ନୂଆପଡ଼ା,୧୪। ୦୭ : ନୂଆପଡ଼ା ରେଞ୍ଜ ଧରମବନ୍ଧା ପଞ୍ଚାୟତ କୋଦୋପାଲି ଗାଁରେ ବାଘ ଆତଙ୍କ। ଗାଁ ଚାରିପଟେ ଏକ କଲରାପତରିଆ ବାଘ ତାର ଛୁଆ ସହ ବୁଲୁଥିବା ଦେଖିବାକୁ ମିଳିଛି। ଏବେ ଚାଷ ଜମିରେ ବାଘର ପାଦ ଚିହ୍ନ ପଡ଼ିଥିବା ଦେଖି ଗାଁ ଲୋକେ ଆତଙ୍କିତ ହୋଇପଡ଼ିଛନ୍ତି।
ସୂଚନାନୁଯାୟୀ, ଗତ ଏକ ସପ୍ତାହ ହେବ ଧରମବନ୍ଧା ବିଟ୍ କୋଦୋପାଲି ଗାଁର ଉପରପଡ଼ାର ଚାରିପାଖେ ଏକ କଲରାପତରିଆ ବାଘ ତାର ଛୁଆ ସହ ବସ୍ତି ମୁହାଁ ହେଉଥିବା ଗାଁ ଲୋକେ ଅଭିଯୋଗ କରିଛନ୍ତି। ପ୍ରତିଦିନ ସନ୍ଧ୍ୟାରେ ଗାଁ ନିକଟ ରାଣୀ ମା' ଢଙ୍ଗଳରୁ ଏହି ବାଘଟି ତାର ଛୁଆ ସହ ଖାଦ୍ୟ ଅନ୍ଵେଷଣରେ ଗାଁ ଚାରିପାଖରେ ପଇଁତରା ମାରୁଛି। ଦୁଇ ଦିନ ତଳେ ଗାଁ ଲୋକେ ଠେଙ୍ଗାବାଡ଼ି ଧରି ବାଘଟିକୁ ଘଉଡ଼ାଇବାରୁ ସେ ବ୍ରାହ୍ମଣୀ ନାଲାକୁ ଚାଲିଯାଇଥିଲା। ଏବେ ଗାଁର କମଲ ଠାକୁରଙ୍କ ଚାଷଜମିରେ ଥିବା ମହୁଲ ଗଛ ମୂଳରେ ବାଘ ଓ ଛୁଆର ପାଦଚିହ୍ନ ପଡ଼ିଥିବା ଦେଖିବାକୁ ମିଳିଛି। ଫଳରେ ଗାଁ ଲୋକେ ଆତଙ୍କିତ ହୋଇପଡ଼ିଛନ୍ତି।
ସନ୍ଧ୍ୟା ପୂର୍ବରୁ ଗାଁ ଲୋକେ ବାଘ ଭୟରେ ତାଟି କବାଟ ବନ୍ଦ କରି ଘରେ ରହୁଛନ୍ତି । ରାତିରେ ଜାରୁରୀ କାମ ପଡ଼ିଲେ, ପାଖ ପଡ଼ୋଶୀକୁ ଡାକି ସାଙ୍ଗହୋଇ ଲାଇଟ୍ ଓ ଠେଙ୍ଗାବାଡ଼ି ଧରି ବାହାରୁଛନ୍ତି। ଅନ୍ୟପକ୍ଷେ ବନ ବିଭାଗ ତରଫରୁ କୌଣସି ପାଟ୍ରୋଲିଂ ବ୍ୟବସ୍ଥା ହୋଇନଥିବାରୁ ଗାଁ ଲୋକେ ଅସନ୍ତୋଷ ପ୍ରକାଶ କରିଛନ୍ତି ।
