ମାଲକାନଗିରି, ୦୬/୦୧: ଗୁଣି ଗାରେଡି ସନ୍ଦେହରେ ଗାଁରେ ବୁଲିଲା ଖଟ । ଜଣେ ବୃଦ୍ଧ ମହିଳାଙ୍କ ପାଖରେ ଖଟ ଅଟକିବା ପରେ ଟାଙ୍କୁ ଡାହାଣି ବୋଲି ଆଖ୍ୟା ଦେଲେ ଛତିଗଡରୁ ଆସିଥିବା ପୂଜକ । ପରେ ପୋଲିସ ୬ ଜଣ ଛତିଶଗଡି ପୂଜକଙ୍କୁ ଗିରଫ କରିବା ସହ ବ୍ୟବହୃତ ଖଟ ସମେତ ଏକ ଦାମୀ କାର୍କୁ ଜବତ କରିଛି । ଗିରଫ ହେଇଥିବା ୬ ଜଣ ଅଭିଯୁକ୍ତ ହେଲେ ଟିକେନ୍ଦ୍ର ଦେହାରି, ଖିରେନ୍ଦ୍ର କୁମାର ନାଗ, ରାମୁ ମାଣ୍ଡାଭି, ଜଗନ୍ନାଥ ନାଗ, କମୁଳୁରାମ ନାଗ ଓ ମଙ୍ଗଟୁରାମ ବାଗେଲ । ଏମାନଙ୍କ ଘର ବସ୍ତର ଜିଲ୍ଲାର କଟୱାଲି ଓ ଦରଭା ଅଞ୍ଚଳର ବୋଲି ଜଣାପଡିଛି । ମାଲକାନଗିରି ଜିଲ୍ଲା ଓର୍କେଲ ଥାନା ଅନ୍ତର୍ଗତ ଚିତାପାରୀ-୪ ଗ୍ରାମରେ ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ।
ସୂଚନା ମୁତାବକ, ଚିତାପାରୀ-୪ ଗାଁରେ ଏକ ଆଦିବାସୀ ପର୍ବ ଆୟୋଜନ ପାଇଁ ଜିଲ୍ଲା ପ୍ରଶାସନ ଶୁକ୍ରବାର ଠାରୁ ରବିବାର ପର୍ଯ୍ୟନ୍ତ ଅନୁମତି ଦେଇଥିଲା । ତେବେ ପୂଜା ନାଁରେ ଗାଁରେ ଗୁଣି ଗାରେଡି ଚାଲିଥିବା ନେଇ କିଛି ଲୋକ ଥାନାକୁ ଖବର ଦେଇଥିଲେ। ଖବର ପାଇ ଓର୍କେଲ ଥାନା ପୋଲିସର ଏକ ଟିମ ଘଟଣା ସ୍ଥଳରେ ପହଞ୍ଚି ଯାହା ଦେଖିଲା ତାଜୁବ ହୋଇଗଲା । ଠାକୁରଙ୍କ ଏକ ଖଟୁଲି ଧରି କିଛି ଲୋକେ ଗାଁର ସମସ୍ତଙ୍କ ଘର ବୁଲୁଥିଲେ । ଏତିକିରେ ସରିନଥିଲା ଅନ୍ଧବିଶ୍ବାସର ଏ ଖେଳ । ପୁଜା ହେଉଥିବା ସ୍ଥାନରେ ଶହ ଶହ ଲୋକଙ୍କୁ ଲମ୍ବା ଧାଡିରେ ବସାଇ ସେମାନଙ୍କ ମୁଣ୍ଡ ଉପରେ ମଧ୍ୟ ବୁଲିଥିଲା ଗୁଣିଆ ଖଟ । ଗାଁର ୬୭ ବର୍ଯୀୟା ବୃଦ୍ଧ ବତୀ ଖିଲଙ୍କ ପାଖରେ ଖଟ ଅଟକିବା ପରେ ତାଙ୍କୁ ଡାହାଣି ଆଖ୍ୟା ଦେଇ ଗାଁରୁ ବାହାର କରିବାକୁ ସଭା ବସିଥିଲା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ବୃଦ୍ଧାଙ୍କୁ ଉଦ୍ଧାର କରିବା ସହ ଛତିଶଗଡର ୬ ଜଣ ପୂଜାରୀଙ୍କୁ ଗିରଫ କରିଛି । ସେମାନଙ୍କ ନିକଟରୁ ଦାମୀ କାର ଓ କଟୁରି ଜବତ କରିଛି । ବ୍ଲାକ ମ୍ୟାଜିକର ବିଭିନ୍ନ ଦଫା ଲଗାଇ ୬ ଜଣଙ୍କୁ କୋର୍ଟ ଚାଲାଣ କରିଛି ଓର୍କେଲା ଥାନା ପୋଲିସ ।
