ମୁମ୍ବାଇ: ଟି-୨୦ ବିଶ୍ବକପ୍ ବିଜେତା ଟିମ୍ ଇଣ୍ଡିଆକୁ ସ୍ବାଗତ କରିବା ଲାଗି ମୁମ୍ବାଇର ମେରାଇନ୍ ଡ୍ରାଇଭରେ ଭିକ୍ଟ୍ରି ପରେଡ୍ ଆୟୋଜିତ ହୋଇଥିଲା । ଗୁରୁବାର ଆୟୋଜିତ ହୋଇଥିବା ଏହି ପରେଡ୍ରେ ମୁମ୍ବାଇର ମେରାଇନ୍ ଡ୍ରାଇଭରେ ଲକ୍ଷାଧିକ ଲୋକଙ୍କ ସମାଗମ ହୋଇଥିଲା । ବିଶ୍ବକପ୍ ହିରୋଙ୍କୁ ଦେଖିବାକୁ ଲୋକଙ୍କ ଗହଣରେ ପ୍ରବଳ ଉତ୍ସାହ ଥିଲା । କିନ୍ତୁ କିଛି ଘଣ୍ଟାର ଏହି ଆୟୋଜନ ଲାଗି ମେରାଇନ୍ ଡ୍ରାଇଭର ହାଲ ବେହାଲ ହୋଇପଡ଼ିଛି ।
ଜୋତା, କପଡ଼ା ପାଖରୁ ଆରମ୍ଭ କରି ପ୍ଲାଷ୍ଟିକ୍ ବଟଲ ଯାଏଁ, ସବୁକିଛି ଲୋକେ ମେରାଇନ୍ ଡ୍ରାଇଭରେ ଛାଡ଼ି ଚାଲିଯାଇଛନ୍ତି । ଆଜି ଲୋକଙ୍କ ଭିଡ଼ ନାହିଁ ସତ କିନ୍ତୁ ମେରାଇନ୍ ଡ୍ରାଇଭରେ ଅଳିଆର ରାଜୁତି ଦେଖିବାକୁ ମିଳିଛି । କୁଢ଼ କୁଢ଼ ଅଳିଆରେ ଅଣନିଶ୍ବାସୀ ହୋଇପଡ଼ିଛି ମୁମ୍ବାଇର ଜଣାଶୁଣା ମେରାଇନ୍ ଡ୍ରାଇଭ ।
ବ୍ରିହାନମୁମ୍ବାଇ ମୁନିସିପାଲ୍ କର୍ପୋରେସନ୍ର (ବିଏମସି)ର ସଫେଇ କର୍ମଚାରୀ ଅଳିଆ ସଫା କରି କରି ବେହାଲ ହୋଇପଡ଼ିଛନ୍ତି । ବିଏମସି ପକ୍ଷରୁ ମେରାଇନ୍ ଡ୍ରାଇଭରୁ ୧୧,୫୦୦ କେଜି (୧୧.୫ ମେଟ୍ରିକ୍ ଟନ୍ )ରୁ ଅଧିକ ଅଳିଆ ଗୋଟାଇଛି ବିଏମସି । ଡମ୍ପର ଏବଂ ଛୋଟ ଛୋଟ୍ ଅଳିଆବୁହା ଗାଡ଼ିରେ ଅଳିଆ ଲଦି ନିଆଯାଇଛି ବୋଲି ବିଏମସିର ଜଣେ ଅଧିକାରୀ ସୂଚନା ଦେଇଛନ୍ତି । ହାଲୁକା ବର୍ଜ୍ୟର ପରିମାଣ ବହୁତ ଅଧିକ । ୨୫ ଜଣ ଶ୍ରମିକ ଏବଂ ଅନ୍ୟ କର୍ମଚାରୀଙ୍କ ସହାୟତାରେ ମେରାଇନ୍ ଡ୍ରାଇଭକୁ ସଫା କରାଯାଇଛି । ତେବେ ଗୁରୁବାର ରାତିରେ ମେରାଇନ୍ ଡ୍ରାଇଭରେ ଦେଢ଼ କିଲୋମିଟରରୁ ଅଧିକ ରାସ୍ତାରେ ଲକ୍ଷାଧିକ କ୍ରିକେଟ ପ୍ରେମୀଙ୍କ ଭିଡ଼ ଜମିଥିଲା । ଏହି ଭିଡ ଓ୍ବାଙ୍ଖଡେ ଷ୍ଟାଡିୟମରେ ମଧ୍ୟ ଭାରତୀୟ ଟିମ୍କୁ ଚିୟର ଅପ କରିଥିଲା ।
ଏହା ପରେ ଭିଡ଼ ଧିରେ ଧିରେ କମିଥିଲେ ବି ମେରାଇନ ଡ୍ରାଇଭ ଅଳିଆରେ ଭର୍ତ୍ତି ହୋଇସାରିଥିଲା। ରାତି ୧୧.୩୦ ବେଳକୁ ବିଏମସି ମଧ୍ୟ ରାସ୍ତା ସଫା କରିବାକୁ ପ୍ରସ୍ତୁତି ଆରମ୍ଭ କରିଥିଲା । ଆଜି ସକାଳ ୮ରେ ସଫେଇ କାର୍ଯ୍ୟ ଶେଷ ହୋଇଥିବା ନେଇ ବିଏମସି ପକ୍ଷରୁ କୁହାଯାଇଛି । ସେପଟେ ଏଭଳି କାର୍ଯ୍ୟ ପାଇଁ ବିଏମସିକୁ ପ୍ରଶଂସାରେ ପୋତି ପକାଇଛନ୍ତି ଲୋକେ । ସୋସିଆଲ ମିଡିଆରେ ବିଏମସିର କାର୍ଯ୍ୟକୁ ଖୁବ ପ୍ରଶଂସା ମିଳିଛି ।