ନୂଆଦିଲ୍ଲୀ: କର୍ଣ୍ଣାଟକର ରାଜଧାନୀ ବେଙ୍ଗାଲୁରୁରେ ଏକ ହୃଦୟ ବିଦାରକ ଦୁର୍ଘଟଣା ଘଟିଛି। ସହରର ନେଲମଙ୍ଗଲା ଅଞ୍ଚଳରେ ଏକ ଭଲଭୋ କାର ଉପରେ ଏକ କଣ୍ଟେନର ଟ୍ରକ ଓଲଟି ପଡ଼ିବା କାରଣରୁ ୬ ଜଣଙ୍କର ମୃତ୍ୟୁ ଘଟିଛି। କୁହାଯାଉଛି କି କାରରେ ଏକ ଟେକ୍ କମ୍ପାନୀର ସିଇଓ ଥିଲେ, ଯିଏ ତାଙ୍କ ପରିବାର ସହିତ ବିଜୟପୁରକୁ ଯାଉଥିଲେ। ସୂଚନା ଅନୁଯାୟୀ, ଏହି ଦୁର୍ଘଟଣାରେ ସମସ୍ତ ୬ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି । ଏହି ଦୁର୍ଘଟଣା ଯୋଗୁଁ କିଛି ସମୟ ପାଇଁ ରାସ୍ତା ଜାମ୍ ହୋଇଥିଲା। ଏହି ଘଟଣାରେ ଟ୍ରକର ଡ୍ରାଇଭରଙ୍କ ବିବୃତ୍ତି ମଧ୍ୟ ସାମ୍ନାକୁ ଆସିଛି।
ଜଣେ ପୋଲିସ ଅଧିକାରୀ କହିଛନ୍ତି ଯେ, ଟ୍ରକଟି କାର ଉପରେ ପଡିଯାଇଥିଲା ଯେଉଁଥିପାଇଁ କାରଟି ସମ୍ପୂର୍ଣ୍ଣ ନଷ୍ଟ ହୋଇଯାଇଛି ଏବଂ ଏଥିରେ ବସିଥିବା ଲୋକଙ୍କ ମୃତଦେହ ମଧ୍ୟ କ୍ଷତବିକ୍ଷତ ହୋଇଯାଇଛି । ପୋଲିସ ଦେଇଥିବା ସୂଚନା ଅନୁଯାୟୀ ବେଙ୍ଗାଲୁରୁ ଉପକଣ୍ଠରେ ଥିବା ତାଲେକେର ନିକଟ ନେଲମଙ୍ଗାଲାରେ ଏହି ଦୁର୍ଘଟଣା ଘଟିଛି ।
ଏହି ଭୟଙ୍କର ଦୁର୍ଘଟଣା ଘଟାଇଥିବା ଟ୍ରକ ଡ୍ରାଇଭର ଆରିଫ୍ କହିଛନ୍ତି ଯେ,“ମୋ ଟ୍ରକ୍ ସାମ୍ନାରେ ଏକ କାର୍ ଯାଉଥିଲା ଏବଂ କାର୍ ଡ୍ରାଇଭର ହଠାତ୍ ବ୍ରେକ୍ ଲଗାଇଥିଲେ। ଯେଉଁଥିପାଇଁ ମୁଁ ମୋ ଗାଡିର ନିୟନ୍ତ୍ରଣ ହରାଇଲି। ସେତେବେଳେ ମୁଁ ଘଣ୍ଟା ପ୍ରତି ୪୦ କିଲୋମିଟର ବେଗରେ ଚଳାଉଥିଲି । କାରକୁ ବଞ୍ଚାଇବା ପାଇଁ ମୁଁ ଷ୍ଟିଅରିଂକୁ ରାସ୍ତାର ଡାହାଣ ପାର୍ଶ୍ୱରେ ଥିବା ଡିଭାଇଡର୍ ଆଡକୁ ବୁଲାଇଥିଲି । କିନ୍ତୁ ତା’ପରେ ମୁଁ ଆଉ ଏକ କାର ଦେଖିଲି ଏବଂ ପୁନର୍ବାର ଟ୍ରକକୁ ବାମକୁ ବୁଲାଇଲି। ଏହି କାରଣରୁ ଟ୍ରକଟି ଓଲଟି ପଡିଥିଲା, ଟ୍ରକଟି ଇସ୍ପାତ ସାମଗ୍ରୀରେ ଭର୍ତ୍ତି ହୋଇଥିଲା। ”
ଏହି ଦୁର୍ଘଟଣା ସମ୍ପର୍କରେ ପୋଲିସର ବିବୃତ୍ତି ମଧ୍ୟ ପ୍ରକାଶ ପାଇଛି। ପୋଲିସର କହିବାନୁସାରେ ଏହି ଘଟଣାର ତଦନ୍ତ ଚାଲୁଛି । ଦୁର୍ଘଟଣାର କାରଣ ଜାଣିବା ପାଇଁ ବିସ୍ତୃତ ଅନୁସନ୍ଧାନ କରାଯାଉଛି। ନିକଟସ୍ଥ ସିସିଟିଭି କ୍ୟାମେରା ମଧ୍ୟ ଯାଞ୍ଚ କରାଯାଉଛି।
