ନୂଆଦିଲ୍ଲୀ: ଇଦ୍ ଯୋଗୁ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ପଶ୍ଚିମବଙ୍ଗ ଗସ୍ତ ସ୍ଥଗିତ ରହିଛି । ମାର୍ଚ୍ଚ ୨୯ ଏବଂ ୩୦ରେ ଅମିତ ଶାହ ପଞ୍ଚିମବଙ୍ଗ ଗସ୍ତ କରିବାର ଥିଲା । ତେବେ ଶାହଙ୍କ ଗସ୍ତ ସ୍ଥଗିତ ରହିଛି ବୋଲି ରାଜ୍ୟ ବିଜେପି ସଭାପତି ସୁକାନ୍ତ ମଜୁମଦାର ସୂଚନା ଦେଇଛନ୍ତି । ୨୯ ମାର୍ଚ୍ଚରେ କୋଲକାତାରେ ପହଞ୍ଚିବା ପରେ ପରଦିନ ଦଳୀୟ ସାଂଗଠନିକ କାର୍ଯ୍ୟକ୍ରମରେ ଯୋଗଦେବାର କାର୍ଯ୍ୟକ୍ରମ ଥିଲା, କିନ୍ତୁ ଇଦ୍ ଯୋଗୁଁ ଶାହଙ୍କ ଗସ୍ତକୁ ସ୍ଥଗିତ ରଖାଯାଇଛି । ସେ କହିଛନ୍ତି ଯେ, ନୂଆ ତାରିଖ ଧାର୍ଯ୍ୟ ହେବା ପରେ ଏନେଇ ସୂଚନା ଦିଆଯିବ।
ଚଳିତ ବର୍ଷ ଶାହଙ୍କର ଏହା ଦ୍ୱିତୀୟ ପଶ୍ଚିମବଙ୍ଗ ଗସ୍ତ, ଯାହା ସ୍ଥଗିତ ରଖାଯାଇଛି । ଜାନୁଆରୀରେ ତାଙ୍କର ପ୍ରସ୍ତାବିତ ଗସ୍ତକୁ ମଧ୍ୟ ସ୍ଥଗିତ ରଖାଯାଇଥିଲା। ସେହି ସମୟ ମଧ୍ୟରେ, ଶାହ ଜାନୁଆରୀ ୨୯ରେ ପୂର୍ବ ମେଦିନୀପୁର ଜିଲ୍ଲାରେ ଏକ ସାଧାରଣ ସଭାକୁ ସମ୍ବୋଧିତ କରିଥାନ୍ତେ । ଲୋକସଭା ନିର୍ବାଚନ ପାଇଁ ଦଳର ପ୍ରସ୍ତୁତି ସମୀକ୍ଷା କରିବା ପାଇଁ ସାଂଗଠନିକ ବୈଠକରେ ଯୋଗ ଦେଇଥାନ୍ତେ ।
ସେପଟେ ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁ ଶନିବାର ନୂଆଦିଲ୍ଲୀରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କୁ ଭେଟିଛନ୍ତି । ୨୦୨୩ ମୌସୁମୀ ବର୍ଷାରେ ହୋଇଥିବା ଭୟଙ୍କର ବିପର୍ଯ୍ୟୟ ସମୟରେ ରାଜ୍ୟରେ ହୋଇଥିବା ବିପୁଳ କ୍ଷତି ପାଇଁ କ୍ଷତିପୂରଣ ପ୍ରଦାନ କରିବାକୁ ମୁଖ୍ୟମନ୍ତ୍ରୀ ଗୃହମନ୍ତ୍ରୀଙ୍କୁ ଅନୁରୋଧ କରିଛନ୍ତି । ସେ କହିଛନ୍ତି ଯେ, ରାଜ୍ୟ ସରକାର ସହାୟତା ଯୋଗାଇବା ପାଇଁ ଅନୁରୋଧ କରିଛନ୍ତି କିନ୍ତୁ କେନ୍ଦ୍ର ସରକାରଙ୍କ ଦ୍ୱାରା ଏପର୍ଯ୍ୟନ୍ତ ରିଲିଫ୍ ରାଶି ପ୍ରଦାନ କରାଯାଇ ନାହିଁ । ସେ କେନ୍ଦ୍ରମନ୍ତ୍ରୀଙ୍କୁ କହିଛନ୍ତି ଯେ, ପ୍ରାକୃତିକ ବିପର୍ଯ୍ୟୟ ସମୟରେ ପାନୀୟ ଜଳ, ଜଳସେଚନ ଯୋଜନା, ଭିତ୍ତିଭୂମି, ରାସ୍ତା ଏବଂ ସେତୁର ବ୍ୟାପକ କ୍ଷତି ହୋଇଛି।
ମୁଖ୍ୟମନ୍ତ୍ରୀ ସୁଖୁ କହିଛନ୍ତି, ରାଜ୍ୟ ସରକାର ଜୀବନକୁ ସ୍ୱଭାବିକ କରିବା ପାଇଁ ରିଲିଫ୍ ଏବଂ ପୁନର୍ବାସ କାର୍ଯ୍ୟ କରିବା ପାଇଁ ନିଜର ସମ୍ବଳ ବ୍ୟବହାର କରିଛନ୍ତି। ମୁଖ୍ୟମନ୍ତ୍ରୀ କେନ୍ଦ୍ରମନ୍ତ୍ରୀଙ୍କ ସହ ରାଜ୍ୟର ସ୍ୱାର୍ଥ ସମ୍ବନ୍ଧୀୟ ବିଭିନ୍ନ ପ୍ରସଙ୍ଗ ଉପରେ ମଧ୍ୟ ଆଲୋଚନା କରିଛନ୍ତି। କେନ୍ଦ୍ର ଗୃହ ମନ୍ତ୍ରୀ ରାଜ୍ୟକୁ ସମସ୍ତ ପ୍ରକାରର ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି । ବୈଠକରେ ମୁଖ୍ୟମନ୍ତ୍ରୀଙ୍କ ସହିତ ରାଜସ୍ୱ ବିଭାଗର ଅତିରିକ୍ତ ମୁଖ୍ୟ ସଚିବ ଓମକାର ଚାନ୍ଦ ଶର୍ମା ଉପସ୍ଥିତ ଥିଲେ ।
