଥନ୍ ରେଡ୍‌ ଜାରି ରଖିଛି ପୋଲିସ ।