ଭୁବନେଶ୍ୱର,୦୫/୦୪: ବଳଭଦ୍ରପୁର ଗାଁ ନିକଟ ପୋଲତଳୁ ଜଣେ ଯୁବତୀଙ୍କ ମୃତଦେହ ଉଦ୍ଧାର ହୋଇଛି । ମୃତକ ହେଲେ ସେହି ଗାଁର ପ୍ରତିମା ନାଏକ । ଘଟଣା ସ୍ଥଳରୁ ପୋଲିସ୍ ଏକ ସୁଇସାଇଡାଲ ନୋଟ୍ ଜବତ କରିଥିବାରୁ ଯୁବତୀ ଜଣକ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । କେନ୍ଦୁଝର ଜିଲ୍ଲାରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ତିନି ଭଉଣୀଙ୍କ ମଧ୍ୟରୁ ସବୁଠାରୁ ସାନ ପ୍ରତିମା । ରୋଜଗାରକ୍ଷମ ହେବା ପାଇଁ ନିଜର ପ୍ରୟାସ ଜାରି ରଖିଥିଲେ । କେତେକ ସଂସ୍ଥାରେ ସେ ଆଗରୁ କାମ ମଧ୍ୟ କରିଥିଲେ । ତେବେ ଗତ ମଙ୍ଗଳବାର ଠାରୁ କୌଣସି ଏକ କାର୍ଯ୍ୟର ପ୍ରଶିକ୍ଷଣ ନେବାପାଇଁ ସେ ଦେବଗଡ଼ ଯାଇଥିଲେ । ଆଜି ସକାଳେ ତାଙ୍କ ମୃତଦେହ ପୋଲ ତଳେ ପଡିଥିବା ଦେଖିବାକୁ ପାଇଥିଲେ ସ୍ଥାନୀୟଲୋକେ । ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଚମ୍ପୁଆ ପୋଲିସ ଘଟଣା ସ୍ଥଳରେ ପହଞ୍ଚିଛି । ସେଠାରେ ପହଞ୍ଚି ମୃତଦେହକୁ ଜବତ୍ କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି ।
ଘଟଣା ସ୍ଥଳରୁ ପୋଲିସ ଏକ ସୁଇସାଇଡାଲ ନୋଟ୍ ଜବତ କରିଥିବାରୁ ଏହା ଏକ ଆତ୍ମହତ୍ୟା ବୋଲି ସନ୍ଦେହ କରାଯାଉଛି । ମୃତ ପ୍ରତିମାଙ୍କ ବେକରେ ପ୍ଲାଷ୍ଟିକ ଦଉଡ଼ିର ଏକ ଖଣ୍ଡ ବନ୍ଧା ହୋଇଥିବା ବେଳେ, ଆଉ ଏକ ଖଣ୍ଡ ପୋଲର ଉପର ଭାଗରୁ ତଳକୁ ଝୁଲୁଥିବା ଦେଖିବାକୁ ମିଳିଛି । ଯୁବତୀ ଜଣକ ବେକରେ ଦଉଡ଼ି ବାନ୍ଧି ପୋଲରୁ ତଳକୁ ଡେଇଁବା ସମୟରେ ଦଉଡ଼ିଟି ଛିଣ୍ଡି ଯାଇଥିବ ବୋଲି ଅନୁମାନ କରୁଛି ପୋଲିସ । ତେବେ ସୁଇସାଇଡାଲ ନୋଟ୍ ରେ କ'ଣ ଉଲ୍ଲେଖ ରହିଛି ତାହା ପୋଲିସ ସ୍ପଷ୍ଟ କରିନାହିଁ ।
