ନୂଆଦିଲ୍ଲୀ: ଦିଲ୍ଲୀର ୪୦ଟି ସ୍କୁଲକୁ ବୋମା ବିସ୍ଫୋରଣର ଧମକ ମିଳିଛି। ଏହାକୁ ନେଇ ଅରବିନ୍ଦ କେଜ୍ରିୱାଲ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, 'ଆଜି ଦିଲ୍ଲୀର ୪୦ ଟି ସ୍କୁଲକୁ ବୋମା ବିସ୍ଫୋରଣ ଧମକ ଆସିଛି। ଦିନକୁ ଦିନ ଆଇନ ଶୃଙ୍ଖଳା ଖରାପ ହେବାରେ ଲାଗିଛି। ମହିଳାମାନେ ସବୁ ସ୍ଥାନରେ ଅସୁରକ୍ଷିତ ଅଟନ୍ତି। ବର୍ତ୍ତମାନ ପିଲାମାନେ ମଧ୍ୟ ସୁରକ୍ଷିତ ନୁହଁନ୍ତି। ଦିଲ୍ଲୀର ଲୋକମାନେ ଏଭଳି ଘଟଣା କେବେ ଦେଖି ନାହାଁନ୍ତି। ଏହି ପରି ଧମକ ପିଲା ଏବଂ ସେମାନଙ୍କ ପିତାମାତା ଉପରେ କିଭଳି ପ୍ରଭାବ ପକାଇବ ତାହା କେବଳ କଳ୍ପନା କରାଯାଇପାରେ ।
କେଜ୍ରିୱାଲ କହିଛନ୍ତି, 'ସ୍କୁଲ, ମଲ୍, ବିମାନବନ୍ଦର, ସମସ୍ତଙ୍କୁ ବୋମାର ଧମକ ମିଳୁଛି । ମୁଁ ଅମିତ ଶାହାଙ୍କୁ ପଚାରିବାକୁ ଚାହେଁ, ଆପଣ ଦିଲ୍ଲୀର ଲୋକଙ୍କ ସୁରକ୍ଷା ପାଇଁ କଣ କରୁଛନ୍ତି, ଏହା ମଧ୍ୟ ଆପଣଙ୍କର ଦାୟିତ୍ବ । ଆପଣ ଦିଲ୍ଲୀର ଲୋକଙ୍କ ମଧ୍ୟରେ ଆସନ୍ତୁ ଏବଂ ଆପଣ କ’ଣ କରୁଛନ୍ତି ତାହା କୁହନ୍ତୁ । ଏଥର ନିର୍ବାଚନ ପୂର୍ବରୁ ମୁଁ ପ୍ରଧାନମନ୍ତ୍ରୀ ମୋଦୀଙ୍କ ବଦଳରେ ଅମିତ ଶାହାଙ୍କ ଉପରେ ପ୍ରଶ୍ନ ଉଠାଉଛି । କାରଣ ଦାୟିତ୍ୱ ଗୃହମନ୍ତ୍ରୀଙ୍କ ଉପରେ ଅଛି ଏବଂ ଏହା ମଧ୍ୟ ସ୍ପଷ୍ଟ ହେଉ ଯେ ଏହା ପଛରେ କୌଣସି ରାଜନୀତି ନାହିଁ।
କେଜ୍ରିୱାଲ କହିଛନ୍ତି ଯେ ଗତ ଏକ ବର୍ଷ ମଧ୍ୟରେ ସବୁଆଡେ ବୋମା ବିସ୍ଫୋରଣର ଧମକ ଆସୁଛି। ଦିଲ୍ଲୀର ଲୋକମାନେ ପୂର୍ବରୁ ଏପରି ଘଟଣା ଦେଖି ନଥିଲେ। ଏପରି ଧମକ ଯୋଗୁଁ ଲୋକମାନେ ଭୟଭୀତ ହେଉଛନ୍ତି । ଅମିତ ଶାହାଙ୍କୁ ଦିଲ୍ଲୀର ଲୋକଙ୍କୁ ଆଶ୍ୱାସନା ଦେବାକୁ ପଡିବ ଏବଂ ସେ କିପରି ଦିଲ୍ଲୀକୁ ସୁରକ୍ଷିତ ରଖୁଛନ୍ତି ତାହା ଜଣାଇବାକୁ ପଡ଼ିବ।
