ପଦ୍ମପୁର,୩୧/୦୭ : ପଦ୍ମପୁର ସହରର ଅନ୍ୱେଷା ହଷ୍ଟେଲରେ ଅଘଟଣ । ବିଳମ୍ବିତ ରାତିରେ ୧୪ ବର୍ଷୀୟ ଛାତ୍ରଙ୍କ ସନ୍ଦେହଜନକ ମୃତ୍ୟୁ । ହଷ୍ଟେଲ ଛାତରେ ଝୁଲୁଥିବା ଅବସ୍ଥାରେ ମୃତଦେହ ଉଦ୍ଧାର । ଛାତ୍ର ଜଣକ ଝାଙ୍କରପାଲି ଗାଁର ପ୍ରିନ୍ସ କୁମ୍ଭାର ।

ସୂଚନା ଅନୁଯାୟୀ, ଚୁଡାମଣି କୁମ୍ଭାରଙ୍କ ୧୪ ବର୍ଷିୟ ପୁଅ ପ୍ରିନ୍ସ କୁମ୍ଭାର । ଅନ୍ୱେଷା ହଷ୍ଟେଲରେ ରହି ପାଠ ପଢୁଥିଲେ। ସେ ମେଲଛାମୁଣ୍ଡା ଥାନା ଝାଙ୍କରପାଲି ଗାଁର ବାସିନ୍ଦା । କିନ୍ତୁ ମଙ୍ଗଳବାର ବିଳମ୍ବିତ ରାତିରେ ହଷ୍ଟେଲ ପାଇଖାନାରୁ ପ୍ରିନ୍ସଙ୍କୁ ହଷ୍ଟେଲ ଛାତରେ ଝୁଲୁଥିବାର ଦେଖିବାକୁ ମିଳିଥିଲା । ଏହା ଦେଖି ତାଙ୍କୁ ସଙ୍ଗେସଙ୍ଗେ ପଦ୍ମପୁର ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । 

ଅନ୍ୟପଟେ ପ୍ରିନ୍ସଙ୍କ ପରିବାର ଲୋକେ ଏହି ମୃତ୍ୟୁକୁ ସହଜରେ ଗ୍ରହଣ କରି ପାରୁ ନାହାନ୍ତି । ଏଥି ସହିତ ଏହି ମୃତ୍ୟୁ ଏକ ହତ୍ୟା ବୋଲି ଅଭିଯୋଗ କରିଛନ୍ତି । ଗରିବ ଖଟିଖିଆ ଘରର ପିଲା ମାନେ କିଭଳି ବିନା ମୂଲ୍ୟରେ ଇଂରାଜୀ ମାଧ୍ୟମ ବିଦ୍ୟାଳୟର ପାଠ ପଢିପାରିବେ, ସରକାର ତାହାର ଯୋଜନା କରୁଛନ୍ତି । ହେଲେ ଅନ୍ୱେଷା ହଷ୍ଟେଲ ଦାୟିତ୍ୱରେ ରହିଥିବା କର୍ମଚାରୀଙ୍କ ଅବହେଳା କାରଣରୁ ବିଭିନ୍ନ ସମୟରେ ଅବ୍ୟବସ୍ଥା ଦେଖିବାକୁ ମିଳିଛି । ତେବେ ହଷ୍ଟେଲର କର୍ମଚାରୀଙ୍କ ଅବହେଳା ତଥା ଦାୟିତ୍ୱ ହୀନତା ହିଁ ଏହି ମୃତ୍ୟୁର କାରଣ ବୋଲି ଅଭିଯୋଗ ହୋଇଛି । ଏପରି ସ୍ଥିତିରେ ହଷ୍ଟେଲରେ ରହୁଥିବା ପିଲାଙ୍କ ସୁରକ୍ଷାକୁ ନେଇ ଉଠୁଛି ଅନେକ ପ୍ରଶ୍ନ ।