ନୂଆପଡ଼ା,୦୩/୦୧:  ୫ଟି ବେଆଇନ ମଦକୋଠି ଜାଳିଦେଲେ  ଶତାଧିକ ମହିଳା ।  ଅନେକ ଦିନ  ଧରି ମଦକୋଠି ବନ୍ଦ ନେଇ ଫାଣ୍ଡିରୁ ଥାନା ଓ ବ୍ଲକରୁ ଜିଲ୍ଲାପାଳ ପର୍ଯ୍ୟନ୍ତ ଅଭିଯୋଗ କରି ଆସୁଥିଲେ ବି କେହି ଶୁଣିଲେନି। ଶେଷରେ ନିଜ ପରିବାର ପାଇଁ ଆଇନକୁ ହାତକୁ ନେବା ସହ ୫ଟି ବେଆଇନ ମଦକୋଠିକୁ ଭାଙ୍ଗିଛନ୍ତି ମହିଳା ଗୋଷ୍ଠୀ। ତେବେ ନୂଆପଡ଼ା ଜିଲ୍ଲା କୋମନା ଥାନା ଅନ୍ତର୍ଗତ ଠୋଙ୍ଗୋ ଗାଁରେ ଦେଖିବାକୁ ମିଳିଛି ଏଭଳି ଦୃଶ୍ୟ  । 

ସୂଚନା ମୁତାବକ,  ଦୀର୍ଘ ବର୍ଷ ହେବ ଏହି ଗାଁରେ ବେଆଇନ ଭାବରେ ମଦକୋଠି ବଢ଼ି ଚାଲିଥିବା ବେଳେ ଛୋଟ ରୁ ବୁଢା ପର୍ଯ୍ୟନ୍ତ ମଦ ପିଇ ପଥଭ୍ରଷ୍ଟ ହେଉଛନ୍ତି। ଯାହାପାଇଁ ଗତବର୍ଷ ଠାରୁ ଅନେକ ସମୟରେ ଗାଁ ର ମହିଳା ଗୋଷ୍ଠୀ ଥାନା ଠାରୁ ଆରମ୍ଭ କରି ଜିଲ୍ଲାପାଳ ଅଫିସ ପର୍ଯ୍ୟନ୍ତ ଆସି ପ୍ରତିବାଦ କରିବା ସହ ଘେରାଉ କରିଥିଲେ। ହେଲେ କେହି ନ ଶୁଣି ନ ଥିଲେ । ତେଣୁ ବାଧ୍ୟ ହୋଇ ନୂଆବର୍ଷ ଆରମ୍ଭରୁ ଗାଁରେ ମଦକୁ ସମ୍ପୂର୍ଣ ବନ୍ଦ କରିବା ପାଇଁ ଚେଷ୍ଟା କରି ବିଫଳ ହୋଇଥିଲେ । ଆଉ ଏହାପରେ ମହିଳା ଗୋଷ୍ଠୀ ଗତକାଲି ସନ୍ଧ୍ୟାରେ ଏକାଠି ହୋଇ ଯୋଜନା କରିବା ସହ ବେଆଇନ ଭାବରେ ଚାଲୁ ରଖିଥିବା ୫ଟି ମଦ ଭାଟିକୁ ଯାଇ ନିଆଁ ଲଗାଇ ଦେଇଥିଲେ। ଯାହା ଫଳରେ କୋଠି ଗୁଡିକ ପୋଡି ପାଉଁଶ ହୋଇ ଯାଇଛି।  ଏନେଇ ଖବର ପାଇ ରାତିରେ ଅଗ୍ନିଶମ ବିଭାଗୀୟ କର୍ମଚାରୀମାନେ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିବା ବେଳେ ଏ ପର୍ଯ୍ୟନ୍ତ ଥାନାରେ କୌଣସି ମାମଲା ରୁଜୁ ହୋଇନାହିଁ। କୋଠି ମାନଙ୍କରୁ ଅନେକ ବିଦେଶୀ ମଦ ବୋତଲ ଉଦ୍ଧାର ହୋଇଥିବା ବେଳେ ଏନେଇ ଏବେ ସମସ୍ତ ଗ୍ରାମବାସୀଙ୍କୁ ନେଇ ଗାଁରେ ଚାଲିଛି ବୈଠକ।