ଚନ୍ଦାହାଣ୍ଡି,୧୦/୯ : ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକରେ ଗଣପର୍ବ ନୁଆଁଖାଇ ବାସି ପର୍ବ ପାଳନ ହୋଇଛି l ମଙ୍ଗଳବାର ଘରେ ଘରେ ମାଛ ମାଂସର ଆସର ଜମାଇବା ସହ ଯାକ ଜକମର ସହ ପାଳନ କରିଛନ୍ତି l ଖାଇ ପିଇ ସାରି ଅତ୍ୟନ୍ତ ହସ ଖୁସି ମନରେ ସାହି ପଡ଼ିଶା ଉଭୟେ ମହିଳା ଏବଂ ପୁରୁଷମାନେ ଏକତ୍ରିତ ହୋଇ ପରସ୍ପରକୁ ନୁଆଁଖାଇ ଜୁହାର ଭେଟ କରିଥିଲେ । ଏହାସହ ପାରମ୍ପରିକ ବାଦ୍ୟ ବାଜଣା ସହ ଗ୍ରାମର ମୁଖିଆଙ୍କ ଘରକୁ ନୁଆଁଖିଆ ଜୁହାର ଭେଟ (ଜୁହାରେନ) ଯାଇଥିଲେ l
ଗ୍ରାମ ମୁଖିଆ ସମସ୍ତ ରଇତ (ଚାଷୀ )ମାନଙ୍କୁ ସ୍ୱାଗତ କରିବା ସହ ଚୁଡା ଖାଇବାକୁ ଦେଇ ସମସ୍ତଙ୍କ ସହ ଜୁହାର ଭେଟ ହୋଇଥିଲେ । ପରେ ସମସ୍ତ ରଇତମାନଙ୍କୁ ଚଳିତ ବର୍ଷର ଚାଷ, ସ୍ୱାସ୍ଥ୍ୟ, କିପରି ରହିଛି ସେ ସମ୍ପର୍କରେ ପଚାରିବା ସହ ଆଗାମୀ ଜାନି ଯାତ୍ରା କିପରି ଭାବେ ପାଳନ କରାଯିବ ସେ ସମ୍ପର୍କରେ ସେମାନଙ୍କୁ ପଚାରିବୁଝିବା ସହ ତାଙ୍କ ମତାମତ ଏବଂ ସହଯୋଗ କାମନା କରିଥିଲେ l
ଗାଁରେ ଯୁବକ ଯୁବତୀମାନଙ୍କ ମଧ୍ୟରେ ବିଭିନ୍ନ ଖେଳ କସରତ ଅନୁଷ୍ଠିତ ହେବା ସହ ଲୋକମାନଙ୍କ ମନୋରଞ୍ଜନ, ପାଇଁ ଘୁମୁରା ନୃତ୍ୟ, ରେକର୍ଡ ଡ୍ୟାନ୍ସ ନୃତ୍ୟ ଅନୁଷ୍ଠିତ ହୋଇଥିଲା l ଏଥିରେ ଏକ ନିବିଡ଼ ଭାଇ ଚାରା ସୃଷ୍ଟି ହେଉଥିବା ଦେଖିବାକୁ ମିଳିଥିଲା l ଚଳିତ ବର୍ଷ ଚନ୍ଦାହାଣ୍ଡି ଅଞ୍ଚଳରେ ଭଲ ବର୍ଷା ହେବା ସହ ଫସଲ ଭଲ ହୋଇଥିବାରୁ ଚାଷୀଙ୍କ ମନ ଅତ୍ୟନ୍ତ ଖୁସି ରହିଥିବା ନେଇ ସେମାନେ ସୂଚନା ଦେଇଛନ୍ତି l
ପ୍ରକାଶ ଯେ, ଚଳିତ ବର୍ଷ ନୂଆଖିଆ ବାସି ତିହାର ସୋମବାର ପଡି ଥିବାରୁ ମାଛ ମାଂସ ଖାଇବା ହିନ୍ଦୁ ଧର୍ମରେ ନିଷେଧ ଥିବାରୁ ମଙ୍ଗଳବାର ବାସି ତିହାର ମନା ଯାଇଛି ।