ମାଲକାନଗିରି : ମାଲକାନଗିରି ଜିଲ୍ଲା ସଦର ମହକୁମା ଠାରେ ଥିବା ବୁଟିଗୁଡା ସରକାରୀ ଉଚ୍ଚ ବିଦ୍ୟାଳୟରୁ କେହି ଦୁର୍ବୃତ୍ତ କବାଟ ଭାଙ୍ଗି ଚୋରି କରିଥିବା ଅଭିଯୋଗ ହୋଇଛି। ସୂଚନା ଅନୁଯାୟୀ, ଜିଲ୍ଲା ସଦରରେ ଥିବା ବୁଟିଗୁଡା ସରକାରୀ ଉଚ୍ଚ ବିଦ୍ୟାଳୟରେ ଆଜି ସକାଳେ ପ୍ରଧାନ ଶିକ୍ଷକ ପୂର୍ଣଚନ୍ଦ୍ର ଖଣ୍ଡପାଣି ସ୍କୁଲରେ ପ୍ରବେଶ କରି ନିଜ କକ୍ଷକୁ ଯିବା ସମୟରେ କବାଟ ଖୋଲା ଥିବା ଦେଖିବାକୁ ପାଇ ଥିଲେ।
କବାଟର ତାଲା ଲାଗି ଥିବା ସ୍ଥାନକୁ ଭାଙ୍ଗି ଦିଆଯାଇ ଥିବା ଦେଖି , ସେ ଚୋରି ହୋଇଥିବା ସନ୍ଦେହରେ ତୁରନ୍ତ ଅନ୍ୟ ସହକାରୀ ଶିକ୍ଷକଙ୍କୁ ଡକାଇ ଥିଲେ। ସମସ୍ତେ କକ୍ଷ ମଧ୍ୟକୁ ପଶି ଦେଖିଥିଲେ ଯେ, ଆସବାବ ପତ୍ର ଚାରିଆଡେ ବିକ୍ଷିପ୍ତ ହୋଇ ପଡିଥିବା ସହ ଆଲମିରାକୁ ମଧ୍ୟ ତାଡି ତାହାର କବାଟକୁ ଭାଙ୍ଗି ଦିଆ ଯାଇଛି।
ପ୍ରଧାନ ଶିକ୍ଷକ ସଙ୍ଗେ ସଙ୍ଗେ ଏନେଇ ସ୍କୁଲ ପରିଚାଳନା କମିଟିକୁ ଡକାଇ ଏହି ବିଷୟରେ ଆଲୋଚନା କରିଥିଲେ। ଏହାସହ ସର୍ବସମ୍ମତି କ୍ରମେ ମାଲକାନଗିରି ଆଦର୍ଶ ଥାନାରେ ଜଣାଇ ଥିଲେ। ମାଲକାନଗିରି ଥାନା ପୋଲିସ ସ୍କୁଲରେ ପହଁଚି ତଦନ୍ତ ଚଳାଇବା ସହ ସ୍ଥିତି ବିଷୟରେ ଯାଞ୍ଚ କରି ତଦନ୍ତ ଆରମ୍ଭ କରିଥିଲେ। କେଉଁସବୁ ସାମଗ୍ରୀ ଚୋରି ହୋଇଛି ତାହା ସ୍ପଷ୍ଟ ହୋଇ ନାହିଁ। ଚୋରି ସାମଗ୍ରୀ ଗୁଡିକର ଏକ ତାଲିକା ସ୍କୁଲ ପକ୍ଷରୁ ପ୍ରସ୍ତୁତି ଚାଲିଛି, ପ୍ରାଥମିକ ତଦନ୍ତରୁ ସ୍କୁଲର କିଛି ଗୁରୁତ୍ୱପୂର୍ଣ୍ଣ ରେକର୍ଡ ପତ୍ର ନଥିବାର ଜଣାପଡିଛି।
