ବଡ଼ବିଲ, ୧୪/୦୭ : ପାରିବାରିକ କଳହର କରୁଣ ପରିଣତି। ସ୍ତ୍ରୀକୁ ପିଟିପିଟି ହତ୍ୟା କଲା ସ୍ଵାମୀ। କେନ୍ଦୁଝର ଜିଲ୍ଲା ବଡ଼ବିଲ ରୁଙ୍ଗଟା ମାଇନ୍ସ କଲୋନୀରୁ ଏଭଳି ଅଭିଯୋଗ ସାମ୍ନାକୁ ଆସିଛି। ବଡ଼ବିଲ ପୁଲିସ ଅଭିଯୁକ୍ତ ସ୍ଵାମୀକୁ ଅଟକ ରଖି ପଚରାଉଚରା କରୁଛି।
ସୂଚନାନୁଯାୟୀ, ରୁଙ୍ଗଟା କମ୍ପାନୀର ଆସିଷ୍ଟାଣ୍ଟ ମ୍ୟାନେଜର ନୀଲ ପ୍ରସାଦ ଶର୍ମା ଓ ତାଙ୍କ ପତ୍ନୀ ନିର୍ମଳା ଶର୍ମାଙ୍କ ମଧ୍ୟରେ କଳହ ଲାଗିଥିଲା। ଏଥିରେ ଉତ୍ତ୍ୟକ୍ତ ହୋଇ ନୀଲ ପ୍ରସାଦ ତାଙ୍କ ସ୍ତ୍ରୀଙ୍କୁ ମାଡ଼ ମାରିଥିଲେ। ନିର୍ମଳାଙ୍କୁ ଆମ୍ବୁଲାନ୍ସରେ ବଡ଼ବିଲ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ବଡ଼ବିଲ ପୁଲିସ ଅଭିଯୁକ୍ତ ନୀଲ ପ୍ରସାଦ ଶର୍ମାଙ୍କୁ ଅଟକ ରଖି ତଦନ୍ତ ଚଳାଇଛି। ନିର୍ମଳାଙ୍କ ଶରୀରରେ ମାଡ଼ ଚିହ୍ନ ରହିଛି।
