ପୁରୀ, ୧୦/୧୦ : ବୁଧବାର ଉତ୍କଳମଣି ଗୋପବନ୍ଧୁ ଦାସଙ୍କ ଜୟନ୍ତୀ ଥିଲା । ଓଡ଼ିଆ ଅସ୍ମିତାର ସୂତ୍ରଧର ଉତ୍କଳମଣି ପଣ୍ଡିତ ଗୋପବନ୍ଧୁ ଦାସ, ଆଚାର୍ଯ୍ୟ ହରିହର ଦାସ, ପଣ୍ଡିତ ନୀଳକଣ୍ଠ ଦାସ, କୃପାସିନ୍ଧୁ ମିଶ୍ର, ଗୋଦାବରିଶ ମିଶ୍ରଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବାକୁ ସମସ୍ତେ ଭୁଲି ଗଲେ । ଏହି ପଞ୍ଚାଶଖାଙ୍କ ମଣିଷଗଢ଼ା କାରଖାନା ବକୁଳବନ ବିଦ୍ୟାଳୟରେ ଏଭଳି ଲଜ୍ଜାଜନକ ଘଟଣା ଘଟିଛି । ଏଠାରେ ପଞ୍ଚାଶଖାଙ୍କ ପୂଜନ ଓ ସମ୍ମାନ ଦିଆଯିବ ବୋଲି ଶୁକ୍ରବାର ଜିଲ୍ଲା ପ୍ରଶାସନ ପକ୍ଷରୁ ଗଣମାଧ୍ୟମକୁ ସୂଚିତ କରାଯାଇଥିଲା । ହେଲେ ପୂଜନ ଓ ସମ୍ମାନ ଦିଆଯିବା ଦୂରକଥା ପଞ୍ଚଶଖାଙ୍କ ପ୍ରତିମୂର୍ତ୍ତି ଚାରିପାର୍ଶ୍ୱ ଅନାବନା ଗଛକୁ ସଫେଇ କରିବାକୁ ପ୍ରଶାସନ ପଦକ୍ଷେପ ନେଲାନି । ଅପରାହ୍ନ ୪ଟାରେ କିଛି ସାମାଜିକ କର୍ମୀ ଓ ସ୍ୱାଧୀନତା ସଂଗ୍ରାମୀ ପଞ୍ଚଶଖା ପୂଜନ ନିମନ୍ତେ ଏଠାରେ ପହଞ୍ଚି ପ୍ରତିମୂର୍ତ୍ତିଗୁଡ଼ିକ ଅବ୍ୟବସ୍ଥାରେ ପଡ଼ିଥିବା ଦେଖି ହତବାକ୍ ହୋଇଥିଲେ । ନିଜ ସାଧ୍ୟ ମୁତାବକ ପ୍ରତିମୂର୍ତ୍ତି ସ୍ଥଳ ସଫେଇ କରିଥିଲେ । ଉତ୍କଳମଣିଙ୍କ ପ୍ରତିମୂର୍ତ୍ତି ଅନାବନା ଗଛ ଭିତରେ ରହିଥିବା ବେଳେ ପ୍ରତିମୂର୍ତ୍ତି ଦେହରୁ ରଙ୍ଗ ଛାଡ଼ି ବିବର୍ଣ୍ଣ ଦିଶୁଥିଲା ।
ସେହିପରି ଗୋଦାବରିଶଙ୍କ ପ୍ରତିମୂର୍ତ୍ତି ଉପରେ ଚଢ଼େଇ ମଳତ୍ୟାଗ କରି ବିବର୍ଣ୍ଣ କରିଦେଇଛନ୍ତି । ଅନ୍ୟ ମହାପୁରୁଷଙ୍କ ପ୍ରତିମୂର୍ତ୍ତିଗୁଡ଼ିକ ମଧ୍ୟ ସମାନ ଅବ୍ୟବସ୍ଥାରେ ରହିଥିଲା । ଏଠାକୁ ପହଞ୍ଚି ପୁଷ୍ପମାଲ୍ୟ ଦେବା ଅସମ୍ଭବ ହେବାରୁ ଅନେକ ପୁରୁଖା ସ୍ୱାଧୀନତା ସଂଗ୍ରାମୀ ଘରକୁ ଫେରି ଯାଇଥିଲେ । ସ୍ୱାଧୀନତା ଆନ୍ଦୋଳନ ସମୟରେ ଶିକ୍ଷା ଓ ସଂଗ୍ରାମର ଚେତନା ଜାଗ୍ରତ କରିବା ନିମନ୍ତେ ଉତ୍କଳମଣି ସମେତ ପଞ୍ଚଶଖା ଗଢ଼ିଥିଲେ ଏହି ବକୁଳବନ ବିଦ୍ୟାଳୟ । ଉତ୍କଳମଣିଙ୍କ ଜନ୍ମ ଦିନରେ ଏହା ପରିସରରେ ଥିବା ପଞ୍ଚଶଖାଙ୍କ ପ୍ରତିମୂର୍ତ୍ତିକୁ ଧୂପଦୀପ ଫୁଲ ଦେଇ ସମ୍ମାନ ଜଣାଇବା ଦୂର କଥା ପୂରା ଭୁଲିଗଲେ । ବକୁଳବନ ବିଦ୍ୟାଳୟ ସମ୍ମୁଖ ସ୍ମୃତି ସ୍ଥଳକୁ ନେତା, ମନ୍ତ୍ରୀ, ପ୍ରଶାସକ ଆସିଥିଲେ ହେଁ ବକୁଳବନ ବିଦ୍ୟାଳୟ ପରିସରରେ କାହାରି ପାଦ ପଡ଼ି ନ ଥିଲା । ଏନେଇ କ୍ଷୋଭ ପ୍ରକାଶ କରିଛନ୍ତି ସାମାଜିକ କର୍ମୀ ତନ୍ମୟ ଚାଟ୍ଟାର୍ଜୀ ଏବଂ ଚନ୍ଦ୍ରଶେଖର ମିଶ୍ର । ପୁରୀରୁ ଶ୍ରଦ୍ଧାଞ୍ଜଳି ଦେବାକୁ ଯାଇଥିବା ବେଳେ ଏଭଳି ଅବ୍ୟବସ୍ଥା ଦେଖି ଅସନ୍ତୋଷ ବ୍ୟକ୍ତ କରିଛନ୍ତି ।
୨୦୨୨-୨୩ ବକୁଳବନ ଓ ଏହି ପାରିପାଶ୍ୱିର୍କ ଉନ୍ନତୀକରଣ ନିମନ୍ତେ ପ୍ରଥମ ପର୍ଯ୍ୟାୟରେ ପ୍ରାୟ ୯ କୋଟି ୪୮ ଲକ୍ଷରୁ ଅଧିକ ଟଙ୍କା ମଞ୍ଜୁର ହୋଇଥିବା ବେଳେ ୬ କୋଟି ୯୧ ଲକ୍ଷ ଟଙ୍କାରୁ ଅଧିକ ଖର୍ଚ୍ଚ ସରିଲାଣି । ପ୍ରାୟ ୨୦ ଏକର ଜମିରେ ବ୍ୟାପ୍ତ ଏହି ବକୁଳବନରେ ଦଶନ୍ଧି ତଳେ ହୋଇଥିବା ଚଲାପଥ, ଆଲୋକ ବ୍ୟବସ୍ଥା ସମ୍ପୂର୍ଣ୍ଣ ଭୁଶୁଡ଼ି ପଡ଼ିଛି । ମୁକ୍ତାକାଶ ରଙ୍ଗମଞ୍ଚ ମାଟିରେ ଲୋଟିଛି । ସନ୍ଧ୍ୟା ହେଲେ ଏହା ତଳେ ହୋଇଥିବା ଘର ଓ ପିଣ୍ଡିଗୁଡ଼ିକ ନିଶାଖୋରଙ୍କ ଆଡ୍ଡା ସ୍ଥଳ ପାଲଟୁଛି ।
