ଭୁବନେଶ୍ୱର,୩୧/୦୩: ଟାର୍ଗେଟ ଥିଲା ୩୦୦ କୋଟି ଆଦାୟ କରିବେ । ଏନ୍ଫୋର୍ସମେଣ୍ଟ ଟିମ୍ ସହର ସାରା ବୁଲିଲେ । ଦିନକ ପରେ ମାର୍ଚ୍ଚ ମାସ ସରିବ । ଆଦାୟ ହୋଇଛି ମାତ୍ର ୧୯୦ କୋଟି ଟଙ୍କା । ଚଳିତ ବର୍ଷ ବି ଟିକସ ଆଦାୟରେ ବିଏମ୍ସି ଫେଲ ମାରିଛି ।
ବିଏମ୍ସି ୨୦୨୪-୨୫ ଆର୍ଥିକ ବର୍ଷରେ ୧୩୨ କୋଟି ଟଙ୍କା ହୋଲ୍ଡିଂ ଟ୍ୟାକ୍ସ ଆଦାୟ କରିବାକୁ ଲକ୍ଷ୍ୟ ରଖିଥିଲା । ବର୍ଷ ସରିଲା, ଆଦାୟ ହୋଇଛି ମାତ୍ର ୮୮ କୋଟି ଟଙ୍କା । ଦକ୍ଷିଣ-ପୂର୍ବ ଜୋନ୍ ସର୍ବାଧିକ ୬୪ ପ୍ରତିଶତ ଆଦାୟ କରିଥିବା ବେଳେ ଉତ୍ତର ଜୋନ୍ ନିରାଶ କରିଛି ।
ହୋଲ୍ଡିଂ ଟ୍ୟାକ୍ସ ଆଦାୟରେ ପୁଣି ଫେଲ୍ ମାରିଛି ବିଏମ୍ସି । ୧୦୦ କୋଟି ଟଙ୍କା ଛୁଇଁ ପାରିଲା ନାହିଁ । ଚଳିତ ବର୍ଷ ୧୩୨ କୋଟି ଟଙ୍କା ଡିମାଣ୍ଡ ଥିବା ବେଳେ ୧୨୦କୋଟି ଟଙ୍କାର ଟାର୍ଗେଟ ଦିଆଯାଇଥିଲା । ହେଲେ ୩ଟି ଜୋନ୍ରୁ ଆଦାୟ ହୋଇଛି ମାତ୍ର ୮୮ କୋଟି ଟଙ୍କା । ଦକ୍ଷିଣ-ପୂର୍ବ ଜୋନକୁ ୩୭.୯୮କୋଟି ଟଙ୍କାର ହୋଲ୍ଡିଂ ଟ୍ୟାକ୍ସ ଟାର୍ଗେଟ ଦିଆଯାଇଥିଲା । ହେଲେ ଆଦାୟ ହୋଇଛି ମାତ୍ର ୨୭ କୋଟି । ଟାର୍ଗେଟର ୬୪ ପ୍ରତିଶତ ଆଦାୟ କରିଛି ଜୋନ୍ । ସେହିପରି ଦକ୍ଷିଣ-ପଶ୍ଚିମ ଜୋନ୍କୁ ୩୭.୯୮ କୋଟି ଟାର୍ଗେଟ ଦିଆଯାଇଥିବା ବେଳେ ଆଦାୟ ହୋଇଛି ମାତ୍ର ୨୪ କୋଟି । ଉତ୍ତର ଜୋନର ୪୯.୪୬ କୋଟି ଟାର୍ଗେଟରୁ ମାତ୍ର ୩୦ କୋଟି ଟଙ୍କା ଆଦାୟ ହୋଇଛି ।
ମିଳିଥିବା ସୂଚନା ମୁତାବକ ବିଏମ୍ସି ୧୮୧ କୋଟି ଟଙ୍କାର ରାଜସ୍ୱ ଆଦାୟ କରିଛି । ସେଥିମଧ୍ୟରେ ୮୮ କୋଟି ଟଙ୍କାର ହୋଲ୍ଡିଂ ଟ୍ୟାକ୍ସ, ଟ୍ରେଡ ଲାଇସେନ୍ସ ବାବଦକୁ ୫.୧୬ କୋଟି, ବିଜ୍ଞାପନରେ ୧୩ କୋଟି, ଅର୍ବାନ ରେଣ୍ଟରୁ ୫.୨ କୋଟି, ପାର୍କିଂରୁ ୯୦ ଲକ୍ଷ, ଏବଂ ଅନ୍ୟାନ ବାବଦକୁ ୬୦ କୋଟିର ରାଜସ୍ୱ ଆଦାୟ ହୋଇଛି ।
ସେପଟେ କିଛି ସରକାରୀ ଏବଂ ବେସରକାରୀ ଅନୁଷ୍ଠାନ ନାଁରେ କୋଟି କୋଟି ଟଙ୍କାର ହୋଲ୍ଡିଂ ଟ୍ୟାକ୍ସ ବକେୟା ପଡିଛି । ବାରମ୍ବାର ନୋଟିସ ସତ୍ତେ୍ୱ ଏହି ସବୁ ଅନୁଷ୍ଠାନ ଟ୍ୟାକ୍ସ ପୈଠ କରିନାହାନ୍ତି । ଏହି ସବୁ ଅନୁଷ୍ଠାନ ଉପରେ କାର୍ଯ୍ୟାନୁଷ୍ଠାନ ନିଆଯିବ ନା ଏସବୁ ହୋଲ୍ଡିଂ ଟ୍ୟାକ୍ସ ମାଫ୍ କରିଦିଆଗଲା, ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ବିଏମ୍ସିର ଜଣେ ବରିଷ୍ଠ ଅଧିକାରୀ କହିଛନ୍ତି, ତଥାପି ହୋଲ୍ଡିଂ ଟ୍ୟାକ୍ସ ଆଦାୟରେ ଭଲ ପ୍ରଦର୍ଶନ ରହିଛି । ଆଗକୁ ଟାର୍ଗେଟ ପୂରଣ କରିବାକୁ ଲକ୍ଷ୍ୟ ରଖିଛୁ । କିଛି ସରକାରୀ ଅନୁଷ୍ଠାନ ଟଙ୍କା ବାକି ରଖିଛନ୍ତି । ଆଦାୟ ପାଇଁ ସେମାନଙ୍କୁ ବିଏମ୍ସି ପକ୍ଷରୁ ନୋଟିସ୍ ଜାରି କରାଯାଇଛି । ଆସନ୍ତାକାଲି ଛୁଟି ଅଛି । ଆଉ ୧୦ କୋଟି ଟଙ୍କା ଆଦାୟ ହେଲ ୨୦୦ କୋଟି ଛୁଇଁବ ।
