ଦିଗପହଣ୍ଡି, ୧୪/୦୭ : ପୁଅ ବିବାହ କରିବାକୁ ମନା କରିବାରୁ ଚରମ ନିଷ୍ପତ୍ତି ନେଲେ ବାପା-ମାଆ । ଏଭଳି ଅଭାବନୀୟ ଘଟଣା ଘଟିଛି ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅଞ୍ଚଳରେ । ବାହାଘର ପାଇଁ ପୁଅକୁ ମନାଇବାରେ ବିଫଳ ହେବା ପରେ ଆତ୍ମହତ୍ୟା ପନ୍ଥା ବାଛି ନେଲେ ଦମ୍ପତି ।
ଦୁଇ ଦିନ ତଳେ ବ୍ରହ୍ମପୁର ରେଳ ଷ୍ଟେସନ ନିକଟରୁ ଜଣେ ପୁରୁଷ ଏବଂ ଜଣେ ମହିଳାଙ୍କ ମୃତଦେହ ରେଳବାଇ ଥାନା ପୁଲିସ ଉଦ୍ଧାର କରିଥିଲା । ସେତେବେଳେ ସେମାନଙ୍କ ପରିଚୟ ଅସ୍ପଷ୍ଟ ରହିଥିଲା । ତେବେ ଛାନଭୀନ ପରେ ଆତ୍ମହତ୍ୟା କରିଥିବା ଦମ୍ପତି ଦିଗପହଣ୍ଡି ଥାନା ଲକ୍ଷ୍ମୀନାରାୟଣପୁରର ଏମ୍ ରଞ୍ଜନ ଦୋରାଙ୍କ ବାପା-ମାଆ ବୋଲି ଜଣାପଡ଼ିଛି । ବାପା ଏମ୍ ସୁଦର୍ଶନ ଦୋରା ଏବଂ ମାଆ ଏମ୍. କୁମାରୀ ଦୋରା ପୁଅକୁ ବିବାହ ପାଇଁ କହିଥିଲେ । ହେଲେ ପୁଅ ଏମ୍. ରଞ୍ଜନ ଦୋରା ଯୋଗୀ ହେବାକୁ ଦୀକ୍ଷା ନେଇଥିବାରୁ ବିବାହ କରିବେ ନାହିଁ ବୋଲି ସିଧା ସିଧା ମନା କରିଦେଇଥିଲେ । ଏହାକୁ ନେଇ ପରିବାର ମଧ୍ୟରେ କଳହ ଲାଗିରହିଥିଲା । ବାପା-ମାଆ ପୁଅକୁ ବୁଝାଇବାରେ ଫେଲ୍ ମାରିବା ପରେ ଶେଷରେ କୀଟନାଶକ ପିଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଏହି ଘଟଣାକୁ ନେଇ ଗାଁରେ ଶୋକକୁଳ ପରିବେଶ ସୃଷ୍ଟି ହୋଇଛି।
