ଭୁବନେଶ୍ଵର, ୧୧/୧୧ : ଦଳବଦଳ ବୟାନବାଜିକୁ ନେଇ ପୁଣି ରାଜନୀତି ସରଗରମ। ମୁନା ଖାଁ, ଜୟ ନାରାୟଣ ମିଶ୍ରଙ୍କ ପରେ ଏବେ ସ୍ଵର ମିଳାଇଲେ ବିଜେଡିର ବରିଷ୍ଠ ନେତା ଅତନୁ ସବ୍ୟସାଚୀ ନାୟକ। ବିଜେଡି ପଦଯାତ୍ରା ବେଳେ ଅତନୁ ସବ୍ୟସାଚୀଙ୍କ ବୟାନକୁ ନେଇ ଚର୍ଚ୍ଚା ଜୋର ଧରିଛି। ରବିବାର ମହାକାଳପଡା ବ୍ଲକ ବିଜେଡି ପଦଯାତ୍ରା ସଭାରେ ଯୋଗଦେଇ ଅତନୁ କହିଛନ୍ତି ଯେ, ବିଜେଡି ପୁଣି ସରକାରକୁ ଫେରିବ। ଏଥିପାଇଁ ଯୋଜନା ଚାଲିଛି। କଂଗ୍ରେସକୁ ସାଥିରେ ନେଇ ବିଜେଡି ସରକାର ଗଢ଼ିବ ଏବଂ ସ୍ଵାଧୀନ ବିଧାୟକ ସମର୍ଥନ କରିବେ।

କେବଳ ସେତିକି ନୁହେଁ ରାଜନୀତି ଗଣିତ ବି ବୁଝାଇଦେଇଛନ୍ତି ଅତନୁ। ସେ କହିଛନ୍ତି ଯେ, ବିଜେଡିର ସଂଖ୍ୟା ୫୧, କଂଗ୍ରେସର ୧୪, ୩ ସ୍ଵାଧୀନ ଓ ଅବଶିଷ୍ଟ ୧୦ ବିଧାୟକ ଯୋଗାଡ଼ ହୋଇଯିବେ। ତେବେ ଅତନୁଙ୍କ ଏଭଳି ମନ୍ତବ୍ୟ ପରେ ଏବେ ପ୍ରଶ୍ନ ଉଠୁଛି ଯେ, କଂଗ୍ରେସ ଓ ବିଜେଡି ଭିତରେ କଣ ମେଣ୍ଟ ନେଇ ଚର୍ଚ୍ଚା ଚାଲିଛି ? ଅଣ କଂଗ୍ରେସ ରାଜନୀତିରୁ ଆରମ୍ଭ ହୋଇଥିବା ବିଜେଡି କଣ କ୍ଷମତାକୁ ଫେରିବାକୁ କଂଗ୍ରେସର ହାତ ଧରିବ । 

ତେବେ ରାଜ୍ୟରେ ସଂଖ୍ୟା ଗରିଷ୍ଠତା ପାଇଁ କଂଗ୍ରେସ ବିଜେଡି ଏକ ହେଲେବି ସଂଖ୍ୟା ଅଣ୍ଟୁନି। ଏଥିପାଇଁ ୧୦ ବିଜେପି ବିଧାୟକଙ୍କ ସମର୍ଥନ ଦରକାର। ଏବେ ପ୍ରଶ୍ନ ଉଠୁଛି କଣ ବିଜେପିରୁ ୧୦ ବିଧାୟକଙ୍କୁ ନିଜ ପକ୍ଷକୁ ନେବାରେ ସକ୍ଷମ ହେବ ବିଜେଡି ? ଏମିତି ଅସମାହିତ ପ୍ରଶ୍ନକୁ ନେଇ ରାଜ୍ୟ ରାଜନୀତି ଏବେ ସରଗରମ।