ଭୁବନେଶ୍ୱର, ୧୨/୧୦ : ଜଳ ସଞ୍ଚୟ ଜନ ଭାଗିଦାରୀ ପଦକ୍ଷେପ କାର୍ଯ୍ୟକ୍ରମରେ ସାମିଲ ହେବେ ସମସ୍ତ ବିଶ୍ୱବିଦ୍ୟାଳୟ ଓ କଲେଜ। ଉଚ୍ଚଶିକ୍ଷାନୁଷ୍ଠାନ ପରିସରରେ ବର୍ଷା ଜଳ ସଂରକ୍ଷଣ ବ୍ୟବସ୍ଥା ଓ ଭୂତଳ ଜଳ ରିଚାର୍ଜ ବ୍ୟବସ୍ଥା କରିବାକୁ କୁହାଯାଇଛି । ଉଚ୍ଚଶିକ୍ଷାନୁଷ୍ଠାନ କର୍ତ୍ତୃପକ୍ଷ ଏନେଇ ସ୍ୱତନ୍ତ୍ର ରୋଡ୍ ମ୍ୟାପ୍ କରିବେ । ଏହାକୁ ରକ୍ଷାଣବେକ୍ଷଣ ଓ ସଫେଇ କରିବାକୁ ପଦକ୍ଷେପ ନିଆଯିବ । ଏନେଇ ନିଜର ଖର୍ଚ୍ଚ କିମ୍ବା ସମାଜ ପ୍ରତି କର୍ପୋରେଟ ସାମାଜିକ ଦାୟିତ୍ୱବୋଧ (ସିଏସ୍ଆର୍) ପଦକ୍ଷେପ ଦ୍ୱାରା କରିବେ । କେବଳ ଏତିକି ନୁହେଁ ଉଚ୍ଚଶିକ୍ଷାନୁଷ୍ଠାନ ପକ୍ଷରୁ ଜନସଚେତନା କରାଯିବ । ଯେଉଁଥିରେ ନାଗରିକମାନେ କମ୍ ଖର୍ଚ୍ଚରେ ବର୍ଷା ଜଳ ସଂରକ୍ଷଣ କରିପାରିବେ ସେନେଇ ସଚେତନତା ସୃଷ୍ଟି କରାଯିବ । ଏନେଇ ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ପକ୍ଷରୁ ସମସ୍ତ କଲେଜ ଅଧ୍ୟକ୍ଷ ଏବଂ ବିଶ୍ୱବିଦ୍ୟାଳୟ କୁଳପତିଙ୍କୁ ଚିଠି କରାଯାଇଛି ।
ଗତ ସେପ୍ଟେମ୍ବର ୬ରେ ସୁରଟରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆରମ୍ଭ କରିଥିବା ଏହି କାର୍ଯ୍ୟକ୍ରମକୁ ବ୍ୟାପକ କରାଯିବ । କେନ୍ଦ୍ର ସରକାର ସିଏସ୍ଆର ପାଣ୍ଠି, ସରକାରୀ କିମ୍ବା ବେସରକାରୀ ପାଣ୍ଠି, ଶିଳ୍ପାନୁଷ୍ଠାନ, ନାଗରିକ ସଂସ୍ଥା କ୍ଷେତ୍ରରୁ ଅର୍ଥ ବ୍ୟୟ କରି ଏହି ଜଳ ସଞ୍ଚୟ ଅଭିଯାନ କରିପାରିବେ । ଏଥିରେ ଭୂତଳ ଜଳ ସ୍ତର ବୃଦ୍ଧି କରିବାକୁ ପଡ଼ିବ । ବର୍ଷା ଜଳ ସଂରକ୍ଷଣ, ଆକ୍ୱାଫର ରିଚାର୍ଜ, ବୋରୱେଲ୍ ରିଚାର୍ଜ ଆଦି ବ୍ୟବସ୍ଥା କରିବାକୁ ନିର୍ଦ୍ଦେଶ ରହିଛି । ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ହେଉଛି, ଭୂତଳ ଜଳ ସ୍ତରକୁ ବୃଦ୍ଧି କରିବା ଏବଂ ଜଳ ସଂରକ୍ଷଣ ବ୍ୟବସ୍ଥାକୁ ପ୍ରୋତ୍ସାହନ କରିବା । ତେଣୁ ସମସ୍ତ ସରକାରୀ ଓ ଘରୋଇ ସ୍କୁଲ, ବିଶ୍ୱବିଦ୍ୟାଳୟ, ହଷ୍ଟେଲ, ଅଙ୍ଗନବାଡ଼ି କେନ୍ଦ୍ର, ଏଫ୍ପିଓ ଆଦିରେ ଜଳ ସଂରକ୍ଷଣ ବ୍ୟବସ୍ଥା କରିବାକୁ କୁହାଯାଇଛି ।
