ହୋବାର୍ଟ,୨୮/୦୧: ହୋବାର୍ଟ ହରିକେନ୍ସ ପ୍ରଥମ ଥର ବିଗ୍ ବାସ୍ ଲିଗ୍ ଚାମ୍ପିଅନ୍ ହେବାର ଗୌରବ ଲାଭ କରିଛି । ସୋମବାର ଅନୁଷ୍ଠିତ ଫାଇନାଲ୍ ମୁକାବିଲାରେ ଦଳ ୭ ୱିକେଟ୍ରେ ସିଡନୀ ଥଣ୍ଡରକୁ ପରାସ୍ତ କରିଥିଲା । ଓପନର ମିଚେଲ ଓୱେନ ଶତକୀୟ ଇନିଂସ୍ ଖେଳି ଦଳକୁ ଚାମ୍ପିଅନ୍ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ ।
ବ୍ୟାଟିଂ ଆମନ୍ତ୍ରଣ ପାଇ ସିଡନୀ ଥଣ୍ଡର ୭ ୱିକେଟ୍ ହରାଇ ୧୮୨ରନ୍ ସଂଗ୍ରହ କରିଥିଲା । ଦଳ ପକ୍ଷରୁ ଜାସନ ସାଙ୍ଘା ୬୭ (୫ଚୌକା, ୨ଛକା), ଡେଭିଡ୍ ୱାର୍ଣ୍ଣର ୪୮ (୫ଚୌକା, ୧ଛକା), ସାମ୍ ବିଲିଙ୍ଗ୍ସ ୨୦, ଓଲିଭର ଡେଭିସ୍ ୨୬ ରନ୍ କରିଥିଲେ । ହରିକେନ୍ସ ପକ୍ଷରୁ ରିଲି ମେରେଡିଥ୍ ଓ ନାଥାନ ଏଲିସ୍ ପ୍ରତ୍ୟେକ ୩ଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ ।
୧୮୩ରନ୍ ବିଜୟ ଲକ୍ଷ୍ୟର ପିଛା କରି ହରିକେନ୍ସ ୩୫ଟି ବଲ୍ ବାକି ଥାଇ ୩ ୱିକେଟ୍ ବିନିମୟରେ ଆବଶ୍ୟକ ରନ୍ ସଂଗ୍ରହ କରି ନେଇଥିଲା । ଦଳ ପକ୍ଷରୁ ଓୱେନ ୪୨ଟି ବଲ୍ରୁ ୧୦୮ରନ୍ର ଧୂଆଁଧାର ଇନିଂସ୍ ଖେଳିଥିଲେ । ତାଙ୍କ ଇନିଂସ୍ରେ ୬ଟି ଚୌକା ଓ ୧୧ଟି ଛକା ସାମିଲ ରହିଥିଲା । ଅନ୍ୟମାନଙ୍କ ମଧ୍ୟରେ ବେନ୍ ମ୍ୟାକ୍ଡର୍ମୋଟ ଅପରାଜି୩ ୧୮, ମାଥ୍ୟୁ ୱେଡ୍ ଅପରାଜିତ ୩୨ (୫ଚୌକା, ୧ଛକା) ରନ୍ କରିଥିଲେ ।
