ନୂଆଦିଲ୍ଲୀ ୨୨/୦୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜ ଦ୍ୱିତୀୟ କାର୍ଯ୍ୟକାଳରେ ଆକ୍ରାମକ ବାଣିଜ୍ୟିକ ନିଷ୍ପତ୍ତି ନେଉଛନ୍ତି । ବିଶ୍ୱର ଅନେକ ଦେଶ ଉପରେ ତଗ୍ଡ଼ା ଶୁଳ୍କ ଲଦିବାକୁ ଘୋଷଣା କରିଛନ୍ତି ଯେ । ଅବଶ୍ୟ ଚୀନ୍କୁ ଛାଡ଼ି ଅନ୍ୟ ଦେଶଗୁଡ଼ିକୁ ୯୦ ଦିନର ମହଲତ ଦେଇଛନ୍ତି ଟ୍ରମ୍ପ । ଏହାସତ୍ତେ୍ୱ ଏକ ବଡ଼ ଧରଣର ସଂକଟ ଉଭୟ ଆମେରିକା ଏବଂ ବିଶ୍ୱ ଅର୍ଥନୀତି ଆଡ଼କୁ ମାଡ଼ି ଆସୁଥିବା ଆଶଙ୍କା କରାଯାଉଛି ।
ଏହି ଟାରିଫ୍ କାରଣରୁ ବିଶ୍ୱ ଆର୍ଥିକ ମାନ୍ଦାବସ୍ଥା ଏବଂ ଦରଦାମ ସମସ୍ୟା ଅଧିକ ତେଜିବା ନେଇ ଅନୁମାନ କରାଯାଉଛି । ଆମେରିକୀୟମାନେ ଏବେଠୁ ଏହାର ପ୍ରଭାବକୁ ଅନୁଭବ ମଧ୍ୟ କଲେଣି । ସ୍ଥିତି ଏଭଳି ହୋଇଛି ଯେ, ଗୋଟିଏ ଚାକିରିରେ ସେମାନେ ଗୁଜରାଣ ମେଣ୍ଟାଇ ପାରୁନାହାନ୍ତି । ଘର ଚଳାଇବା ପାଇଁ ଏକସଙ୍ଗେ ଏକାଧିକ ଚାକିରି କରିବାକୁ ବାଧ୍ୟ ହେଉଛନ୍ତି । ମାର୍ଚ୍ଚରେ ଦେଶରେ ମଲ୍ଟିପଲ୍ ଚାକିରି କରୁଥିବା ଲୋକଙ୍କ ସଂଖ୍ୟା ୭୬,୦୦୦ ବଢ଼ି ରେକର୍ଡ ୮୯.୪ ଲକ୍ଷରେ ପହଞ୍ଚିଛି ।
ଏହି ସଂଖ୍ୟା ୨୦୧୯ର ସ୍ତରଠାରୁ ୫ ଲକ୍ଷ ଅଧିକ । ଆମେରିକାରେ ମୋଟ କର୍ମଚାରୀଙ୍କ ମଧ୍ୟରୁ ୫.୫% ଏକସଙ୍ଗେ ଏକାଧିକ ଚାକିରି କରୁଥିବା ରିପୋର୍ଟରୁ ଜଣାପଡ଼ିଛି । ଏ ସଂଖ୍ୟା ୨୦୦୯ରୁ ସର୍ବାଧିକ । ଏହିଭଳି ଭାବେ ଦେଶରେ ୩ କୋଟି ଲୋକ ପାର୍ଟ-ଟାଇମ୍ ଜବ୍ କରୁଛନ୍ତି । ଏହା ଆମେରିକା ଇତିହାସରେ ତୃତୀୟ ବୃହତ୍ । ଆମେରିକାରେ ଅନେକ ବର୍ଷ ହେବ ଲୋକଙ୍କ ପାରିଶ୍ରମିକ ବଢ଼ିନାହିଁ କିନ୍ତୁ ଏହି ଅବଧିରେ ଦେଶରେ ଦରଦାମ୍ ବଡ଼ ମାତ୍ରାରେ ବୃଦ୍ଧି ପାଇଛି । ଏହି କାରଣରୁ ଲୋକଙ୍କ ପାଇଁ ଘର ଚଳାଇବା କଷ୍ଟକର ହେଉଛି ଏବଂ ସେମାନେ ଏକାଧିକ ଚାକିରି କରିବାକୁ ବାଧ୍ୟ ହେଉଛନ୍ତି ।
ଆମେରିକାରେ ୨୦୨୪ର ପ୍ରଥମ ୩ ମାସରେ କ୍ରେଡିଟ୍ କାର୍ଡ ଖିଲାପୀ ୪୬୦୦ କୋଟି ଡଲାରରେ ପହଞ୍ଚିଛି, ଯାହା ୨୦୧୦ ପରେ ସବୁଠାରୁ ଅଧିକ । ଏ ବର୍ଷ ଏହା ୨୦୧୦ର ସର୍ବକାଳୀନ ରେକର୍ଡ ସ୍ତରରେ ପହଞ୍ଚିବାର ଆଶଙ୍କା କରାଯାଉଛି । ୨୦୨୩ ତୁଳନାରେ ଏହା ୫୦%ରୁ ଅଧିକ ବଢ଼ିବା ଅନୁମାନ କରାଯାଉଛି । ଏଥିରୁ ସ୍ପଷ୍ଟ ହୋଇଯାଇଛି ଯେ, ଲୋକେ ଦରଦାମ ବୃଦ୍ଧି ମଧ୍ୟରେ ଅଣନିଃଶ୍ୱାସୀ ହୋଇପଡ଼ିଛନ୍ତି ଏବଂ କ୍ରେଡିଟ୍ କାର୍ଡରେ କିଣାକିଣି କରି ଏହାକୁ ପରିଶୋଧ କରିପାରୁନାହାନ୍ତି । ଏଭଳି ପରିସ୍ଥିତିରେ ଫେଡେରାଲ ରିଜର୍ଭ ସୁଧ ହାରକୁ ନ ଖସାଇ ଏହାକୁ ଉଚ୍ଚା ରଖିଛି । ଫଳରେ ୨୦୨୩ ମଧ୍ୟଭାଗରେ କ୍ରେଡିଟ୍ କାର୍ଡ ବକେୟା ପ୍ରଥମ ଥର ୧ ଟ୍ରିଲିୟନ ଡଲାର ପାର୍ କରିଛି ।
କରୋନା ମହାମାରୀ ସମୟରେ ଯୋଗାଣ ସମସ୍ୟା ଦେଖାଦେଇଥିଲା । ଏହାସତ୍ତେ୍ୱ ଲୋକେ ବହୁ ମାତ୍ରାରେ ଖର୍ଚ୍ଚ କଲେ । ଫଳରେ ଦରବୃଦ୍ଧି ସ୍ଥିତି ଉତ୍କଟ ହେଲା । ଦରଦାମ ନିୟନ୍ତ୍ରଣ ପାଇଁ ଫେଡେରାଲ ରିଜର୍ଭ ୨୦୨୨ରୁ ସୁଧ ହାର ବଢ଼ାଇଛି । ଯେଉଁ ଲୋକମାନେ କ୍ରେଡିଟ୍ କାର୍ଡରେ ଖର୍ଚ୍ଚ କଲେ ଏବଂ ସମ୍ପୂର୍ଣ୍ଣ ବକେୟା ପରିଶୋଧ କରିପାରିଲେ ନାହିଁ ସେମାନଙ୍କୁ ଅଧିକ ସୁଧ ଗଣିବାକୁ ପଡ଼ିଲା । ଗତ ସେପ୍ଟେମ୍ବର ସୁଦ୍ଧା ୧୨ ମାସରେ ଲୋକେ ସୁଧ ଆକାରରେ ୧୭୦୦୦ କୋଟି ଡଲାର ଦେଇଛନ୍ତି । ସୁଧ ଏବଂ ଅଧିକ ବିଲ୍ ଭରିବା କାରଣରୁ ଲୋକଙ୍କ ବ୍ୟାଙ୍କ ଖାତାରେ ଟଙ୍କା କମିଗଲା । ବିଶେଷ କରି କମ୍ ଆୟ କରୁଥିବା ଲୋକଙ୍କୁ କ୍ରେଡିଟ୍ କାର୍ଡ ବିଲ୍ ଭରିବାରେ ସମସ୍ୟା ହେଲା । ଏଭଳି ସ୍ଥିତିରେ ସେମାନେ ଏକାଧିକ ଚାକିରି କରିବାକୁ ବାଧ୍ୟ ହୋଇଛନ୍ତି ।
ଅନୁମାନ କରାଯାଉଥିଲା ଯେ, ଫେଡେରାଲ ରିଜର୍ଭ ସୁଧ ହାରକୁ ଦ୍ରୁତ ବେଗରେ ଖସାଇବ । କିନ୍ତୁ ଏବେ ଏଭଳି ଅନୁଭବ ହେଉନାହିଁ । ଅଧିକାରୀମାନଙ୍କ କହିବାନୁସାରେ, ଏ ବର୍ଷ ସୁଧ ହାର ମାତ୍ର ୦.୫% କମିବ । ପୂର୍ବରୁ ୧% ଖସିବା ନେଇ ଆକଳନ କରାଯାଉଥିଲା । ଗତ ବର୍ଷକରେ ପ୍ରାୟ ୬୦୦୦ କୋଟି ଡଲାର କ୍ରେଡିଟ୍ କାର୍ଡ ଋଣକୁ କ୍ଷମା କରାଯାଇଛି । ଏହାସତ୍ତେ୍ୱ ଲୋକଙ୍କ ଉପରେ ୩୭୦୦ କୋଟି ଡଲାରର ଋଣ ବକେୟା ଅଛି । ଏହାର ଅର୍ଥ ଆଗକୁ ଲୋକଙ୍କ ସମସ୍ୟା ଆହୁରି ବଢ଼ିପାରେ । ଟ୍ରମ୍ପ ଯେଉଁଭଳି ଭାବେ ଟାରିଫ୍ ବଢ଼ାଉଛନ୍ତି ତାହା ଆଗାମୀ ଦିନରେ ମୁଦ୍ରାସ୍ଫୀତିକୁ ଆହୁରି ତେଜିପାରେ ଏବଂ ସୁଧ ହାର ବଢ଼ିପାରେ । ଫଳରେ ଲୋକଙ୍କ ପକେଟ୍ରୁ ଆହୁରି ଟଙ୍କା ଯିବ ବୋଲି ଅନୁମାନ କରାଯାଉଛି ।
