ସାଲେପୁର, ୮।୧୨: ଲୁଟେରାମାନଙ୍କ ଟାର୍ଗେଟ୍ରେ ମଠ-ମନ୍ଦିର । ଗୁରୁବାର ବିଳମ୍ବିତ ରାତିରେ କଟକ ଜିଲ୍ଲା ସାଲେପୁର ଥାନା ଓଡାସିଂ ପଞ୍ଚାୟତ କଟିକଟା ଦୁଇଟି ଶିବ ମନ୍ଦିରରୁ ତାଲା କାଟି ଚୋରି ଉଦ୍ୟମ । ଗାଁ ଲୋକ ଉଠିଯିବାରୁ ଘଟଣାସ୍ଥଳରୁ ଲୁଟେରା ଫେରାର ହୋଇଯାଇଥିବା ଜଣାପଡ଼ିଛି । ଶନିବାର ବିଳମ୍ବିତ ରାତିରେ ମନ୍ଦିରର ତାଲା ଭାଙ୍ଗିଥିଲେ ଲୁଟେରା । ହେଲେ ଲୁଟ୍ କରିବା ସମୟରେ ସ୍ଥାନୀୟ ଲୋକଙ୍କ ପାଟି ଶୁଣି ଘଟଣାସ୍ଥଳରେ ଚମ୍ପଟ୍ ମାରିଥିଲେ । ଅନ୍ୟ ଏକ ଶିବ ମନ୍ଦିରରୁ ଲୁଟ୍ କରିଥିବା ଦୁଇଟି ରୂପା ମୁକୁଟ, ଏକ ହଳ ରୂପା ପାଦୁକା, ଦୁଇଟି ରୂପା ହାର, ଏକ କଟର, କିଛି ରେଜା ଟଙ୍କା, ଇମିଟେସନ ହାର ସହ ଏକ ବାଇକ୍ ଛାଡ଼ି ଘଟଣାସ୍ଥଳରୁ ଫେରାର ହୋଇଯାଇଥିଲେ ଲୁଟେରା ।
ଘଟଣାସ୍ଥଳରେ ସାଲେପୁର ଥାନା ଜପକୂଦ ପୋଲିସ ପହଞ୍ଚି ସମସ୍ତ ଜିନିଷ ସହ ବାଇକକୁ ଜବତ କରି ତଦନ୍ତ ଚଳାଇଥିବା ବେଳେ ଏପର୍ଯ୍ୟନ୍ତ କୌଣସି ଲୁଟେରାଙ୍କ ଟେର୍ ପାଇପାରିନାହିଁ । ମନ୍ଦିରରୁ ଲୁଟ୍ ଘଟଣା ସାଲେପୁର ଅଞ୍ଚଳରେ ବାରମ୍ବାର ହୋଇ ଆସୁଥିବା ବେଳେ ସାଲେପୁର ଥାନା ଜପକୂଦ ଫାଣ୍ଡି ମାଳଶାସନ ଗ୍ରାମରୁ ମନ୍ଦିରରୁ ଦୁଇଦିନ ତଳେ ଚୋରି ଘଟଣାରେ ପୋଲିସ କୌଣସି ଲୁଟେରାଙ୍କୁ ଧରିବାରେ ସଫଳ ହୋଇନାହିଁ । ପୋଲିସ ଲୁଟେରାଙ୍କୁ ଧରିବାରେ ସଫଳ ହୋଇନାହିଁ । ଯାହାକୁ ନେଇ ଜନସଧାରଣଙ୍କ ମନରେ ଅସନ୍ତୋଷ ଦେଖାଦେଇଛି ।
