ନୂଆଦିଲ୍ଲୀ: ଦେଶରେ ମହଙ୍ଗା ମାଡ଼ । ଡାଲି ଓ ପନିପରିବା ଦର ଆକାଶଛୁଆଁ ହୋଇଥିବା ବେଳେ ଏବେ ଆଳୁ ଆହୁରି ଚିନ୍ତା ବଢ଼ାଇ ଦେଇଛି । ସାଧାରଣ ଲୋକଙ୍କ ରୋଷେଇ ଘରୁ ଉଭାନ ହେବାକୁ ଲାଗିଲାଣି ଆଳୁ । ଟମାଟୋ ଓ ପିଆଜ ପରେ ଏବେ ଅତ୍ୟାବଶ୍ୟକ ପରିବା ଭାବେ ଜଣାଶୁଣା ଆଳୁ ଗାଏବ ହେବାକୁ ବସିଛି । କିନ୍ତୁ ଏବେ ସରକାର ନୂଆ ଯୋଜନା କରିଥିବା କୁହାଯାଉଛି । ଖୁବଶୀଘ୍ର ଲୋକଙ୍କୁ ମିଳିବ ଭୁଟାନ ଆଳୁ । ବର୍ଦ୍ଧିତ ଦର ଉପରେ ନିୟନ୍ତ୍ରଣ ଆଣିବା ଲାଗି ସରକାର ପଡ଼ୋଶୀ ଦେଶ ଭୁଟାନରୁ ଆଳୁ ଆମଦାନି ବଢ଼ାଇବେ । ଫଳରେ ଲୋକଙ୍କୁ ଶସ୍ତାରେ ଆଳୁ ମିଳିପାରିବ ।
ଦେଶରେ ଆଳୁ ଉତ୍ପାଦନ କମ୍ ଥିବାରୁ ସ୍ଥିତି ବିଗିଡ଼ିବା ପୂର୍ବରୁ ସରକାର ଭୁଟାନ ପାଖରୁ ଆଳୁ ଆମଦାନି କରିପାରନ୍ତି । ଜଣେ ବରିଷ୍ଠ ସରକାରୀ ଅଧିକାରୀଙ୍କ ଅନୁସାରେ, ଭାରତରେ ଆଳୁର ଚାହିଦାକୁ ଦେଖି ସରକାର ଭୁଟାନରୁ ଆମଦାନି ପାଇଁ ଖୁବଶୀଘ୍ର ମଞ୍ଜୁରି ଦେଇପାରନ୍ତି । ଏପରିକି ଅନ୍ୟ ଦେଶରୁ ମଧ୍ୟ ଆଳୁ ଆମଦାନି ଉପରେ ବିଚାର କରାଯାଉଛି ବୋଲି ସେ କହିଛନ୍ତି ।
ଗତବର୍ଷ ଭୁଟାନରୁ ଆଳୁ ଆମଦାନି ପାଇଁ ସରକାର ଅନୁମତି ଦେଇଥିଲେ । ଫଳରେ ବ୍ୟବସାୟୀ ବିନା ଲାଇସେନ୍ସରେ ଭୁଟାନରୁ ଆଳୁ କିଣୁଥିଲେ । କିନ୍ତୁ ଏହି ସମୟସୀମା ଜୁନ ୨୦୨୪ରେ ସମାପ୍ତ ହୋଇଯାଇଛି । ଏବେ ବ୍ୟବସାୟୀଙ୍କୁ କମ୍ ପରିମାଣରେ ଆଳୁ କିଣିବା ଲାଗି ସରକାର ଅନୁମତି ଦେଇପାରନ୍ତି ବୋଲି ଚର୍ଚ୍ଚା ହେଉଛି । ସେପଟେ ଏଥର ପଶ୍ଚିମବଙ୍ଗ ଏବଂ ଉତ୍ତର ପ୍ରଦେଶରେ ପ୍ରତିକୂଳ ଜଳବାୟୁ ଫଳରେ ଆଳୁ ଉତ୍ପାଦନ କମ୍ ହୋଇଛି । ଫଳରେ ଆଳୁ ଦାମ ବଢ଼ିବାରେ ଲାଗିଛି ।
ଆଳୁ ଉତ୍ପାଦନ କରିବା ମାମଲାରେ ଭାରତ ଦ୍ବିତୀୟ ସ୍ଥାନରେ ରହିଛି । ଭାରତ ଆଗରେ କେବଳ ଚୀନ୍ ରହିଛି । ଗତବର୍ଷ ଭାରତରେ ୬୦.୧୪ ମିଲିୟନ ଟନ ଆଳୁ ଉତ୍ପାଦନ ହୋଇଥିଲା । ଚଳିତବର୍ଷ ଆଳୁ ଉତ୍ପାଦନ ୫୮.୯୯ ଟନ୍ ରହିପାରେ ବୋଲି କୃଷି ମନ୍ତ୍ରାଳୟ ଆକଳନ କରିଥିଲା । ପ୍ରମୁଖ ଆଳୁ ଉତ୍ପାଦନକାରୀ ରାଜ୍ୟ ପଞ୍ଚିମବଙ୍ଗ ଏବଂ ଉତ୍ତର ପ୍ରଦେଶରେ ଚାଷ ପ୍ରଭାବିତ ହୋଇଛି । ଫଳରେ ପିଆଜ ଏବଂ ଟମାଟୋ ଭଳି ଆଳୁର ଦର ବୃଦ୍ଧି ଘଟିଛି । ସେପଟେ ଆଳୁ ଦାମ ଅକ୍ଟୋବର ମାସରେ କମିପାରେ ବୋଲି କୁହାଯାଉଛି । ଦେଶରେ ଏବେ ଆଳୁ କିଲୋ ପିଛା ୫୦ ଟଙ୍କା ତଳେ ରହିଛି । ଦିଲ୍ଳୀରେ ୪୦ ଟଙ୍କା ଥିବା ବେଳେ ନୋଏଡାରେ ୪୪ ଟଙ୍କାରେ ବିକ୍ରି ହେଉଛି ଆଳୁ ।